Эл театр эжигин јаҥы ойынла ачты

04.02.2021

Баш режиссер Эмма Иришеваныҥ Жан-Батист Мольердиҥ «Лекарь поневоле» деген пьесазы аайынча орус ла алтай тилдерле тургускан «Эрик јоктыҥ эмчизи» деген ойын-кӧргӱзӱни Павел Кучияктыҥ адыла адалган эл театр кирген јылдыҥ чаган айыныҥ 30-чы кӱнинде кӧрӧӧчилерге кӧргӱсти.

Солун ойын-кӧргӱзӱни алтай тилге Алтай Республиканыҥ культуразыныҥ нерелӱ ишчизи, поэт, актер Качканак (Николай) Багыров кӧчӱрген.

Кокыр-каткылу ойын-кӧргӱзӱниҥ тӧс шӱӱлтези — эмеен-ӧбӧӧн улус билезинде эки бойы ортодо тар-мар тартыжып та турза, је бой-бойына карузыганы, тартылганы деп айдарга јараар. Учы-тӱбинде биледе ӧткӧн ээчиде чугаанныҥ кийнинеҥ Мартино (АР-дыҥ нерелӱ артисти Ирина Майманова) ӧбӧӧни Сганарельдеҥ (ойынныҥ тӧс сӱр-кеберин РФ-тыҥ нерелӱ артисти Александр Майманов ойногон) ӧскӧ улус ажыра ӧчин алат.

«Эрик јоктыҥ эмчизи» деген ойын-кӧргӱзӱде онойдо ок АР-дыҥ нерелӱ артисттери Аржан Товаров ло Вера Сумачакова, артисттер Игорь Тазранов, Ашина Торломоев, Вадим Деев, Алина Попошева, Айдыҥ Бадыкин, Карчага Елеков, Айдар Унатов ойнодылар.

Ойын-кӧргӱзӱниҥ кийнинеҥ АР-дыҥ культура аайынча министерствозыныҥ ишчизи Сырга Садрашева јайаан ӧмӧликти једимдӱ ижиле уткуды. Ол онойдо ок ады-јолы элбеде јарлу јайаан јайалталу актриса Ирина Майманованы юбилейлик јажыла уткуп, јаҥы јаан једимдер кӱӱнзеди. Јайаандык эҥирде Ирина Майманованы чыккан кӱниле Эл театрдыҥ директоры Светлана Пешперова, баш режиссер Эмма Иришева, СТД-ныҥ талалык бӧлӱгиниҥ председатели Светлана Тарбанакова, Кан-Оозы аймактыҥ культура ла спорт аайынча бӧлӱгиниҥ јааны Александра Кокушева, кожоҥчы Јергелей Маташева ла ӧскӧлӧри де уткудылар.

Эл театр «Эрик јоктыҥ эмчизи» деген ойын-кӧргӱзӱни ончо санитар-эпидемиологиялык ээжилер аайынча ӧткӱрди. Бу ойын-кӧргӱзӱ кочкор айдыҥ 2-чи кӱнинде орус тилле кӧргӱзилди.

Былтыр бистиҥ тергееде, бастыра ороондо чылап ок, коронавирус оорула колбулу айалга катулана берерде, театрдыҥ ижи удурумга кирелендирилген болгон. Эмди театр ижин бир эмештеҥ кӧндӱктирип баштады.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина