Биске амыр-энчӱ сыйлаган геройлорго мак!

14.05.2020

Ӧйдиҥ ӧдӱжи кайра јандырылбас — Ада-Тӧрӧл учун Улу јууда јуулашкан ветерандарыстыҥ тоозы јылдыҥ ла астап јат.

Быјылгы 9 Майдыҥ байрамына COVID-19-тыҥ эпидемиязы киришти, оныҥ учун байрам пландалганынаҥ чек башка ӧтти. Је андый да болзо, самоизоляцияныҥ ла кирелендириштердиҥ ӧйинде кажы ла кижи кандый бир эп-арганы тузаланып, Улу байрамысла колбулу акцияларда турушкан.

Кан-Оозы аймак ончо акцияларда («Јеҥӱниҥ кӧзнӧктӧри», «Эземниҥ сады», «Ӱргӱлјик полк-онлайн» ла о. ӧ.) эрчимдӱ туружып, бу кӱнди кӧдӱриҥилӱ ӧткӱрген. Ӱлгерлердиҥ аймактыҥ администрациязы тӧзӧгӧн «Бис ундыбаганыс, бис оморкойдыс!» деген акциязында јаанду-јаштулар эрчимдӱ турушкан. Олордыҥ Ада-Тӧрӧл учун Улу јуу керегинде кычырган ӱлгерлери јондык сетьтерде јарлалган.

Кан-Оозыныҥ культуразыныҥ ишчилери концерттӱ онлайн-программа белетеген. Кӱӱнзеген ончо јерлештер јуучыл кожоҥдорды онойдо ок ВКонтакте ле Инстаграм јондык сетьтерде кӧрӧр аргалу болгон.

Улу Јеҥӱниҥ онлайн-байрамы «Јеҥӱниҥ фонариги» деген акцияла тӱгенди: ол аайынча улус 22 саатта светтерди ӧчӱрип, айылдарыныҥ кӧзнӧгине фонарик, ӱспекчи эмезе телефонын кӱйдӱрип салган.

Кан-Оозында Улу Јеҥӱниҥ байрамы Јеҥӱниҥ паркында јууда јеҥ јастанган јуучылдардыҥ кереезине чечектер салганынаҥ башталды. Ондо аймактыҥ јааны Э. Ялбаков, депутаттардыҥ Совединиҥ председатели Э. Мекечинов, АР-дыҥ Эл Курултайыныҥ депутаттары Г. Пильтин ле А. Ябыева, ӧскӧ дӧ улус турушкан. Оноҥ арыгы кӧдӱриҥи Моты-Бажында јууныҥ ветераны Семен Павлович Матинниҥ ле Кӧмӱр-Оозында Иван Сафронович Шмаковтыҥ айылдарыныҥ јанында ӧтти.

Россияныҥ ФСБ-зыныҥ Кӧксуу-Оозындагы пограничный башкартузыныҥ ишчилери ветерандарды тоогонын керелеп, Јеҥӱниҥ маанызын тудунып, олор јаткан оромдорды кечире кӧдӱриҥилӱ маршла ӧткӧн.

Аймактыҥ јааны Эжер Ялбаков ветерандарды уткуп, олорго Јеҥӱ учун јаан быйанын айдып, су-кадык јӱрзин, кӧп-кӧп јаш јажазын, олордыҥ билелерине амыр-энчӱ ле ырыс-кежик кӱӱнзеди. Оны ончо јуулгандар јӧмӧшти, ветерандарга сыйлар, чечектер табыштырылды. Уткуулду куучындарда Туулу Алтайдыҥ 26 геройы ортодо бежӱзи Кан-Оозы аймактаҥ болгоныла јерлештер оморкоп турганы кӧп катап айдылды.

Аймактыҥ јурттарында јуучыл кереестерге база чечектер салылды.

Биске амыр-энчӱ јӱрӱм, айас теҥери сыйлаган ветерандарысты эмдиги ӱйе јаҥыс ла байрамдык кӱнде эмес, јаантайын эзедип, тооп јӱрер учурлу. Бистиҥ албаты фашизмди јеҥгени бӱдӱн телекейге јаан учурлу.

Јеҥӱниҥ 75 јылдыгыныҥ кӱни санаабыста јаантайынга артып калар. Быјылгы байрам башка аайыла, ондо јаҥжыккан Ӱргӱлјик полк, кӧдӱриҥилӱ парад, А. Калкинниҥ адыла адалган библиотеканыҥ ишчилери белетеп турган јалаҥдагы кухня јок болгон. Аймактыҥ эл-јоны айылдарында артсын деген некелтени бӱдӱрип, Јеҥӱниҥ парктарында јуулбаган. Је андый да болзо, албаты онлайн режим аайыла биригип, эп-аргалар табып, бу Улу байрамды тӱҥей ле бийик кеминде ӧткӱрген! Јуу ӧйлӧриниҥ јӱрекке томулар ӱлгерлери, кожоҥдоры, јуучылдарыстыҥ салымы керегинде кӧп-кӧп куучындар, кӧзнӧктӧристе турналар, кӱӱлелер, ветерандарыстыҥ фотојуруктары Јеҥӱниҥ кӱнин јарандырды. Јерлештеристиҥ нерези качан да ундылбас, олордыҥ магы качан да ӧчпӧс!

«Кан-Чарас» газеттеҥ

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина