Јерлештерин кӧдӱрген Сугаш јурт

13.12.2022

Чаҥкыр теҥери алдында
Чактарга турган Болчок-Таш.
Кöгöргöн тууларлу Алтайда
Кöжöгö кабайым – jурт Сугаш.
Тöрöл jерим, Сугаш jуртым.
Jÿрекке кару jуртымныҥ
Jÿрÿми öҥжип jаранзын!
Агару Алтай ичине
Ады Сугаштыҥ макталзын!
Jарлу улузыла бай Сугажыс
Jажын-чакка jаранып ӧссин!

Кӧксуу-Оозы аймакта Сугаш деп су-алтай јурт бар. Бу јурттыҥ эл-јоны бойыныҥ јаҥжыгуларын чебер апарып, јаанды ӧрӧ кӧдӱрип, ӧмӧ-јӧмӧ таскадып, нак, ӧҥжӱк јуртайт. Ол кичӱ тӧрӧлиниҥ адын ӧрӧ кӧдӱрип јӱрген јарлу улузыла бай. «Алтайдыҥ Чолмоны» газет Сугаш јурттаҥ чыккан јайалталу коллегалары Артур Сулуковло, Евгений Бутушевле оморкоп јӱрет. А јурттыҥ улузы јерлештериле канайып оморкоп туру не!
Анайып, бу кӱндерде Сугаш јурттыҥ школында јарлу фотојурукчы, оператор, фотокорреспондент, Г. И. Чорос-Гуркинниҥ јондык сыйыныҥ лауреады Евгений Бутушевтиҥ белек јажына учурлалган јайаандык эҥир ӧтти. Туштажуга кӧп улус келген, алкыштарын айткан, кожоҥдорын чӧйгӧн. Школдыҥ директоры Жанна Сулукова бастыра јерлештериниҥ адынаҥ уткуулду сӧс айткан. Јылу, кӱндӱзек айалгада јакшынак ойын-концерт ӧтти.
Рената Ерелина, Алтынбай Курдаков, Лилия Мекечина, Роза Мельтекова, Карина Олченова, Аржана Садоева јарлу алтай поэттердиҥ ӱлгерлерин кычырган, Айсулу Некешева, Марина Четова, школдыҥ ӧмӧлиги коо-јараш кожоҥдорын сыйлаган.
Туштажу ӧйинде Евгений Бутушевтиҥ фотојуруктарыныҥ кӧрӱ-выставказы ӧткӧн, эрчимдӱ саду да болды. Сакыбас јанынаҥ мындый солун туштажу тӧзӧп ӧткӱргени учун Евгений Николаевич јерлештерине јаан алкыш-быйанын айдат.

Почта бӧктӱ де болзо, газеттерди ӧйинде алар

Бу туштажуда анайда ок «Алтайдыҥ Чолмоны» газеттиҥ ле оныҥ Сугаш јуртта чындык кычыраачыларыныҥ курч сурагы шӱӱжилген.
Сугашта почтаныҥ бӧлӱги јабылып калган эмтир. Је јурттыҥ улузы кӧп алаҥзыбай, газетти канай бичидер, оноҥ оны канай таркадар деген суракты тӱрген-тӱкей нак чечип ийдилер. Бу ла туштажу ӧйинде 50 кире кижи тӧрӧл газедине тургуза ла бичидип алгандар. Эмди олорго газетти јерлеш таксист ӧйлӱ-ӧйинде јетирип турар. Бу учуралдыҥ јакшынак айалгазы неде дезе, бичидиштиҥ баазы почтаныҥ каталожный баалу-чуулу баазынаҥ канча кире јеҥил чыгып турганы. Оныҥ учун ӧскӧ јурттарда почтаныҥ бӧлӱктери бӧктӧлип турган чочыдулу айалга тӧзӧлзӧ, Сугаштаҥ тем алыгар деп кычырып турубыс! Бис, «Алтайдыҥ Чолмоны» газеттиҥ редакциязы, газедис кажы ла кижиге јетсин деп, кыйалтазы јогынаҥ болужарыс.

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым