Бӧкӧзиле, бекемиле танылу ветерандар

24.01.2023

Газеттиҥ кычыраачыларын ла хоккей сӱӱчилерди Н. В. Кулачевтиҥ адыла адалган ДЮСШ-ныҥ тазыктыраачызы Алексей ЯИЛГАКОВТЫҤ «Бӧкӧзиле, бекемиле танылу ветерандар» деп адалган бичимелиле таныштырадыс.

Кан-Оозы јуртта чаган айдыҥ 14-чи кӱнинде «Алтай Республиканыҥ мячту хоккейле 40 лӧ оноҥ ӧрӧ јашту ветерандары ортодо «Чарас-Ветераны» деген хоккейный клубтыҥ сыйына учурлалган чемпионаттыҥ 1-кы туры» деп адалган сӱрекей солун ла тыҥытту маргаан ӧтти.

Јаан маргаанда беш команда эрчимдӱ турушты: «Чарас-Ветераны», «Кан-Оозы», «Саратан», «Оҥдой» ло каладаҥ «Орда-Ветераны».
Кан-Оозы аймактыҥ јааны, «Чарас-Ветераны» команданыҥ туружаачызы Рустам Кокушев келген ветерандарды изӱ уткуп, маргаанды бойыныҥ уткуулду сӧзиле ачты. Ол чыйрак, бӧкӧ спортчыларды уткуп тура, јараш ойындарын кӧргӱзип, эҥ артык команда кубокты ойноп алзын деп кӱӱнзеди. Кӧдӱриҥилӱ ачылта ӧйинде маргаанныҥ туружаачыларын онойдо ок тергеениҥ иш, јонјӱрӱмдик ӧзӱм ле эл-јонды ишле јеткилдеери аайынча министри Адар Сумин, каланыҥ администрациязыныҥ јааныныҥ ордынчызы Евгений Сюремеев (экӱлези «Орда-Ветераны» команданыҥ туружаачылары) уткудылар.

Спортчылардыҥ парадын башкарып турган ДЮСШ-ныҥ јааны Айабас Чурупов ветеран Игорь Анчибаевтиҥ эземин кереестеп, бир минутка тымыктыҥ ӧйин јарлады.
Ойындар «круговой системала» ӧткӧн, кажы ла команда бой-бойыла туштажып ойногон. Ойындар сӱреен јилбилӱ, нак ла ачык-јарык айалгада ӧткӧнин темдектеер керек. Кажы ла хоккеист јылдарла келген байлык ченемелин, эп-сӱмезин, ойынныҥ марын-аайын билгир тузаланып, сӱреен јараш ойын кӧргӱстилер. Маргаанныҥ туружаачылары спортто јаҥжыккан јакшынак ээжи аайынча кажы ла ойынныҥ бажында кол тудужып, кийнинде кабыра кучактажып, бой-бойлорын јап-јакшынак ойын учун уткужып турдылар. Нениҥ учун дезе бу ойноп јаткан улус школдо ӱренип турар ӧйдӧҥ ала туштажып ойногондор.

Јаан маргаанда ӧткӧн изӱ, эрчимдӱ ле ӧкпӧӧриштӱ тартыжулардыҥ шылтузында «Оҥдой» команда чемпион болуп, кубокты ала соктылар. Экинчи јерге «Орда-Ветераны», ӱчинчи јерге «Чарас-Ветераны» командалар чыктылар. Маргаанныҥ кӧдӱриҥилӱ јабылтазында командалар јолду медальдарла, кубокло, сый-акчала кайралдаттылар. Кан-Оозы аймактыҥ јааны Рустам Кокушевке ле тергеелик маргаанды ӧмӧ-јӧмӧ ӧткӱрген ӧмӧлигине јаан алкыш-быйанысты айдадыс. Ол кемиле јаан байрамды ӧткӱрерине бодолду болгон деп айдарга јараар.

«Оҥдой» команданыҥ туружаачы-ларыныҥ јаштарыла алза, эҥ ле јаандары 63, 60, 58, 54, 51 ле оноҥ оогошторы болды. Кан-Оозыныҥ «Чарас» хоккейный клубыныҥ сыйын ойноп алары тегиндӱ керек эмес эмей. Је бистиҥ команда ченемелин, эп-сӱмезин, ийде-кӱчин, эрчимин билгир тузаланып, јакшы ойын кӧргӱстилер. «Оҥдой» команданыҥ туружаачылары бойыныҥ јеҥӱзин јерлежис, хоккейдиҥ ветераны, ветерандардыҥ хоккейин керектӱ кемине кӧдӱрген И. Д. Анчибаевтиҥ эземине учурлады. Алтай алып баатырдыҥ ады-јолы, эткен-бӱдӱрген ижи качан да ундылбазын.

Игорь Анчибаев кӧп јылдардыҥ туркунына алкы бойыныҥ баштаҥкайыла, кӱӱн-санаазыла ветерандардыҥ хоккейин республика кемине кӧдӱрген. Шак оныҥ баштаҥкайыла ветерандардыҥ хоккейи тӧрт турлу чемпионат болуп јолын алынды. Бу маргаандар Кан-Оозы, Оҥдой, Улаган ла Кош-Агаш аймактарда ӧдӱп јат. Айдарда, мынаҥ ары мячту хоккейдиҥ тергеелик федерациязына Игорь Анчибаевке учурлалган фондты ачып, ветерандар ортодо оныҥ ады-јолын кереестеп, сый эдери јанынаҥ шӱӱлте эдедим. Игорь Даниловичтиҥ баштаган ижин оноҥ ары улалтып, ветерандардыҥ хоккейин текши эл-јон јӧмӧп, учурлу кемине јетирер керек. Темдектезе, Евгений Корчагинниҥ эземин кереестеген сыйына учурлалган маргаандарда 200-теҥ ажыра спортчылар туружат. Бу сый республика ичинде ундылып калган јаан тошто ойноп турган хоккейди орныктырып, кӧнӱ апарып јат. Шак оныҥ учун бир де чӧкӧбӧй, мындый сыйларлу маргаандарды ӧткӱрер ле керек деп сананадым.

Учурал келижерде, бистиҥ республика кеминде мячту хоккей спорттыҥ бӱдӱмин бийик кеминде кӧдӱрген улустыҥ ады-јолдорын адап салайын. Олордыҥ тоозында, узак ӧйгӧ эрчимдӱ ле ак-чек иштегендер. Темдектезе, Илья Арбаев, Адар Сумин, Заури Казакпаев, Амаду Белееков, Айабас Чурупов ло оноҥ до ӧскӧлӧри.

Хоккей спорттыҥ эҥ ле баалу бӱдӱми болуп јат. Оныҥ учун бойымныҥ коллегаларыма, тазыктыраачыларга јаан алкыш-быйанымды айдадым. Слерди чындап та спорттыҥ чындык најылары деп айдар керек. Слер кандый ла эжикти ачып, бозогозын алтап, улуска удура базып, ачык-јарык, эптӱ куучындажып, бир эп-арганы таап ийедигер. Ончо немени эптештирип-келиштирип, тошты уруп, балдарды керектӱ кеп-формала јеткилдеп, олорды белетеп, маргаандарда туружып, јаш ӱйени таскадып јадыгар. Мынайып мячту хоккейдиҥ бӱдӱмин ӧскӱредер. Онойдо ок олордыҥ тоозында оогош јурттарда бойыныҥ кӱӱниле тошты белетеп, балдарды јууп, тазыктырып јаткан ветеран уулдарды база темдектеер керек. База болужын јетирип турган спонсорлорго, хоккей сӱӱчилерге јаан быйан. Онойдо ок Алтыгы Талду јурттыҥ эл-јонына, јерлештериме ле менде тазыктырынып турган балдардыҥ ада-энелерине јаантайынгы болужы учун быйанымды айдадым.

Фотојурукта: 1-кы рядта отургандары — Максим Баяндинов, Арат Анчинов (турнирдиҥ эҥ артык каалгачызы деп темдектелген),
Владимир Сулачаков, Айтурган Малчинов; тургандары — Эркемен Кыбыев, Амыр Бекин, Мерген Яилгаков, Алексей Яилгаков, Александр Судуев

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина