Алтайдын Чолмоны

Горно-Алтайсктагы аэропорттыҥ 400 000-чы пассажири

13.09.2019

Кече, сыгын айдыҥ 12-чи кӱнинде, Горно-Алтайсктыҥ аэропорты мынаҥ учкан 400 000-чы кижини кӧдӱриҥилӱ уткыды.

Эртен тура Москва јаар S7 Airlines ле Победа компаниялардыҥ самолетторыла учарга келген улус мындый кӧдӱриҥи болорын сананбаган да. Бу јар эдилерде, аэропортто јык толо улус, анчада ла регистрация ӧткӧндӧр «ырысту пассажир» кем болорын ӧкпӧӧрип сакыган.

Горно-Алтайсктыҥ аэропортын 2011 јылда јаҥырта јазаган кийнинде мынаҥ учкан ла бого учуп келген пассажирлер ортодо 400 000-чы кижи Горно-Алтайсктагы перинатальный тӧс јердиҥ медсестразы Оксана Тырышканова болгоны регистрация ӧдӱп турар ӧйдӧ јарталды. Ол уулы Денисти Москва ажыра Анапа јаар футболло текшироссиялык маргаандарга ӱйдежип бараткан эмтир. Бу самолетло 2010 јылда чыккан уулчактардыҥ Горно-Алтайсктагы «Спартак» командазы, Сибирьде ӧткӧн маргаандардыҥ јеҥӱчили болуп, јаан маргаандарга атанган. Оксана Николаевнаныҥ ӧбӧгӧни Виктор Тырышканов Чой аймактыҥ Тунјы јуртында чыккан, билезиле Горно-Алтайскта јадат. Ол база бу самолетло учуп барып јат. Виктор база футболчы кижи, ветерандардыҥ командазында эмдиге ойнойт. Олор Оксанала кожо 4 бала чыдадып турганын куучындаган, Денис эҥ оогожы эмтир.

Аэропорттыҥ производственно-диспетчерский служба-зыныҥ јааны Анна Алекова аэропорттыҥ башкартузыныҥ ла бастыра ӧмӧлигиниҥ адынаҥ Оксана Николаевнаны уткып, ого кереес сыйлар табыштырган. «400 000-чы пассажир – S7 Airlines авиакомпанияныҥ самоледыла учкан кижи болгоны биске анчада ла сӱӱнчилӱ, не дезе кӧп саба улус бисте шак бу компанияныҥ самолетторыла Москва ла Новосибирск јаар учуп јат – деп, ол айткан. – Горно-Алтайсктыҥ аэропортынаҥ учкандардыҥ тоозы јылдаҥ јылга кӧптӧйт, мыныла колбой улуска эптӱ айалгалар тӧзӧӧргӧ аэропортты элбедип, јаҥырта јазаары темдектелген».

S7 Airlines компанияныҥ чыгартулу кижизи Евгений Михалев Оксана Тырышканованы уткып, ого Горно-Алтайсктаҥ Москвага јетире ле кайра јыл ичинде бир катап јал тӧлӧбӧзинеҥ учар арга берген сертификат сыйлаган.

«Бодоштыра чоттогонысла, Горно-Алтайсктыҥ аэропортынаҥ учкан пассажирлердиҥ тоозы келер јылда јарым миллионго једер. Тоолу јылдаҥ бис бу аэропортто ороондор ортодогы рейсле учуп келген улусты уткыырыс, бу ӧйгӧ јетире узак эмес – деп, Горно-Алтайсктыҥ аэропортыныҥ директоры Сергей Круглов уткуулду сӧзинде айткан. – Ондый учуштар башталып калган. Тоолу кӱндер кайра США-даҥ Австралия јаар учуп бараткан јаан эмес самолет бистиҥ аэропортко конгон, ол бӱгӱн учуп чыгар. Эртен биске Новая Зеландиядаҥ учуп келеткен самолеттыҥ экипажы отурар. Бу Јер-телекейди эбире јол-јорык эткен биле улустыҥ таҥынаҥ самоледы. Тергеебисте туризм ӧзӱм алынганыла јаҥыс та бистиҥ ороонныҥ эмес, је анайда ок гран ары јаныныҥ кӧп јорыкчылары Алтайдыҥ кайкалдарын кӧрӧргӧ кӱӱнзейт. Кейле учкан транспорт дезе бӱгӱн эҥ эптӱ ле јеткер јок арга болуп јат».

Горно-Алтайсктыҥ аэропортыныҥ 400 000-чы пассажири Алтай Республиканыҥ кӧп балдар азыраган эне кижизи болгоны биске база сӱӱнчилӱ болды.

Светлана КЫДЫЕВА