АР-дыҥ башкарузыныҥ јааныныҥ ордынчылары тудулган

26.11.2019

Сессияда Алтай Республиканыҥ јаҥы башкарузында иштейтен улус јасакчы јаҥла јӧптӧштирерине чыгарылган.

Республикан јасактарла, Алтай Респуб-ликаныҥ башкарузыныҥ председателиниҥ ордынчыларыныҥ јамызына отуратан улус Эл Курултайдыҥ сессиязында јӧптӧштирӱ ӧдӧт. Башкаруныҥ министрлерин, комитеттердиҥ јаандарын тергеениҥ бӱдӱреечи јаҥыныҥ башкараачызы бойы тургузып јат.

Ӧткӧн сессияда Алтай Республиканыҥ башкарузыныҥ председателиниҥ ордынчыларына кӧстӧлгӧн беш кижи јасакчы јаҥла јӧптӧштирерине адалган. Бу сурак кӧрӱлер алдында депутаттар республиканыҥ башкарузында кандый кубулталар болорын тергеениҥ башчызынаҥ сураган.

«Мен Алтай Республиканыҥ башчызыныҥ, башкарузыныҥ председателиниҥ молјуларын бӱдӱрип турар ӧйдӧ бӱдӱреечи јаҥда кубулталар болор деп айткам – деп, Олег Хорохордин сессияда айткан. –Бу јамыда јарым јылдаҥ ажыра иштеп келдим. Кӧргӧжин, эмдиги бар министерстволор: экономикалык ӧзӱмниҥ, акча-манаттыҥ, јурт ээлемниҥ, јонјӱрӱмдик ӧзӱмниҥ, су-кадыкты корыырыныҥ, ӱредӱликтиҥ, культураныҥ – ончозы керектӱ, олорды кубултар арга јок. База тергеелик ӧзӱмниҥ ле ар-бӱткенниҥ байлыктары, экология ла туризм аайынча министерстволор бар. Башкаруда 9 комитет иштеп јат, олордыҥ јетӱзин федерал јаҥ кубултар, кемле де бириктирер јараду бербей јат. Оныҥ учун бис башкаруныҥ тӧзӧлгӧ-структуразын кезем кубултпас деп шӱӱлтеге келгенис. Ӱзеери, эмди, јылдыҥ учында, биске национальный ӱлекерлерди бӱдӱрген ижистиҥ турулталары аайынча ӱстиги јаҥга јетирӱ эдер керек. Бӱдӱреечи јаҥныҥ ижинде јаан кубулталар эдип баштазабыс, бӱдӱретен ижибиске бу качалаҥын јетирер.

Је башкаруныҥ аппарадыныҥ ижинде кубулталар болор. Кезик министерстволордыҥ ла комитеттердиҥ башкараачылары солынар. Башкаруда иштеген улустыҥ тоозы кӧптӧбӧс.

Бисте Алтай Республиканыҥ ӧзӱминиҥ тӧс јери тӧзӧлӧр. Баштаҥкайлардыҥ тӧс јери болотон бу агентство федерал тӧс јерле иштеер, оныҥ бӱдӱми кандый болорын чокымдайдыс».

Республиканыҥ мынаҥ озо башкарузыныҥ председатели јети ордынчылу болгон. АР-дыҥ башчызы, башкарузыныҥ председатели бу сессияда јӧптӧштирерге беш кижини чыгарган. Јажытту ӱнбериштиҥ турулталары мындый болгон:

АР-дыҥ башкарузыныҥ председателиниҥ баштапкы ордынчызыныҥ јамызына адалган Виталий Махаловты бу јамыга тургузары учун јӧмӧгӧн ӱнин 21 депутат берген, 16 кижи удура болгон, 4 бюллетень ӱрелген деп чоттолгон.

АР-дыҥ башкарузыныҥ председателиниҥ баштапкы ордынчызыныҥ јамызына адалган Алексей Тюхтеневти 38 депутат јӧмӧгӧн, удура эки кижи болгон ло 4 бюллетень ӱрелген деп чоттолгон.

АР-дыҥ башкарузыныҥ председателиниҥ ордынчызыныҥ, АР-дыҥ башчызыныҥ ла башкарузыныҥ Бирлик аппарадыныҥ јааныныҥ јамызына адалган Анатолий Донской учун 14 депутат ӱнин берген, 24 кижи удура болгон, ӱрелген бюллетеньдер – 3. (Јамыга тургузарга Эл Курултайдыҥ депутаттарыныҥ јӧмӧгӧн 21 ӱни керек. Бу кире ӱнди албаган кижи «ӧтпӧгӧн» деп чоттолот).

АР-дыҥ башкарузыныҥ председателиниҥ ордынчызыныҥ, АР-дыҥ акча-манат аайынча министриниҥ јамызына адалган Ольга Завьялованы 30 депутат јӧмӧгӧн, удура 8 кижи болгон, ӱрелген бюллетеньдер –3.

АР-дыҥ башкарузыныҥ председателиниҥ ордынчызыныҥ, Алтай Республиканыҥ Москва калада чыдулалган кижизиниҥ јамызына адалган Ирина Лозоваяны 32 депутат јӧмӧгӧн, 4 кижи удура болгон, ӱрелген бюллетеньдер – 5.

Сессияда анайда ок Алтай Республиканыҥ Шиҥжӱ-чоттоор палатазынаҥ јаанын тудар сурак кӧрӱлген. Бу јамыга палатаныҥ эмдиги башкараачызы Артем Сумачаковтыҥ ла Эл Курултайдыҥ мынаҥ озо болгон тудуузында парламенттиҥ јонјӱрӱмдик корулаш ла эл-јонныҥ су-кадыгын корыыры аайынча комитединиҥ јааны болгон Наталья Никитенконыҥ ады-јолы адалган.

Јажытту ӱнбериште бу эки кижиниҥ бирӱзи де јамыга тудуларга керектӱ јӧмӧгӧн ӱнди (21 ле оноҥ кӧп) албаган: Артем Сумачаков учун 13, Наталья Никитенко учун 12 депутат ӱнин берген. 16 бюллетень ӱрелген деп чоттолгон.

Јасак аайынча, бу эки кижиниҥ ады-јолы катап адалып, экинчи ӱнберишке чыгарылар аргалу. Адалган улус кӱӱнзебезе эмезе ойтодоҥ ӱнбериште керектӱ јӧмӧгӧн ӱндерди алып болбозо, бу јамыга ӧскӧ кандидаттар адалып јат.

АР-дыҥ Шиҥжӱ-чоттоор палатазыныҥ башкараачызын келер беш јылга тудар сурак јаҥар айда ӧдӧтӧн сессияга кӧчӱрилген.

С. КЫДЫЕВА

ТОП

Положение о фотоконкурсе «Бир фотојуруктыҥ тӱӱкизи»

УТВЕРЖДАЮ Приказом главного редактора АУ РА «Редакция газеты «Алтайдыҥ Чолмоны» от 02.02.2026 № 3 Триянова С В. _________________ Положение о фотоконкурсе «Бир фотојуруктыҥ тӱӱкизи» («История одной фотографии»), посвященном 35-летию Республики Алтай, 270-летию вхождения алтайского народа в состав Российской империи Общие положения 1.1. Настоящее положение о проведении фотоконкурса «Бир фотојуруктыҥ тӱӱкизи» («История одной фотографии») (далее —

Положение Конкурса на Стипендию имени заслуженного журналиста Республики Алтай Галины Тюгай

УТВЕРЖДАЮ Приказом главного редактора АУ РА «Редакция газеты «Алтайдыҥ Чолмоны» от _____________ № Триянова С В. Положение Конкурса на Стипендию имени заслуженного журналиста Республики Алтай Галины ТЮГАЙ Объявлен Конкурс на Стипендию имени заслуженного журналиста Республики Алтай Галины Тюгай. Организатор: редакция республиканской газеты «Алтайдыҥ Чолмоны» (далее Редакция). К участию приглашаются обучающиеся 4-11 классов общеобразовательных школ Республики Алтай.

Эл Курултайдыҥ эҥ артык jосокчылар талдаарына jарлаган конкурсына туружары башталды

Парламенттиҥ сыйы учун мӧрӧй республиканыҥ ӱредӱлигине jаан камаанын jетирген школдоҥ озогы, ӱзеери, текши ле профессионал бӱдӱмдерлӱ учреждениелердиҥ ӱредӱчилери ортодо ӧдӧр. Эл Курултайдыҥ спикери Эжер Ялбаковтыҥ jартаганыла, быjыл берилетен сыйдыҥ кеми 100 муҥ салковой ло лаураттардыҥ тоозы экидеҥ тӧрткӧ кӧдӱрилген. Бу конкурс jаҥыс ла сый учун, акча учун jарлалбаган, конкурстыҥ jеҥӱчилдериле туружаачылары jосокту ижиле jашӧскӱримди ӱредеринде