Тергеебисте баштапкызы

06.12.2019

Кече Горно-Алтайскта Јондык баштаҥкайларды јӧмӧӧр баштапкы ресурсный тӧс јердиҥ кӧдӱриҥилӱ ачылтазы ӧткӧн.

Оныҥ ачылтазында АР-дыҥ башкарузыныҥ пред-седателиниҥ баштапкы ордынчызы Алексей Тюхтенев, АР-дыҥ Эл Курултайыныҥ комитединиҥ јааны Наталья Екеева ла Горно-Алтайск каланыҥ администрациязыныҥ јааны Ольга Сафронова турушкан.

Алексей Тюхтенев бойыныҥ уткуулду сӧзинде јаҥар айдыҥ 5-чи кӱнинде Доброволецтиҥ телекейлик кӱни темдектелип турганы керегинде айткан.

—Јондык баштаҥкайлар кӧп болуп јат, је олордоҥ јӱрӱмде бӱдӱп тургандары ас. Онызы акча-манатла канайда јӧмӧлип турганынаҥ камаанду. Јондык баштаҥкайларды јӧмӧӧр ресурсный тӧс јерди ачарында каланыҥ администрациязыныҥ, јондык биригӱлердиҥ камааны јаан…

Добровольческий кыймыгу Россияныҥ текши ӧзӱмине камаанын јетирип турганын орооныстыҥ президенти В. В. Путин айткан. Оныҥ учун јаҥныҥ бастыра органдары, јурт јеезелердеҥ ала федерал органдарга јетире, мындый кыймыгуларды јӧмӧӧр учурлу. Мындый тӧс јерди јӱк ле ачып салатаны ол ас, анайда ок јарамыкту, турулталу ла тузалу ишти тӧзӧӧр керек – деп, Алексей Степанович айткан.

Наталья Екеева тергеебисте мындый тӧс јер ачар деген шӱӱлте баштапкы катап 2018 јылдыҥ кочкор айында Горно-Алтайск каланыҥ 2-чи гражданский форумы ӧдӧр тушта айдылганын темдектеген. Бу ууламјы аайынча иш ӧткӱрилген болгон ло адакыда андый тӧс јер ачылган деген.

Ольга Сафронова база уткуулду сӧзин айдып, Јондык баштаҥкайларды јӧмӧӧр ресурсный тӧс јердиҥ башкараачызы Вадим Фефеловко тураныҥ кереес тӱлкӱӱрин табыштырган.

Ады-јолдоры ӧрӧ адалган јамылулар ачылтаныҥ лентазын кескен соҥында, јуулган улус Тӧс јерге кирип, андагы айалгала танышкан. Анда конференц-зал, иштеер кыптар ла коворкинг-кып бар эмтир. Бу тӧс јердиҥ специалисттери јондык биригӱлерге јетирӱлик, тӧзӧмӧл јӧмӧлтӧлӧр јетирер.

Бу тӧс јер АР-дыҥ башчызы Олег Хорохординниҥ јӧмӧлтӧзиниҥ, Горно-Алтайск каланыҥ администрациязыныҥ ла «Гражданский јондыктыҥ ӧзӱминиҥ «Интего» деп тӧс јери» деген тергеелик јондык организацияныҥ ӧмӧ-јӧмӧ ижиниҥ шылтузында ачылган. Бу ӱлекер Президенттиҥ гранттарыныҥ фондынаҥ акча-манатла јӧмӧлтӧ алган.

Эм тургуза Јондык баштаҥкайларды јӧмӧӧр баштапкы ресурсный тӧс јердиҥ туразында тогус јондык организацияга кыптар берилген. Олордыҥ тоозында «Јеҥӱниҥ волонтерлоры» деп бастырароссиялык јондык организацияныҥ тергеелик бӧлӱги, АР-дыҥ јеҥил атлетика аайынча федерациязы, албаты эдимдериниҥ «Алтай кийис» деп ассоциациязы, Горно-Алтайсктыҥ казактарыныҥ јондыгы, «Алтай албатыныҥ конгрези» деп тергеелик јондык организация, ас тоолу тургун куманды албатыныҥ Горно-Алтайскта јербойыныҥ јондык биригӱзи, «Шор калык» деп тергеелик јондык организация, кенек балдарга ла олордыҥ ада-энелерине болуш јетирер «Кожо» деп тӧс јер.

Алтай Республикада јондык биригӱлердиҥ тоозы јылдаҥ јылга кӧптӧйт. Анайда ок волонтерский кыймыгу база ӧзӱм алынат. Оныҥ да учун мындый тӧс јер ачары ол ӧйдиҥ некелтези деп айдарга јараар. Мында јондык биригӱлер республиканыҥ ӧзӱмине керектӱ иштерин быжу тӧзӧӧрине иженери артат.

К. ЯШЕВ

Е. БУТУШЕВТИҤ фотојуругы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина