Алтайдын Чолмоны

Јалтанбас геройлорло оморкойдыс

22.12.2021

РФ-тыҥ Федерал Јууныныҥ Федерация Совединиҥ «Јалтанбазы учун» деп кереес медальдарыла бистиҥ јерлештеристи кайралдаары јаҥар айдыҥ 17-чи кӱнинде республикан башкаруда ӧткӧн.

Кайралдаткан улустыҥ тоозында — каладагы И.З. Шуклинниҥ адыла адалган алтынчы таҥмалу лицейдиҥ ӱренчиги Тимур Мухтасыров ло Кан-Оозы аймакта Экинур јурттыҥ школыныҥ ӱренчиги Арслан Унутов. Кӧдӱриҥиде Алтай Республиканыҥ башчызы Олег Хорохордин, РФ-тыҥ Федерация Совединиҥ Алтай Республикадаҥ сенаторы Владимир Полетаев, «Кан-Оозы аймак» муниципал тӧзӧлмӧниҥ јааны Рустам Кокушев, АР-дыҥ ӱредӱ ле билим аайынча министри Ольга Саврасова, Россия Федерацияныҥ Геройы, РФ-тыҥ Президентиниҥ башкартузыныҥ јондык ӱлекерлер аайынча референти Алексей Романов, Россия Федерацияныҥ Геройы, Россияныҥ Јуучыл-ийдезиниҥ майоры Вадим Савчук, Россияныҥ МЧС-ыныҥ бистиҥ тергеедеги баш башкартузыныҥ јааны Андрей Бурлаков, Афганистанныҥ јуучыл-ветерандарыныҥ биригӱзиниҥ турчылары туруштылар.
– Јалтанбас кылык-јаҥду ла кижиниҥ јӱрӱмин аргадаган балдарды «Герой-балдар» деген текшироссиялык граждан-патриотикалык ӱлекер аайынча уткууры сегизинчи јыл улалат. Сакыбаган јанынаҥ айалгада кижиниҥ јӱрӱмин аргадаары јеҥил эмес. Кижи бойын тудунып, кандый кеминде болуш јетирер аргалузы бу айалгада јаан учурлу керек. Јалтанбас керекте кижиниҥ јажы бир де кӧрӱлбей јат. Кайралдарды ээлерине табыштырып, герой-балдардыҥ колдорынаҥ тудуп, быйанду сӧстӧр айдарга меге јаан тоомјы ла кӱндӱӱ – деп, сенатор Владимир Полетаев айтты.
Ӧткӧн јылда Мухтасыровтордыҥ туразы отко алдырып, кӱйӱп јадарда, Тимур бойыныҥ оогош карындаштарын турадаҥ чыгарган. «Мен ышты кӧрӱп ийеле, отты бойым ӧчӱрерге чырмайгам. Колго не тудулар — оныла ла ӧчӱргем. Је качан от јаанап, мениҥ кӱчим јетпезин билип ийеримде, карындаштарыма тӱрген тышкары чыксын деп јакаргам. Оноҥ мен 911 службага телефон согуп, болушка кычыргам. Телефон ажыра нени эдери аайынча јакылталар берилген. Мен бойымды колго тудунып, ол јакылталарды бӱдӱрерге чырмайгам» – деп, Тимур куучындады.
Ӧткӧн јылдыҥ кичӱ изӱ айында тогус јашту Арслан бойыныҥ јаан эјезинде айылдаган. З.Н. Утегенева Шабалин аймакта Беш-Ӧзӧк јуртта јадып јат. Кичӱ изӱ айдыҥ алтынчы кӱнинде, эҥирде, Арслан ла јаан эјези Зауреш Нурланбековна уйларын бедиреп баргандар. Олор Адаткан сууныҥ јарадыла барып јадарда, јаан эјези кенетийин санаазын јылыйтып, агын сууга јыгыла берген. Зауреш Нурланбековна санаазына кирип келзе, јаратта јадыры. Арсланныҥ айтканыла, ол кӧп сананбай, сууга кирип, јаан эјезин јаратка чыгарган. З.Н. Утегенева эмчиликке барарда, инсульт болгоны јарталды. Айдарда, бойыныҥ јеени эје кижизиниҥ јӱрӱмин аргадаган.
Сенатор Владимир Полетаев балдардыҥ ада-энелерине — Ырыс Ильинична ла Алексей Валерьевич Унутовторго, Айжана Аслымкановна ла Евгений Олегович Мухтасыровторго быйанду самаралар табыштырды. Оныҥ темдектегениле, Федерация Совединиҥ јааны Валентина Матвиенконыҥ јакарузы аайынча мындый керек-јарактар, туштажулар ӧткӱрилет ле оны јӧмӧӧринде Россияныҥ Геройы, Федерация Совединиҥ јааныныҥ ордынчызы Ю. Воробьев эрчимдӱ туружат. «Кажы ла јыл бистиҥ тергеениҥ герой-балдарына јалтанбазы учун мындый кайралдар табыштырылат. Ондый јалтанбас балдар азырап-чыдаткан ада-энелерге јаан алкыш-быйан» – деп, ол айтты.
Россияныҥ Геройы Алексей Романовтыҥ темдектегениле, Федерация Совединде јалтанбас балдарды кӱндӱлеери јакшынак јаҥжыгу болуп улалганча. «Балдардыҥ јалтанбас керектериле бис оморкойдыс, олорды тооп јӱредис. Јакшынак јаҥжыгу оноҥ до ары улалар деп иженип турум. Јаш ӱйени мындый јаркынду темдектерле таскадар керек» – деп, ол айтты.
Тергеениҥ башчызы Олег Хорохордин јиит геройлорды уткуп тура, мындый ла ок кижилик кӱӱн-санаалу болуп артыгар деп балдарга кӱӱнземелин јетирди. Ада-энелерге дезе јакшынак кылык-јаҥду балдар азырап-чыдатканы учун алкыжын айтты. Анайда ок Федерация Совединиҥ јааныныҥ Кӱндӱлӱ грамотазы Кан-Оозы аймакта Мӧндӱр-Соккон јурттагы ФАП-та 35 јылдыҥ туркунына ак-чек иштеп келген фельдшер Ирина Котлаевага табыштырылды.
Хамида ТАДИНА