Алтайдын Чолмоны

Јербойында бойы башкарынарыныҥ кӱни

26.04.2021

Алтай Республиканыҥ башчызы Олег Хорохордин кандык айдыҥ 23-чи кӱнинде Јербойында бойы башкарынарыныҥ кӱнине учурлалган кӧдӱриҥилӱ јуунда турушкан. Кӧдӱриҥи Горно-Алтайскта П. В. Кучияктыҥ адыла адалган эл театрда ӧткӧн.

Ол президент Владимир Владимирович Путин Россияныҥ башкарузыныҥ ла Алтай Республикада иштеп турган јаҥныҥ органдарыныҥ алдына јонјӱрӱмдик ле экономикалык ӧзӱмди, эл-јонныҥ јадын-јӱрӱминиҥ айалгаларын ичкерледерин јеткилдеер текши јаан иштер тургускан деп темдектеген.

Башчы бу иштерди бӱдӱрерге Алтай Республикада тергеени јонјӱрӱм-экономикалык јанынаҥ ӧскӱрер таҥынаҥ программа, ӧзӱмниҥ «Ийделӱ Алтай» деп программазы, национальный ӱлекерлер ле федерал программалар иштеп јат деп айткан.

«Бис тургузылган иш-амадуларды табынча бӱдӱрип јадыс, је кӧрӱмјилӱ једимдерге јаҥыс ла јербойында бойы башкарынарыныҥ органдарыла јуук колбулар тургузып, ӧмӧ-јӧмӧ иштеген кийнинде једер аргалу. Бӱгӱнги кӱнде ӱредӱликте,  су-кадыкты корыырында, јонјӱрӱмдик болуш јетиреринде, јаткан јерлерди арутап кичееринде, коронавирусла тартыжарында ла ӧскӧ дӧ каруулу керектерде слер айдары јок јаан иш бӱдӱрип јадыгар» — деп, Олег Хорохордин темдектеген.

Ол муниципал служащийлерди, ветерандарды, каланыҥ, аймактардыҥ ла јурттардыҥ депутаттарын, јурттардыҥ старосталарын Јербойында бойы башкарынарыныҥ кӱниле уткуп, бисте шак ла муниципал јаҥ эл-јонго сыраҥай јуук деп темдектеген.

«Слер улусла јаантайын јуук колбуда болуп, олордыҥ ижемјилерин ле курч сурактарын јакшы билеригер, јаантайын јаткан јуртыгардыҥ, аймагардыҥ јилбӱлерин корулап јадыгар, слердиҥ тоомјыгар эл-јон ортодо база бийик. Тегин улустыҥ јадын-јӱрӱмин јарандырар иште јана баспай иштеп турганыгар учун слерге јаан быйан айдадым. Бастырагарга бек су-кадык, тӧрӧл јеригерди макка кӧдӱрип, чылаазыны јогынаҥ иштеп турган ижигерде  једимдер кӱӱнзейдим!» — деп, республиканыҥ башкараачызы кошкон.

Кӧдӱриҥилӱ јуунныҥ туружаачыларына бойыныҥ уткуулду сӧзиле анайда ок Алтай Республиканыҥ Эл Курултайыныҥ председатели Артур Кохоев баштанган. Спикер бистиҥ республиканыҥ эл-јоныныҥ 70 проценти јурт јерде јадып турганын слер јакшы билеригер деп айткан. Оныҥ учун јурт јерлерди ӧскӱрери јаан иштердиҥ бирӱзи болуп јат. «Бистиҥ алдыста турган иштерди једимдӱ бӱдӱрерге, ийде-кӱчтерди бириктирип, ӧмӧ-јӧмӧ иштеер керек. Је бу керекте эҥ јаан јӱк јербойында бойы башкарынатан органдарга келижип јат» — деген.

Артур Кохоев анайда ок быјыл бис Алтай Республиканыҥ тӧзӧлгӧнинеҥ ала 30 ла алтай калыктыҥ Арасей тергееге бойыныҥ кӱӱниле киргениниҥ 265 јылдыктарын темдектеерге белетенип јадырыс деп айткан. Ол бу кӧдӱриҥилӱ керек-јарактар јербойында бойы башкарынарыныҥ органдарыныҥ ишчилери јогынаҥ ӧдӧр аргазы јок, оныҥ учун арга келижип турарда, темдектелген байрамдарда слерди эрчимдӱ турушсын деп сурап турум деген.

Ол государствоныҥ башкараачызы Федерал Јуунга эткен Баштанузында ороонныҥ јонјӱрӱмдик ле экономикалык ӧзӱмине сӱрекей јаан ајару эткен деп айткан. Тургузылган иш-амадуларды бӱдӱрерге, республиканыҥ бир кезек јасактарына кубулталар кийдирер керек. Бисте бу иш башталып калган деп темдектеген.

Кӧдӱриҥиде јуунныҥ туружаачыларына бойыныҥ уткуулду сӧзиле анайда ок  «Алтай Республиканыҥ муниципал тӧзӧлмӧлӧриниҥ совединиҥ» јааны Роман Птицын баштанган. Ол бӱгӱнги кӱнниҥ айалгаларында јербойыныҥ јаҥдарына улустыҥ јадын-јӱрӱминиҥ айалгаларын јарандырарына јаан ла каруулу иштер јоҥдолып јат деген. Јербойыныҥ јурт јеезелериниҥ јаандарына кӱнӱҥ сайын улустыҥ билелериле кӧнӱ иштеерге, олордыҥ курч сурактарыла колбулу иштердиҥ аайына чыгарга келижет. Бу бӧлӱктиҥ ижи-тожын једимдӱ бӱдӱрерге јербойында бойы башкарынарыныҥ органдарыныҥ ишчилерине баштаҥкайлу кӱӱн, эрчимдӱ ле недеҥ де јана баспас кӧрӱм-турум керек, олор бойыныҥ бӱдӱрип јаткан ижиниҥ бийик профессионалдары болор учурлу деп айткан.

Залда отургандарды анайда ок Россия Федерацияныҥ Госдумазыныҥ депутады Родион Букачаков уткуган. Ол оныҥ уткуулду сӧстӧрине анайда ок Госдуманыҥ депутады Иван Белеков, сенаторлор Татьяна Гигель ле Владимир Полетаев јӧмӧжип тургандары керегинде айткан. Родион Букачаков јербойында бойы башкарынарыныҥ органдарында мен бойым бойыныҥ ӧйинде база иштегем деген. Оныҥ учун јурт јеезелердиҥ ишчилериниҥ, аймактардыҥ ла јурт Советтердиҥ депутаттарыныҥ уур-кӱч ижин јакшы билерим деп темдектеген.

Эл театрда ӧткӧн кӧдӱриҥилӱ  јуунда кайралдар база табыштырылган. Бӱдӱрип јаткан керектеринде јеткен бийик једимдери, профессионал ижи, молјолгон ижи-тожын ак-чек бӱдӱрип турганы, государственный органдардыҥ, јербойында бойы башкарынарыныҥ органдарыныҥ ижинде јеткен кӧрӱмјилӱ једимдери учун Чамал аймактыҥ јааны Александр Алисов «За безупречную службу в Республике Алтай» деген темдекле кайралдаткан.

Јербойында бойы башкарынарыныҥ органдарында ак-чек ижи ле јеткен бийик једимдери учун Алтай Республиканыҥ Кӱндӱлӱ грамоталарыла Кош-Агаш аймакта Курайдагы јурт јеезениҥ јааны Анатолий Абулов, Шабалин аймакта Барагаштагы јурт јеезениҥ јааны Александр Такпаков, Турачак аймакта Кебезендеги јурт јеезениҥ администрациязыныҥ специализи Тамара Конюшкина ла Чой аймактыҥ администрациязыныҥ экономика ла  иштеги колбулар аайынча бӧлӱгиниҥ баш специализи Оксана Курчеганова кайралдаткандар.

Башкаруныҥ Кӱндӱлӱ грамоталары анайда ок Горно-Алтайск каланыҥ администрациязыныҥ экономика ла иштеги колбулар аайынча бӧлӱгиниҥ консультанты Елена Макаровага, Кӧксуу-Оозы аймакта Талдудагы јурт јеезениҥ администрациязыныҥ специализи Тамара Пономаревага, Улаган аймактыҥ администрациязыныҥ јажы эр кемине јетпеген балдардыҥ керектери ле тап-эриктери аайынча комиссиязыныҥ баш специализи Геннадий Тадыкинге, Кан-Оозы аймакта Чаргы-Оозындагы јурт јеезениҥ администрациязыныҥ баш бухгалтери Маргарита Тукеновага, Оҥдойдогы јурт јеезениҥ администрациязыныҥ бюджет ле акча-манат аайынча бӧлӱгиниҥ баш специализи Нелли Чичиновага табыштырылган.

Јербойында бойы башкарынарыныҥ органдарыныҥ ижинде јеткен бийик једимдери учун  Майма аймактыҥ јааны Роман Птицынга јербойында бойы башкарынарыныҥ органдарын ӧскӱрериниҥ бастырароссиялык ассоциациязыныҥ Быйаны јарлалган.

Алтай Республиканыҥ Эл Курултайыныҥ председатели Артур Кохоев Кош-Агаш аймакта Тӧбӧлӧрдӧги јурт јеезениҥ јааны Арнабек Абдыкайровко, Чамал аймакта Ӱзнезидеги јурт јеезениҥ администрациязыныҥ экинчи разрядту специализи Наталья Березовскаяга, Улаган аймакта Саратандагы јурт јеезениҥ администрациязыныҥ баш бухгалтери  Ай-Сулу Бойдоевага, Шабалин аймакта Беш-Ӧзӧктӧги јурт јеезениҥ јааны Мерген Быкинге, Кан-Оозы аймакта Кӧзӱлдеги јурт јеезениҥ администрациязыныҥ баш специализи Чейне Модоровага, Майма аймактыҥ администрациязыныҥ юридический бӧлӱгиниҥ јааны Елена Орловага, Турачак аймактыҥ администрациязыныҥ акча-јӧӧжӧ аайынча бӧлӱгиниҥ јааныныҥ бюджет јанынаҥ ордынчызы Елена Сусловага, Оҥдой јурттыҥ јурт јеезезиниҥ администрациязыныҥ баш бухгалтери Людмила Типикинага, Улаган аймакта Чибиттеги јурт јеезениҥ администрациязыныҥ специализи Аржана Тахановага, Кӧксуу-Оозы аймакта Чендектеги јурт јеезениҥ администрациязыныҥ баш бухгалтери Татьяна Усольцевага,  Чой аймакта Ӱстиги-Пьянководогы јурт јеезениҥ јааныныҥ молјуларын удурумга бӱдӱрип турган Светлана Ширяевага, Горно-Алтайск каланыҥ депутаттарыныҥ Совединиҥ депутады, кадеттердиҥ 4-чи таҥмалу школыныҥ директорыныҥ јуучыл-таскаду иш аайынча ордынчызы Сергей Якуткого Эл Курултайдыҥ Кӱндӱлӱ грамоталарын табыштырган.

Јербойында бойы башкарынарыныҥ кӧдӱриҥилӱ јуунында Алтай Республиканыҥ государственный филармониязыныҥ артизи Галина Толкочекованыҥ кожоҥы, кайчылардыҥ «Алтай Кай» ансамблиниҥ ойыны, Гюзель Аугомбаеваныҥ кожоҥы, хореографияныҥ албатылык ансамбальдары «Радуганыҥ», «Урсулдыҥ», орус албатыныҥ кожоҥыныҥ «Забава» деп албатылык ансамблиниҥ, «Гарни Жiнки» албаты ансамбльдыҥ, казак кожоҥныҥ балдардыҥ «Любо» ансамблиниҥ, албаты кожоҥдордыҥ «Славица» ансамблиниҥ, казак кожоҥдордыҥ балдардыҥ «Задоринка» ансамблиниҥ туружаачыларыныҥ, Антон Абросимовтыҥ, Мира Амированыҥ, Јергелей  Санинаныҥ ла Алаш Топчинниҥ ойын-бијелери јаҥыланган.

П. КАБАР

Е. БУТУШЕВТИҤ фотојуруктары