Детсадты тударын тӱргендетсин деген

30.06.2020

Алтай Республиканыҥ башчызы Олег Хорохордин Турачак аймакла ишмекчи јол-јорыкта бололо, Бийка јуртта балдардыҥ садын тудары канайда ӧдӱп турганын шиҥдеп кӧргӧн.

Детсадтыҥ туразын тузаланарына ӧдӱп јаткан јылдыҥ учы кирезинде табыштырар керек. Је тургуза ӧйдӧ объектте јӱк ле јердиҥ ле фундаменттиҥ иштери тӱгенген, баштапкы этажтыҥ стенелерин салары башталган. Мындый айалга тудум иштер пландалганынаҥ эки айга соҥдоп турганын керелейт.

Тергеениҥ башкараачызы јербойында болордо, тудум иштер ӧдӱп турган јерде иштеп турган улустыҥ тоозы ас болгоны, тудум иштер токтодылып калганы јарталган. Олег Хорохординниҥ темдектегениле, национальный ӱлекерлерди мындый тебӱле бӱдӱрерге јарабас.

«Объект керектӱ акча-манатла јеткилделген. Подрядчик ижин эрчимделтпезе, график аайынча иштебезе, бис пенялар ла штрафтар саларынаҥ башка кезедӱлерге кӧчӧр аргалу — керек дезе подрядный организацияны солыырына јетире» — деп, тергеениҥ башчызы айткан.

Ол иштиҥ графигинеҥ соҥдошты јоголторын ла тудум иштерди ӧйинде, ӱлекердиҥ бастыра некелтелери аайынча бӱдӱрерин некеген. Тергеениҥ башкараачызы тергеелик ӧзӱм, ӱредӱ ле билим аайынча республикан министерстволорго, анайда ок Турачак аймактыҥ администрациязына детсадтыҥ туразын тудар ишти шиҥжӱде тударын тыҥытсын, иш канай ӧдӱп турганын кажы ла неделе сайын фотофиксация ажыра шиҥдезин ле иштер канай ӧдӱп турганы керегинде толо кеминде отчет-докладтар этсин деп јакылта берген.

Бийка јуртта 60 бала јӱргедий детсадтыҥ туразы «Демография» деген нацӱлекер аайынча тудулат. Мындагы јерлердиҥ јирмези эки айдаҥ ала ӱч јашка јетире балдарга ла 15 јер белетештиҥ группазыныҥ балдарына берилер деп темдектелген.

Детсадты тудар иштердиҥ подрядчиги – «Элкапстрой» компания. Оныҥ башкараачызы Александр Базинге бу јуукта бюджеттиҥ 10 миллион салковой акчазын мензингени керегинде уголовный керек ачылган.

Анайда ок республиканыҥ башкараачызы аймактыҥ јериндеги соцобъекттерди шиҥдеп кӧргӧн. Дмитриевка јурттыҥ школыныҥ туразын, Турачакта детсадтыҥ тудулып јаткан туразын шиҥдеп кӧргӧн. Артыбаш ла Иогач јурттарда «Россия Федерацияныҥ граждандарын јакшынак тураларла, коммунальный јеткилдештерле јеткилдеер» деген госпрограмма аайынча сууӧткӱшти ле канализацияны тудары кандый кеминде ӧдӱп турганын шиҥдеген, јолдорды нацӱлекер аайынча тудар иштиҥ аайын кӧргӧн. Башчыныҥ темдектегениле, бу эки јуртта эл-јонныҥ толо кеминде јадын-јӱрӱмине, туробъекттердиҥ ижине сууӧткӱш ле канализация сӱрекей керектӱ.

Дмитриевка јуртта школдыҥ туразы 1978 јылда тудулган, тургуза ӧйдӧ ол аварийный айалгада. Мында капремонт ӧткӱрилбеген болгон, јӱк ле спортзалды 2015 јылда јазагандар. Балдарды ӱредери келиштирте јазалган јерде ӧткӧн болгон — интернаттыҥ туразында, оны база јазаар керек. Школдо 115 бала ӱренет.

«Бу школды текшилей јазаары јанынаҥ јӧп јарадылган, јуук ӧйдӧ ӱлекер-сметный документацияны белетеерин баштаарыс» — деп, Олег Хорохордин айткан.

Турачакта дезе ол балдардыҥ садигинде болгон. Бу объект «Демография» деген нацӱлекер аайынча тудулат. Тургуза ӧйдӧ фундамент урар ла стенелер салар иш тӱгенген, јабынты эдер ле штукатурный иштер арткан. Строительство озолондыра тургузылган график аайынча ӧдӧт. Олег Хорохордин бу детсад 100 бала јӱрер јерлӱ болор деп айткан, ол јерлердеҥ 40 јер — ясляныҥ балдарына. Объектти тузаланарына ӧдӱп јаткан јылдыҥ кӱзинде табыштырары темдектелген.

Тергеениҥ башчызы Бийск – Турачак – Верх-Бийск деген автомобильный јолдо тудум ишти шиҥдеп кӧргӧн. Мында Турачак ла Дмитриевка јурттар ортодо бӧлӱк јол јазалып турган. Ол иштер «Јеткер јок ло чыҥдый јолдор» деген национальный ӱлекер аайынча ӧдӧт. Быјыл мында узуны 17,6 километр автојолды јазап салары темдектелген.

«Мынаҥ озо ӧйдӧ мында јер јол болгон. Оныҥ да учун эл-јон јолды јазап берзин деп, кӧп катап баштанып туратан. Бӱгӱн мында иштер канай ӧдӱп турганын кӧрдим. Подрядчиктиҥ айтканыла, тудум иштер графиктеҥ соҥдобос. Аҥылу ајаруны бӱдӱрип турган иштиҥ чыҥдыйы кандый болгонына этсин деп јакылта бергем» — деп, башчы айткан.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина