Алтайдын Чолмоны

Тергееге вакцина келери кӧптӧӧр

08.04.2021

Алтай Республиканыҥ башчызы Олег Хорохордин коронавирусту југуш оору јайыларын токтодоры аайынча оперативный штабтыҥ јуунын јуукта ӧткӱрген.

Јуунды ачып тура, ол ӧткӧн неделеде тергееде коронавирусла оорыыры 38% јабызаганын темдектеген. Пандемия башталган ӧйдӧҥ ала республикада бу југуш оорула  16703 кижи оорыган, 16337 кижи јазылган. COVID-19 оорулу божогон улустыҥ тоозы 223 кижи, ол тоодо 201 кижи COVID-19-таҥ, 22 кижи ӧскӧ шылтактардаҥ корогон.

«Тулаан айдыҥ 30-чы кӱнинде 900 доза вакцина келген, кандык айдыҥ 3-чи кӱнинде  — база 5600 доза. Мынайда, Алтай Республика текши тооло эки катап тургузар 16 302 доза вакцина алган.  Оорудаҥ корулаар вакцинаны улуска тургузары  јуук ӧйлӧрдӧ билдирлӱ эрчимделер учурлу»  — деп, Олег Хорохордин темдектеген.

Тургуза ӧйдӧ республикада 10309 кижиге  вакцина тургузылган, олордоҥ 8004 кижи вакцинаны эки катап тургустырган деп, АР-дыҥ башкарузыныҥ председателиниҥ ордынчызыныҥ молјуларын бӱдӱреечи Динара Култуева јетирген. Оныҥ айтканыла, јуук ӧйлӧрдӧ тергееге «Спутник V»  вакцинаныҥ база 2 муҥ дозазы ла «ЭпиВакКорона» вакцинаныҥ 4 муҥга јуук дозазы келер. «Тургуза ӧйдӧ аймактардыҥ тӧс јурттарында вакцинацияныҥ бир пункты иштеп јат, база бирӱзи — Акташ јурттыҥ эмчилигинде ле ӱч пункт Горно-Алтайсктыҥ  поликлиниказында. Каланыҥ иштеер ӧмӧликтеринде вакцинация ӧткӱрерге эки бригада тӧзӧӧри темдектелет» — деп, ол айткан.

Су-кадыкты корыырыныҥ министриниҥ молјуларын бӱдӱреечи Анна Григорянныҥ темдектегениле, коронавирусла оорыган улусты эмдеер ӱч моногоспиталь иштеп јат, олордо бир уунда 210 кижи јадып эмденер аргалу, стационар эмдешти тургуза ӧйдӧ 91 кижи ӧдӧт, моногоспитальдарда орындардыҥ 56,6% јайым.

Ӧткӧн неделеде коронавирусла оорыганы јарталган улустыҥ 50 проценттеҥ кӧбизи Горно-Алтайскка ла Майма аймакка келишкенин тергеениҥ баш санитар врачы Леонид Щучинов айткан. Бу јерлерде улустыҥ оорыырын астатканы текши тергееде айалганы оҥдолтор эди деп, ол ајарган. Пандемия башталардаҥ ала лабораториялык 194 муҥ шиҥжӱлер эдилгенин ол анайда ок јетирген.

АР-дыҥ башкарузыныҥ председателиниҥ ордынчызы, АР-дыҥ башчызыныҥ ла башкарузыныҥ Бирлик аппарадыныҥ јааны Михаил Маргачевтыҥ јуунда айтканыла, ӧткӧн неделеде муниципал тӧзӧлмӧлӧрдиҥ башкартулары југуш оору таркаарын болдыртпас ээжилерди бӱдӱргенин шиҥжӱлеген 524 рейд ӧткӱрген ле олорды бусканы јанынаҥ 84 протокол тургузылган.

Республиканыҥ ӱредӱлик организацияларында санитар-эпидемиологиялык ээжилерди бӱдӱрери база јаантайын шиҥжӱде болгонын АР-дыҥ ӱредӱлик ле билим аайынча министри Ольга Саврасова айткан. Ӱредӱлӱ јыл башталганынаҥ ала 339 рейд ӧткӧн, администрациялык јасакбузуштар керегинде 58 протокол тургузылган. Министрдиҥ јетиргениле, тургуза ӧйдӧ бастыра ӱредӱлик организациялар азыйгы аайынча иштейт.

Турбазалар ла улус амыраар ӧскӧ дӧ јерлер туристтер келер  ӧйгӧ белетенерин баштап ийген деп, тергеениҥ башкараачызы јуунда айткан. Эпидемиялык токыналу айалганы тударга туристтер амыраткан јерлердиҥ башкараачыларына олордо иштеген ончо улусты ла келген айылчыларла колбу тудуп иштегендерди вакциналаар шӱӱлте эдилгенин темдектеген.

Ӧмӧлик иммунитет тӧзӧлгӧнчӧ, бастыра улуска маска кийери некелте болуп артканын јуунныҥ учында Олег Хорохордин ајарган. Тергееге келер вакцинаныҥ кеми кӧптӧӧр, оныҥ учун ӱзеери процедурный кабинеттер ачар аргаларды эртеледе кӧрӧр керек деп, ол ајарган.