Алтайдын Чолмоны

Терроризмле тартыжарыныҥ бирлик кӱни

03.09.2022

Терроризмле тартыжарыныҥ бирлик кӱнине учурлалган кереестик митинг сыгын айдыҥ 3-чи кӱнинде Горно-Алтайскта ӧткӧн. Ондо Алтай Республиканыҥ башчызы
Олег Хорохордин турушкан.

Митинг ичбойындагы керектер аайынча органдардыҥ бойыныҥ служебный молјузын бӱдӱрип турала јеҥ јастанган ишчилерине учурлалган кереестиҥ јанында ӧткӧн.
«Бӱгӱн карыкчалду кӱн — бис терроризмнеҥ улам божогон бир де буруузы јок улусты, балдардыҥ каны тӧгӱлгенин эске аладыс. Эҥ ле коркыштузы — бир де буруузы јок балдар божогоны, онызы сӱрекей јаан карыкчал ла јӱректиҥ ачу сызы. Кижиликке ӧҥзӱре бу айалгаларды јӱзӱн-базын террористтер албатыны коркыдарга ла бӧлиирге, оныҥ ийде-кӱчин кирелендирерге, јеткердеҥ корулалбаган эдерге тузаланарын сӱӱйт» — деп, тергеениҥ башчызы айткан.
Олег Хорохордин Бесланда, Буденновскийде, Первомайскта болгон тӱбек-јеткерлер керегинде эзедип айткан.
«Мындый ок керектер Донецкий ле Луганский албаты республикаларда канча јылдарга улалган. Оныҥ да учун аҥылу јуучыл операция ӧткӱрери керегинде јаан учурлу јӧп јарадылган. Президент Владимир Владимирович Путин чокум јакылта берген — аҥылу операция ӧйинде амыр-энчӱ эл-јон ортодо коромјы болбозын јеткилдеер керек. Оныҥ да учун украин националисттер бойыныҥ ла албатызын куйак эдип тузаланып, јуучыл техниказын ла мылтык-јепселин школдордо, эмчиликтерде, улус јаткан јерлерде текшилей тургускан. Олор бойыныҥ ла граждандарын гуманитар коридорлор ажыра божотпой барган — террористтер канча кире тегин албаты божооры керегинде бир де сананбаган» — деп, ол айткан.
Террористтерге удура тартышпаза, олор улусты ӧлтӱрерин оноҥ ары улалтар ла качан да токтобос деп, тергеениҥ башкараачызы темдектеген.
«Бу јуукта ла болгон учурал — террористтиҥ канду керегинеҥ улам бистиҥ ороонныҥ јеринде јиит, 30 јажы толбогон јайалталу кыс, Россияныҥ патриоды божогон. Оныҥ јӱрӱмдик јолы јаҥы ла башталган болгон, је оныҥ отурган кӧлӱгин от-алыштырып ийген. Мынайып Дарья Дугинаныҥ соратниктерин коркыдарга санангандар.
Россия алдындагы ла ӧйдӧ чылап, бастыра албатылардыҥ келер ӧйи амыр-энчӱ ле чындык, келер ӧй ижемјилӱ болзын, балдар амыр-тыш уйуктазын деп тартыжуны ӧткӱрет.
Террористтердиҥ канду колынаҥ божогондорго, кижиликке коркышту коомой бу керекле тартыжарында јӱрӱмин бергендерге ӱргӱлјик эзем. Бистиҥ текши молјубыс — Бесланда болгон јеткер-тӱбектий неме база болбозын јеткилдеерге, телекейде амыр-энчӱ болзын, улустыҥ кӧзинеҥ јаш тӧгӱлбезин деп, бастыра аргаларды тузаланары» — деп, тергеениҥ башчызы куучындаган.
Митингтиҥ туружаачыларына Алтай Республиканыҥ Эл Курултайыныҥ председатели Артур Кохоев мындый сӧстӧрлӧ баштанган: «Бис канча јылдардыҥ туркунына карыкчалду кӱнди — 2004 јылдыҥ сыгын айыныҥ 3-чи кӱнин эске аладыс. Ол тушта мылтык-јепселдӱ террористтер Бесланда школды олјого алган. Бандиттердиҥ кижи кӱӱн јок табарузы Билгирлердиҥ кӱнинде, качан ӱренчиктер јаҥы ӱредӱлӱ јыл башталганына учурлалган байрамдык, кӧдӱриҥилӱ линейкага јуулган тушта болгон. Бу канду табару тушта јӱстер тоолу јиит јӱрӱмдер ӱзӱлген».
Спикердиҥ айтканыла, терроризм — бистиҥ ӧйдӧги эҥ јаан чочыду, кижиликтиҥ јӱрӱминде болгодый эҥ коомой неме.
«Бис терроризмле, экстремизмле колбулу кандый да керектер болбозын јеткилдеерге бастыра аргаларды тузаланар учурлу» — деп, Артур Кохоев айткан.
Митингте анайда ок «Бирлик Россияныҥ Јиит Гвардиязынаҥ» Донецкий албаты республиканыҥ јеринде волонтер группаныҥ туружаачызы Амаду Ильин эки айдыҥ туркунына адылу ла гуманитар болуш јетиргени, Мариупольдыҥ эмчиликтериниҥ медишчилерине эрчимдӱ болушканы керегинде куучындаган.
Митингтиҥ учында оныҥ туружаачылары јеҥ јастанган јуучылдарды бир минут унчыкпазынаҥ эзедип, керееске чечектер салган.

А. Кӧбӧков