Јӱректиҥ јылузын сыйлаган эпшилерге

10.03.2023

П. В. Кучияктыҥ адыла адалган эл драма театрда тулаан айдыҥ 7-чи кӱнинде тергеебистиҥ ӱй улузына учурлай кӧдӱриҥи ӧтти. Алтай Республиканыҥ башчызы, башкарузыныҥ председатели О. Хорохординниҥ айтканыла, «ӱй улустыҥ албатылар ортодо кӱни – эҥ јарык ла сӱӱген байрамдардыҥ бирӱзи. Кажыбыста ла јӱрегиске јуук ӱй улузыс бар. Олор биске эҥ ле јакшызын сыйлайдылар.

«Ӱй улус кандый да айалгада эр улусты јӧмӧжип, јалтанбас болорына, јаҥы ачылталар ла јакшынак керек-јарактар бӱдӱрерине ийде-кӱч кожот. Бӱгӱн јерлештерис аҥылу јуучыл операцияда туружып, Тӧрӧлистиҥ јайымы ла амыр-энчӱ јадын-јӱрӱми учун тартыжып турарда, бистиҥ ӱй улус олорго ончо бар аргаларыла болужып, јеҥӱ бистиҥ болорына ла јуучылдар кайра тӱрген јанып келерине ижемјини тыҥыдат.

Бистиҥ тергееде кӧп балдарлу билелер тогус муҥнаҥ ажыра, олордо 30 муҥнаҥ кӧп балдар. Беш ле оноҥ кӧп балдар азырап чыдаткан 981 эне «Быйанду Эне» деп кӱндӱлӱ атла адаткан. 20 ӱй кижи тергеебистиҥ эҥ бийик кайралы «Таҥ Чолмон» орденле кайралдаткан. 57 ӱй кижи «Алтай Республиканыҥ кӱндӱлӱ кижизи» деп атла адаткан» – деп, ол темдектеген.

Анайда ок тергеениҥ башчызыныҥ айтканыла, ӱй улус јаҥы јӱрӱм сыйлап, айлы-јуртын кичееп, бала-барка азырап-чыдадып јӱрет. Је ол ок ӧйдӧ јонјӱрӱмдик ле политикалык ууламјыларда эрчимдӱ туружып, бийик једимдер кӧргӱзет.

Эл Курултайдыҥ председатели А. Кохоев јуулгандарды јастыҥ байрамыла уткуп, кӱӱнземелдерин јетирди: «Јастыҥ баштапкы кӱндерине келишкен байрам учурлу. Ар-бӱткен узун кыштыҥ соокторынаҥ ойгонып, бойыныҥ баштапкы чечектерин јайат. Эпши улус ар-бӱткенге тӱҥейлеш: слер јаҥы јӱрӱм, сӱӱш ле јарашты сыйлайдыгар. Ончо јӱрӱмниҥ уур-кӱчтерин ӧдӱп, јӱрегердиҥ јылузын, килемјизин берип, бала-баркагарды Тӧрӧлин сӱӱрине таскададыгар. Јуулгандардыҥ ортозында аҥылу ӱй улус база кӧп. Олор јалтанбас уулдар чыдадып азырагандар. Јуучылдарыс Тӧрӧлис учун јӱрӱмдерин де кысканбай берген. Слерге јабыс бажырадыс».

Анайда ок, спикердиҥ темдектегениле, байрамдык кӧдӱриҥиге эрчимдӱ јӱрӱмдӱ ӱй улус база келген. Олордыҥ болужыла јуулган посылкалар, самаралар јуучылдарга јаан јӧмӧлтӧ-болуш. «Јуучылдарга болуш јетиреринде тергеебистиҥ кӧп тоолу эл-јоны акту кӱӱнинеҥ туружадылар. Јаан ла учурлу керекте туружып турган ончо ӱй улуска јерге батпас алкыш-быйаныс. Јеҥӱ бистиҥ болор!».

Уткуулду сӧстӧрин АР-дыҥ сенаторы Т. Гигель, Горно-Алтайск каланыҥ мэри, «Алтай Республиканыҥ муниципал тӧзӧлмӧлӧрдиҥ соведи» деп ассоциацияныҥ председатели О. Сафронова база айттылар.

Кӧдӱриҥиде «Россия Федерацияда јонјӱрӱмдик корулаштыҥ нерелӱ ишчизи» деп кӱндӱлӱ атла Майма аймактыҥ јонјӱрӱмдик корулаштыҥ башкартузыныҥ јааныныҥ ордынчызы Валентина Данилова кайралдатты. Россия Федерацияныҥ Президентиниҥ Кӱндӱлӱ грамотазы Горно-Алтайск каланыҥ мэри Ольга Сафроновага табыштырылды. Россия Федерацияныҥ Президентининҥ Быйанду самаразын АР-дыҥ башкарузыныҥ керектериниҥ башкартузыныҥ баш бухгалтери Надежда Маралова алды.

«Алтай Республиканыҥ кӱндӱлӱ кижизи» деп атла балдардыҥ тап-эриктерин корыыры аайынча АР-дагы чыгартулу кижизи Надежда Манзырова ла «Алтайдыҥ эпшилери» тергеелик јондык биригӱниҥ турчызы Нина Белоусова, «Алтай Республиканыҥ нерелӱ ӱредӱчизи» деп атла Чой аймактагы Паспаул јурттыҥ Советский Союзтыҥ Геройы Е. Ф. Трофимовтыҥ адыла адалган школыныҥ баштамы класстардыҥ ӱредӱчизи Марина Проскурякова, «Алтай Республиканыҥ нерелӱ экономисти» деп атла Горно-Алтайсктагы «Алтайдорпроект» АО-ныҥ баш бухгалтери Любовь Рязанова ла Федерал казначействоныҥ башкартузыныҥ бӧлӱгиниҥ јааны Роза Сюнюшева адаттылар.

«Быйанду эне» деп аҥылу темдектер Кош-Агаш аймактыҥ тӧс јуртынаҥ Алена Сейлхановага, Тошоҥты јурттаҥ Наджан Джакиповага ла Айнара Мамырбековага табыштырылды.
Алтай Республиканыҥ Эл Курултайыныҥ Кӱндӱлӱ грамотазыла каладагы балдардыҥ «Чӧрчӧк» деп адалган 8-чи таҥмалу садыныҥ казан азаачызы Лилия Булах, балдардыҥ 6-чы таҥмалу садыныҥ кеп-кийим јунар машинисти Анна Солонкина, Кан-Оозы аймактыҥ «Кан Чарас» газединиҥ баш редакторы Айгуль Тайтова, бу ок газеттиҥ дизайнер-верстальщиги Эльвира Фирсова, спорттыҥ Горно-Алтайсктагы сургалында гандболло тазыктыраачы Марина Чуприна, кеендиктиҥ Улаган аймактагы А. Г. Калкинниҥ адыла адалган сургалыныҥ ишчизи Любовь Тузина, каланыҥ культура, спорт ло јашӧскӱримниҥ сурактары аайынча башкартузыныҥ башкараачызы Олеся Шаркова, каладагы 1-кы таҥмалу кӱӱлик сургалда скрипканыҥ преподаватели Лариса Чурута кайралдаттылар.

Байрамдык кӧдӱриҥиде ончо кӱӱлик сыйлар, јылу сӧстӧр энелерге, эје-сыйындарга, јаанак-тайнактарга учурлалган ла олорго јастыҥ јараш чечектери сыйлалган.

Хамида ТАДИНА
Евгений БУТУШЕВТИҤ фотојуруктары

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина