Алтайдын Чолмоны

Мастерскойлор ачылган

30.08.2022

Јуукта Кӧксуу-Оозы јурттагы отраслевой технологиялардыҥ техникумында нацӱлекер аайынча мастерскойлор ачылган.

Ол кӱндерде Кӧксуу-Оозы аймакла ишмекчи јол-јорыкта болгон тергеениҥ башкараачызы Олег Хорохордин «Јиит профессионалдар» ӱлекер аайынча ачылган бу мастерскойлордыҥ кӧдӱриҥилӱ ачылтазында база турушкан.
Республиканыҥ башчызыныҥ темдектегениле, техникумда «Ӱредӱ» нацӱлекер аайынча ӱч мастерской ачылып јат. «Мынаҥ озо Ворлдскилс ӱлекер аайынча 23 мастерской М. З. Гнездиловтыҥ адыла адалган политехнический колледжте, база тӧртӱзи педагогический колледжте ачылган эди. Кӧксуу-Оозында ачылган мастерскойлордо јурт ээлем бӧлӱктиҥ «Јуртээлемдик машиналарды тузаланары», «Сити-фермерство», «Јуртээлемдик биотехнологиялар» ууламјылар аайынча специалисттер белетелер» – деп, Олег Хорохордин айткан. Ол Алтай Республика аграрный тергее ле јурт ээлем субъекттиҥ экономиказыныҥ ӧзӱминиҥ тӧс ууламјыларыныҥ бирӱзи болгонын темдектеген.
«Оныҥ учун бу бӧлӱктиҥ билгирлери бийик специалисттери суруда. Бу площадкалар, јаҥы лабораториялар специалисттерди белетеериниҥ јакшынак тӧзӧлгӧзи болуп јат» – деп, тергеениҥ башкараачызы айткан.
Кӧксуу-Оозы аймактыҥ јааны Олег Кулигин јаҥы лабораториялардыҥ ачылганы база да чыҥдый билгирлер берер ле техникумнаҥ профессионалдар чыгарар арга берерин темдектеген. Ол анайда ок республиканыҥ башчызына бу ӱлекерди јӱрӱмде бӱдӱрерге јӧмӧлтӧ јетиргени учун быйанын айткан. «Келер јылда мында нацӱлекер аайынча база эки мастерской ачарга темдектейдис. Бу ишти мынаҥ да ары кожо апарарыска бӱдедим» – деп, ол айткан.
Алтай Республиканыҥ депутады Мария Кабудыкова јаҥы мастерскойлор ачылганы аймакка учурлу керек болгонын темдектеген. «Мен, ӱредӱчи кижи, ӱредип турган материалды кӧргӱзип ӱреткени ӱренеечилерге кандый учурлу болгонын билерим» – деп, ол айткан.
Ачылтага келген улуска уткуулду сӧзин техникумныҥ директоры Наталья Лукьянова база айткан. «Балдар эмдиги ӧйдиҥ јаҥы јазалдарын тузаланып, јакшызынып ӱренет, соҥында алган ӱредӱзи аайынча бийик кӱӱн-санаалу иштеп баргылайт. Бу ӱлекерди јӱрӱмде бӱдӱреринде турушкан ончо улуска алкыш-быйан» – деп, ол айткан.
Мастерскойлор «Јуртээлемдик техниканы ла јазалдарды тузаланары ла ремонттооры» ла «Јуртээлемдик производствоныҥ тракторист-машинисти» ууламјылар аайынча специалисттер белетеер. Анайда ок анда Алтай Республиканыҥ јурт ээлеминде иштеп турган ишчилердиҥ профессионал узын бийиктедери аайынча программалар иштеер. Оноҥ башка мастерскойлордо 6-11 класстардыҥ ӱренчиктерине ӱредӱлер ӧткӱрилер.
Кӧдӱриҥилӱ ачылтада кайралдар база табыштырылган. «Алтай Республиканыҥ ӱредӱлигиниҥ нерелӱ ишчизи» деген кӱндӱлӱ атла Кӧксуу-Оозында отраслевой технологиялардыҥ техникумында орус тилдиҥ ле литератураныҥ преподаватели Оксана Чичинова адаткан. Алтай Республиканыҥ Кӱндӱлӱ грамотазыла производственный ӱредӱниҥ узы Павел Гавло кайралдаткан.