Шӱӱжӱде – келер jылдыҥ иштери

30.11.2018

АР-дыҥ Эл Курултайыныҥ Тӧргизиниҥ ээчий јууны кӱчӱрген айдыҥ 27-чи кӱнинде спикер Владимир Тюлентинниҥ башкартузыла ӧткӧн.

Оныҥ ижинде республиканыҥ депутаттары, АР-дыҥ башкарузыныҥ председателиниҥ ордынчызы, АР-дыҥ башчызыныҥ ла башкарузыныҥ Бирлик аппарадыныҥ јааны Анатолий Донской, ӱредӱ ле билим аайынча министр Алексей Бондаренко, РФ-тыҥ юстиция министерствозыныҥ Алтай Республика аайынча башкартузыныҥ јааны Наталья Веретенникова, республикан прокурордыҥ баш болушчызы Юлия Юркина, башкаруныҥ тап-эрик сурактар аайынча башкартузыныҥ јааны Ирина Коробейникова турушкан.

Алтай Республикада јасакберим иштиҥ 2017 јылда айалгазы керегинде докладта айдылган јасакберим ишти јарандырары аайынча тӱп-шӱӱлтелерди јӱрӱмде бӱдӱрери керегинде јетирӱни јуунда Эл Курултайдыҥ јасакберим иш ле эл политика аайынча комитединиҥ председатели Виктор Ромашкин эткен. Республиканыҥ јасактары јӱрӱмде канайда бӱдӱп турганын шиҥдеген иштиҥ бӱдӱмдериниҥ бирӱзи тергееде јасакберим иштиҥ айалгазы керегинде јуунды јылдыҥ сайын ӧткӱрери болуп јат деп, ол куучындаган. Бу јуунга парламент республикада јасакберим иштиҥ айалгазы керегинде доклад белетейт.

Депутаттыҥ шӱӱлтезиле, адалган доклад Алтай Республиканыҥ государстволык јаҥдарыныҥ јасакберим ижин текши шиҥдеген ле бу ишти јарандырары аайынча шӱӱлтелерди јуунаткан экспертно-аналитический документ болуп јат.

Јасакберим иштиҥ айалгазы керегинде докладты белетеер иштиҥ чыҥдыйы јылдаҥ јылга бийиктегенин темдектеп, 2017 јылдагы иш аайынча докладта айдылган тӱп-шӱӱлтелердиҥ кӧп сабазы јӱрӱмде бӱткенин Виктор Ромашкин јетирген.

Республикан парламенттиҥ јасакберим ишти шиҥдеген ижин Юлия Юркина ла Ирина Коробейникова јуунда эткен коштой јетирӱлеринде бийик баалаган. Олордыҥ айтканыла, бу ишти ӧмӧ-јӧмӧ оноҥ ары улалтар керек, нениҥ учун дезе ол јасакберим ишти јарандырарына јӧмӧйт.

Јуунда анайда ок Алтай Республиканыҥ ӱредӱлик учреждениелеринде јеткилдеш ле технический бӧлӱктерде иштеген кичӱ персоналдыҥ ишјалын тӧлӧӧри аайынча Эл Курултайдыҥ Тӧргизиниҥ јӧби јӱрӱмде канайда бӱткени кӧрӱлген. Бу сурак аайынча тӧс јетирӱни Алексей Бондаренко эткен.

Тургуза ӧйдӧ ӧрӧ адалган ишчилерге ишјал эҥ ас ишјалдыҥ кемине районный коэффициентти кожуп тӧлӧлӧт деп, јуунда айдылган. 2018 јылдыҥ кӱчӱрген айына јетире бу бӧлӱк улуска ишјал ӧйлӱ-ӧйинде тӧлӧлӧт. Јербойыныҥ бюджеттериниҥ акчазын турулталу тузаланар амадула республиканыҥ муниципал тӧзӧлмӧлӧри ӱредӱлик учреждениелерде јеткилдеш ле технический кичӱ персоналдыҥ тоозын аайлу-башту эдери аайынча тӧзӧмӧлдӱ иштер ӧткӱрген.

Бу сурак аайынча Эл Курултайдыҥ Тӧргизиниҥ шиҥжӱзин токтодор јӧп јарадылган.

Тӧргиниҥ турчылары Алтай Республиканыҥ парламентиниҥ 2019 јылдыҥ баштапкы јарым-јылдыгында бӱдӱретен јасакберим, шиҥжӱ ле тӧзӧмӧл ижиниҥ планын кӧргӧн. Бу аайынча јетирӱни Эл Курултайдыҥ председателиниҥ ордынчызы Михаил Терехов эткен.

Планды тургузарында парламенттиҥ комитеттериниҥ, АР-дыҥ башкарузыныҥ, Талдаачы камызыныҥ, прокурорыныҥ шӱӱлтелери ајаруга алынганын депутат айткан. Јасакберим бӧлӱкте эл политика, јербойында бойы башкарынып јадар, акча ла калан политика, ӱредӱлик ле культура, экология ла ар-бӱткенниҥ байлыктарын тузаланар ууламјыларда, эл-јонныҥ јонјӱрӱмдик корулажында ишти ээжилеер јасакчы документтер белетеери темдектелген. Планга анайда ок Россия Федерацияныҥ президентиниҥ Федерал Јуунга баштанузында ла кӱӱк айдыҥ 7-чи кӱнинде чыккан «Россия Федерацияныҥ 2024 јылга јетире ӧзӱминиҥ эл амадулары ла стратегиялык иштери керегинде» јарлыгында айдылган тӧс керектерди бӱдӱрер иштер кирген. База парламенттиҥ шиҥжӱ иштери, Тӧргизиниҥ јуундары, ӧткӱретен кӱрее куучындары ла о. ӧ. иштер темдектелген.

Тӧргиниҥ бу сурак аайынча јӧби Эл Курултайдыҥ ээчий сессиязына чыгарылар.

Депутаттар јуунда келер сессияныҥ шӱӱжӱзине чыгаратан сурактарды чокымдаган ла Алтай Республиканыҥ парламентиниҥ Кӱндӱлӱ грамотазыла кайралдайтан улусты јӧптӧгӧн.

АР-дыҥ Эл Курултайыныҥ пресс-службазы

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым