Баштапкы виртуальный концертный зал

Баштапкы виртуальный концертный зал — тергееде

20.09.2022

М. В. Чевалковтыҥ адыла адалган эл библиотекада сыгын айдыҥ 15-чи кӱнинде баштапкы виртуальный концертный зал кӧдӱриҥилӱ айалгада ачылды.

Кӧдӱриҥиде Алтай Республиканыҥ башчызы Олег Хорохордин, АР-дыҥ культура аайынча министри Ольга Антарадонова, Эл Курултайдыҥ экономикалык, акча-манат ла калан политика аайынча комитеттиҥ председатели Радмила Пекпеева, АР-дыҥ Госоркестриниҥ баш режиссеры Владимир Кончев ле ӧскӧ дӧ улус турушты.
Тергеениҥ башчызыныҥ темдектегениле, бастырароссиялык виртуальный концертный зал — кемиле, учурыла алза, сӱреен јаан ӱлекер. Ол 2019 јылдаҥ ала «Культура» деген эл ӱлекер аайынча бӱдет. Россия кеминде 300-теҥ ажыра мындый залдар ачылган ла 2024 јылдыҥ учына јетире текши ороондо база 500 ачылары темдектелет.
«Мында тургузылган аҥылу јепсел онлайн ээжиле Россияныҥ эҥ артык кӱӱлик залдарында ӧдӱп турган чыҥдыйы бийик кӱӱни кӧрӧр лӧ угар јарамыкту арга берер. Мындый јап-јакшынак залдар ачылган ла иштеп јаткан јерлерде кӧрӧӧчилердиҥ ле угаачылардыҥ кӱӱн-санаазы бийик. Олордо јаан концерт ӧдӱп јаткан залда тирӱ кӱӱни угуп отургандый сезим болот. Кайкамчылу кӧгӱс телекейдиҥ байлыгын чечет, байрамдык кӧдӱриҥилӱ кӱӱн-тап сыйлайт деп, угаачылар бойлорыныҥ шӱӱлтелериле ӱлежет» — деп, Олег Хорохордин айтты.
Оныҥ чокумдаганыла, эмди Алтай Республиканыҥ эл-јонына бийик классиканыҥ телекейиле, академ кӱӱлик санаттыҥ эҥ артыктарыла јууктада таныжар ырысту учурал, арга, айалга келишти. «Мынызы анчада ла јиит улуска јарамыкту ла эптӱ. Олорды бу ӱлекер, бастыра јанынаҥ алар болзо, јилбиркедер. Бисте јайаан јайалталу јииттер, кӱӱлик школдордыҥ, балдардыҥ санаттар сургалдарыныҥ ӱренчиктери кӧп. Айдарда, бу мындый ойын-концерттер олордыҥ кӱӱн-санаазын кӧдӱрип, ич-телекейиниҥ байлыгы јайа ӧзӧрине јарамыкту болуп, јолы кӧндӱгер» — деп, тергеениҥ башчызы уткуулду сӧзинде аҥылап айтты.
Онойдо ок Олег Хорохординниҥ айтканыла, виртуальный зал М. В. Чевалковтыҥ адыла адалган эл библиотекада ачылып јатканында бойыныҥ шылтагы бар. Шак ла мында кӱӱлик эҥирлерди, салондорды ӧткӱрери јакшынак јаҥжыгу болуп улалат. Бу туштажуларда классикалык кӱӱ угулат ла јайаандык улус, кычыраачылар ол эҥирлерге кӱӱнзеп туружат.
Тергеениҥ башчызы виртуальный концертный зал классиканы да сӱӱчилерде, онойдо ок классикалык кӱӱни бойына баштапкы катап ачып јаткандарда бачым ӱстине ундылбас ла узакка артар оморкодулу, кӧдӱриҥилӱ кӱӱн-санаа артырар деген ижемјизин айтты.
Эл Курултайдыҥ комитединиҥ председатели Радмила Пекпееваныҥ темдектегениле, Россияда бирлик јетирӱлик ле культуралык телкемди тӧзӧӧри јанынаҥ чокум амаду тургузылган. «Оны јӱрӱмде бӱдӱретен амадуларыныҥ бирӱзи виртуальный концертный залдарды ачып иштедери болуп јат. Республикада баштапкы мындый зал бистиҥ сӱӱген библиотекабыста ачылып јатканы јарамыкту. Мында эмдиги ӧйдиҥ јӱзӱн-башка јайаандык кӧдӱриҥилери ӧдӱп јат» — деп, ол айтты.
Госоркестрдиҥ баш дирижеры Владимир Кончев виртуальный концертный залды белетеп ачарында эрчимдӱ турушкан. Ол сценаны эптӱ ле келиштире тургузары, кӱӱ залда чокум, јарт угулары јанынаҥ сурактар аайынча јартамалдар эткен. Владимир Кончев залда јуулгандарды, ӱренчиктерди, айылчыларды солун керекле база уткуды. «Калганчы јылдарда культура бӧлӱги ичкери ӧзӱмдӱ, культураныҥ учреждениелериниҥ материальный тӧзӧгӧзи база бийик тебӱле јаранат. Бисте шак мындый тӧзӧмӧлдӱ иштиҥ шылтузында бӱгӱнги кӱнде классиктердиҥ талдама чӱмдемелдерин кӧрӧр лӧ угар арга бар. Телекейде бистиҥ, Россияныҥ, классиказы эҥ артыгы» — деп, ол айтты.
Кӧдӱриҥи ӧйинде «Алтай Республиканыҥ культуразыныҥ нерелӱ ишчизи» деген кӱндӱлӱ ат-јол Эл библиотеканыҥ билим-методикалык бӧлӱгиниҥ јааны Лидия Сабашкинага адалды.
Алтай Республиканыҥ Кӱндӱлӱ грамотазы Эл библиотеканыҥ библиотекари Светлана Лукьяновага табыштырылды.
АР-дыҥ Эл Курултайыныҥ Быйанду самаразы Эл библиотеканыҥ јааныныҥ ордынчызы Марина Алушкинага табыштырылды.
Мында ачылган виртуальный концертный залга келерге кӱӱнзегендерге онлайн ээжиле кӧрӧтӧн сӱрекей јилбилӱ, солун программалар белетелген. Олор ады јарлу ӧмӧликтерле, телекей кеминде ады-чуузы чыккан кӱӱлик ойноткыларла ойноочыларла, солисттерле таныжар аргалу. Баштапкы ондый кӧргӱзӱ (трансляция) сыгын айдыҥ 25-чи кӱнинде ӱч саат тӱште болор. Кӱӱ сӱӱчилер «Мировые хиты танцевальной музыки» деген ойын-концертти кӧрӧр, угар. Ойын-концертти Россияныҥ Н. Н. Осиповтыҥ адыла адалган калыктар ойноткыларыныҥ Эл академ оркестри кӧргӱзер.

Клара Пиянтинова

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина