Республикан кемине jеткен маргаандар

23.11.2018

Кӱчӱрген айдыҥ 17-чи кӱнинде Кан-Оозы аймактыҥ Јабаган јуртында столдо ойноор теннисле агалу-ийнилӱ Амат ла Эжер Тулентиндердиҥ эземине учурлай республикан маргаан ӧткӧн.

Бу маргаан канча јылдарга улай ӧткӱрилип келген. Оны јӱрӱмнеҥ эрте јӱре берген Амат ла Эжер Тулентиндердиҥ нӧкӧрлӧри ӧткӱрип баштаган. Баштап тарый јурт кеминде ӧдӱп турган маргаан эмди республикан кемине јеткен. Быјыл оныҥ туружаачыларыныҥ тоозы 80-ге јуук болгонын темдектеер керек. Олор Горно-Алтайсктаҥ, Кош-Агаш, Кӧксуу-Оозы, Оҥдой ло Чамал аймактардаҥ келген.

Маргаанныҥ ачылтазында уткуулду сӧстӧрин Јабаганныҥ јурт јеезезиниҥ јааны Карчага Елтоков, бу јурттаҥ «Кан-Оозы аймак» муниципал тӧзӧлмӧниҥ депутады Амыр Калташев, Јабаганныҥ школыныҥ директоры Раиса Каймина, Амат ла Эжер Тулентиндердиҥ энези Валентина Алексеевна ла маргаанныҥ баш јаргычызы Айдар Пильтин айткандар. Олор маргаанныҥ туружаачыларына јараш ойындар ла јеҥӱлер кӱӱнзеген.

Теннисчилер јаштары аайынча дивизиондорго бӧлинген. Ойындарыныҥ узы бийиктеп калган спортчылар башка ойногон. Олор ойногон 1-кы дивизиондо јирме туружаачы болгон. Столдо ойноор теннисле ӧдӱп турган маргаандардыҥ јаантайынгы туружаачылары бой-бойын јакшы билер. Олор кӧп тазыктырынып, узын там бийиктедет. Бу дивизиондо ӧткӧн кызу тартыжулардыҥ турулталарыла баштапкы јерди Павел Мендешев алган. Экинчи јерде Николай Легких болордо, ӱчинчи јерге оныҥ уулы Евгений Легких чыккан. Баштапкы ӱч јерди ӱлешкен бу спортчылар Горно-Алтайсктаҥ болор. Бу ок дивизиондо талдама ойын кӧргӱскен деп Шашыкманнаҥ Амыр Бекинди ле Горно-Алтайсктаҥ Вячеслав Фомкинди темдектеер керек. Соҥында Амыр Бекинге јеҥӱге јӱткигени учун деп аҥылу сый берилген эди.

Эр улус ортодо экинчи дивизионныҥ туружаачыларыныҥ тоозы база кӧп болгон. Мында јеҥӱни Јабаганнаҥ Эркин Кеденов ал соккон. Экинчи јерде база ла бу ок јурттаҥ Николай Шагаев болордо, ӱчинчи јер Кан-Оозынаҥ Александр Сандыковко келишкен.

Кыстар ортодо јеҥӱчилдер болуп Јабаганныҥ балдары чыккан. Баштапкы јер Карина Шагаевада, экинчи јер Байсура Наевада ла ӱчинчи јер Марина Садучиновада. Школдо ӱренип турган бу кыстардыҥ ойындары сӱрекей јакшы деп айдар керек. Јурттыҥ школында олорго спорттыҥ бу бӱдӱмиле тазыктырынатан јакшынак айалгалар тӧзӧлгӧн. Спортзалда теннис ойноор беш стол турат. Олордыҥ кезигин бу маргаандардыҥ тӧзӧӧчилериниҥ бирӱзи Айдар Пильтин алган ла тӧрӧл јуртыныҥ балдары спортло тазыктырынзын деп сыйлаган эмтир. Ол бойы база јакшы ойнойт, је бу учуралда баш јаргычы болды.

Ӱй улус ортодо Куладынаҥ Сырга Мешкиновага једери јок болды. Экинчи јерди Кош-Агаштаҥ Чейнеш Саргадытова аларда, ӱчинчи јер Јабаганнаҥ Людмила Чуруповага келишкен.

Уулдар ортодо маргаанныҥ јеҥӱчили болуп Кош-Агаштаҥ Жалджас Солтанов чыккан. Экинчи јерде Чамалдаҥ Ф. Зубакин ле ӱчинчи јерде Шашыкманнаҥ Айан Боктошев.

Бу маргаанныҥ јеҥӱчилдерине сыйга кой берилип турганы база јакшынак јаҥжыгу болуп калган. Бу да учуралда сыйга ӱч кой чыгарылган. Олор Павел Мендешевке, Эркин Кеденовко ло, кӧрӧӧчилердиҥ сыйы деп, Чамалдаҥ келген эјелӱ-карындашту Кирилл ле Виктория Айбыковторго табыштырылган. Арткан јеҥӱчилдер баалу сыйларла кайралдаткан.

Кандый ла маргаанды спонсорлор јогынаҥ ӧткӱретени кӱч керек. Бу да учуралда јӧмӧшкӧн улус болгон. Олор: А. А. Марабян, В. Г. Фомкин, В. М. Букачаков, М. Н. Пильтин, Амат ла Эжер Тулентиндердиҥ тӧрӧгӧн-туугандары, кожо ӱренгендери ле нӧкӧрлӧри.

Маргаанныҥ ӧткӱреечилериниҥ айтканыла, столдо ойноор теннис аайынча республикан федерация тӧзӧлип јат. Мынызы тергеебисте спорттыҥ бу бӱдӱмин ӧскӱретен ӱзеери аргалар береринде бир де алаҥзу јок.

К. Яшев

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина