Участокторго — термометрлер ле металлодетекторлор

18.06.2020

Алтай Республиканыҥ башчызы Олег Хорохордин Россия Федерацияныҥ Конституциязына кубулталар кийдирери аайынча ӧдӧтӧн текшироссиялык ӱнберишке белетенери аайынча јуунды кичӱ изӱ айдыҥ 15-чи кӱнинде ӧткӱрген.

Бу јуунныҥ ижинде видеокӧрӱ ажыра тергеениҥ госјаҥдарыныҥ ла Талдаштар ӧткӱрер камызыныҥ башкараачылары, муниципал тӧзӧлмӧлӧрдиҥ јаандары турушкандар. Башчы: «Бис текшироссиялык ӱнбериш ӧткӱрер кампанияга белетенер иштерди тӱгезерге једе бергенис. Ӱнбериш бистиҥ республиканыҥ ыраакта турган јурттарында дезе бир эмеш эрте, кичӱ изӱ айдыҥ 18-чи кӱнинде башталар» — деп айткан.

Талдаштар ӧткӱрер Тӧс камыстыҥ јӧбиле ӱнбериш Кош-Агаш аймакта Белтир ле Аркыт, Улаган аймакта Беле јурттарда кичӱ изӱ айдыҥ 18-25 кӱндеринде ӧдӧр. Бу јерлерде Россия Федерацияныҥ Конституциязына кубулталар кийдирери јанынаҥ бойлорыныҥ ӱндерин 400-ке шыдар кижи берер. Бу ла ӧйдӧ ӱндерин озолондыра службазын Кош-Агаш, Улаган ла Кӧксуу-Оозы аймактарда ӧдӱп турган пограничниктер, кедери турлуларда јайлаган малчылар ла кордондордо иштеген егерьлер база берер. Олодыҥ тоозы 900 кижиге једип јат.

Ӧрӧлӧй адалган аймактардыҥ јаандары ӧйинеҥ озо ӧдӧтӧн ӱнберишке олор белен болгондорын угускан. Бу муниципал тӧзӧлмӧлӧрдӧ белетеништӱ иштер тӱгенген, талдаачы камыстардыҥ турчылары кӧстӧлгӧн ло олорго кӧлӱктер чыгарылган. Алтай Республиканыҥ талдаштар ӧткӱрер камызыныҥ председатели Дмитрий Степанов текшироссиялык ӱнберишке белетенер иш олордо канайда ӧдӱп турганы керегинде јетирӱ эткен.

Тергеениҥ талдаштар ӧткӱрер камызыныҥ јааны тургуза ӧйдӧ участокторго таҥынаҥ коруланарыныҥ эдимдери — маскалар, перчаткалар, јӱске кийер экрандар ла дезинфекция ӧткӱрер эдимдер јетирилип јат деп айткан. Мынаҥ ӧскӧ Алтай Республика ӱнберишке келген улустыҥ температуразын кемјӱлеп кӧрӧр бесконтактный дейтен 235 приборло јеткилделген. Участоктор ӱнбериш ӧйинде анайда ок металлодетекторлорло база јеткилделер.

Тургуза ӧйдӧ тергеелик ле участковый талдаачы участоктордыҥ турчылары коронавируска тест ӧдӱп јадылар. Тестти талдаштар ӧткӱрер камыстардыҥ 1,5 муҥ турчызы ла 1,4 муҥ ширтеечи ӧдӧри темдектелген. Јаан јашту ла су-кадыгы уйан улус ӱндерин айылдарында берер аргалу. Андый улусты участокторго јетирери ле ойто кайра тартып апарары база темдектелген. Олорго јаҥыс бу јанынаҥ эртедеҥ угузу-бичик бичиир керек.

Алтай Республиканыҥ эл-јоны ӱнин кандый участокко келип беретенин бойлорыныҥ кӱӱниле талдап алар аргалу. Госјеткилдештиҥ сайтында бу јанынаҥ угузу-бичиктерди алары башталып калган. Угузу-бичикти берерге сайттыҥ тӧс бӱгинде «Конституцияга кубулталар кийдирери аайынча ӱнбериш» деген ӱзеери коштончыга кирер керек. Ого киреле, «Эптӱ участокты талдап алар» деген бӧлӱкти ачып, «Јеткилдешке кӧчӧр» деген бичимелге јапазар керек. Мындый угузу-бичикти 2020 јылдыҥ кичӱ изӱ айыныҥ 21-чи кӱнинеҥ ӧтпӧй туруп, Москваныҥ ӧйиле 14 саатка јетире берер керек.

Ороонныҥ Конституциязына кубулталар кийдирери јанынаҥ текшироссиялык ӱнбериш коронавирустыҥ пандемиязыныҥ ӧйине келижип турганы учун ого јаан ајару эдилет. Роспотребшиҥжӱниҥ тергеелик башкартузыныҥ јааны, республиканыҥ баш санитар врачы Леонид Щучинов бистиҥ тергееде эпидемиологиялык айалгалар ол ло курч бойы артып јат деген. «Су-кадыкты чеберлеп аларга айылда отурарын токтотпос, кӧп улус јуулган јерде масканы ла перчаткаларды кыйалтазы јогынаҥ кийер, бой-бойы ортодо социальный дистанцияны тударын ундыбас керек» — деп, ол айткан.

Олег Хорохордин јуунныҥ ижин јабып, ӱнбериш кандый да салтар јогынаҥ тӧзӧмӧлдӱ айалгаларда ӧдӧр учурлу деп ајарган. Ол анайда ок участоктордо дезинфекция ӧткӱрерин кыйалтазы јогынаҥ бӱдӱрерине ле айылдарында карантинде отурган улуска ӱнбериште туружар толо аргалар берерин јеткилдеерине туура салбас ајару эдер керек деп айткан. Ол муниципал тӧзӧлмӧлӧрдиҥ јаандарын санитар ла эпидемиологиялык некелтелерди толо бӱдӱрзин деп сураган.

Башчы: «Республикада элбек эл-јон турушкан керек-јарактарды ӧткӱрерин бӱгӱнги кӱнге јетире кем де токтотпогон. Коронавирусла југушталган улус калганчы кӱндерде анчада ла Кош-Агаш аймакта кӧптӧп јат. Улус айылдарында отуратан, маска ла перчаткалар кийетен ээжилерди бузуп, јаткан јурттарында байрамдар ӧткӱрип, бой-бойлорынаҥ југушталат. Мындый баш билиништерди кезем токтодор керек» – деген.

КЫЧЫРААЧЫЛАРДЫҤ АЈАРУЗЫНА! АЙЫЛДАРДА ОТУРАТАНЫ, КЫЙАЛТАЗЫ ЈОГЫНАҤ МАСКА КИЙЕТЕНИ АҤЫЛУ ЈАКААН ЧЫККАНЧА ТОКТОДЫЛБАС!

Тергееде турбазалардыҥ, санаторийлердиҥ, амыраар туралардыҥ (медлицензиялу объекттердеҥ ӧскӧлӧри) ижи кичӱ изӱ айдыҥ 22-чи кӱнине јетире токтодылган.

Ӧскӧ тергеелер, коштой турган аймактар ла јурттар јаар јол-јорыкка барарын токтодор, бастыра бӱдӱм кӧлӱктерде, ол тоодо таксилерде, аптекаларда, магазиндерде, автовокзалдарда, аэропорттордо, бастыра бӱдӱм кӧлӱктердиҥ токтодуларында, улус јуулган јерлерде ле јаҥныҥ органдары иштеп турган јерлерде таҥынаҥ коруланар эдимдерди тузаланарын улалтар керек.

Алтай Республиканыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина