Алтайдын Чолмоны

Эрчимдӱ келер ӧйгӧ јол

26.04.2019

Кандык айдыҥ 19-чы кӱнинде ӱзеери ӱредӱниҥ республикан тӧс јеринде балдардыҥ ла јииттердиҥ јондык биригӱлериниҥ башкараачыларыныҥ ла эҥ эрчимдӱлериниҥ текшироссиялык «Лидер XXI века» кӧрӱ-маргааныныҥ тергеелик бӧлӱги ӧтти.

Быјылгы ченелтелерде Театрдыҥ јылына учурлалган эссе бичиир, «Мен ле мениҥ јондык биригӱм» деген тема аайынча видеоролик ле портфолио, јонјӱрӱмдик ӱлекери керегинде јайаандык таныштыру белетеп кӧргӱзер керек болды.
Бу конкурс орооныстыҥ эрчимдӱ, башкараачы болгодый јайалталу балдарын илелеп, олорды јилбиркедип, келер ӧйгӧ талдама улус эдип чыдадарын некейт. Ондо угузу бичик ийген, муниципал кеминде эҥ артык болгондоры туружат. Тергеелик маргаанда он кижи турушты: Тондоштогы, Мыйтудагы, Кызыл-Ӧзӧктӧги, Чойдогы, Иогачтагы, Јодролудагы ла каладагы школдордыҥ лидерлери.
«Лидер XXI» конкурстыҥ тӧзӧӧчилери, јаргычылары балдарга баштанып, олордыҥ ижин бийик баалап, јылу сӧстӧр айдып, келер ӧйдӧ олор бойыныҥ кожо ӱренгендерин, најы-нӧкӧрлӧрин баштап, кичӱ Тӧрӧлистиҥ, орооныстыҥ ичкери јолын улалтсын деп кӱӱнзеди.
Ӧскӱс ле ада-энезиниҥ кичеемели јок арткан балдардыҥ Г. К. Жуковтыҥ адыла адалган школ-интернадыныҥ ӱренчиги Василий Уткинниҥ ижи «Эҥ артык јайаандык видеоролик» деп адалды. «Эҥ артык самопрезентация» номинацияда јеҥӱни Кызыл-Ӧзӧктӧги школдыҥ ӱренчиги Арина Гуляева алды. Каладагы М. В. Карамаевтиҥ адыла адалган 1-кы таҥмалу лицейдиҥ ӱренчиги Екатерина Макасееваныҥ ӱлекери «Эҥ артык јонјӱрӱмдик ӱлекер» деп адалды.
Текши конкурстыҥ јеҥӱчилдери болуп 14-15 јаштулардаҥ Арина Гуляева ла 16-18 јаштулардаҥ Екатерина Макасеева чыктылар. Онойдо ок Екатерина келер ӧйдӧ эмчи болуп иштеерге турганы учун ого «Эмчи-волонтерлор» деген кыймыгунаҥ аҥылу сый табыштырылды.
Бибимарям Авазматова, каладагы 3-чи таҥмалу гимназиязыныҥ 9-чы клазыныҥ ӱренчиги: «Мен бу конкурстыҥ муниципал бӧлӱгинде 2-чи јерге чыгып, тергеелик бӧлӱгине ӧттим. Озолондыра берилген јакылталарга јакшы белетенип алган болгом. Кӧргӱзӱм бойыма јараган, ончо сананып алганымды бӱдӱрдим».
Татьяна Уина, Јодролудагы школдыҥ 10-чы клазыныҥ ӱренчиги: «Школдо јондык тӧзӧлмӧбистиҥ ады «Орбита», мен оныҥ президенти. Мындый кӧрӱ-маргаанда мен баштапкы катап туружадым. Ченежӱлердиҥ айалгазы, эрчимдӱ балдар, конкурс ончо јаныла јарады. Текши алза, коркымчылу эмес. Јӱк ле сценага чыгар алдында бир эмеш маҥзаарыш болот. Кожо турушкан балдарда јакшы јӧмӧлтӧ ӧмӧликтер болгонын ајардым. Олор чындап та јаан болужын јетирет. Мен бери ӱредӱчимле экӱ ле келдис. Нӧкӧрлӧримди кожо экелерге кӧлӱк јанынаҥ кӱч болгон учун келишпеди. Бу баштапкы ченемелим јакшы болгон деп айдарга јараар. Кожо ӱренип турган ла ӧскӧ дӧ балдарды јондык тӧзӧлмӧлӧрдиҥ ижинде, мындый јакшынак маргаандарда недеҥ де коркыбай, јана баспай, эрчимдӱ турушсын деп кычырадым».

Э. КУРГАРИНОВА