Јурукчыныҥ телекейи аҥылу

09.06.2023

Горно-Алтайскта балдардыҥ јураарыныҥ В. Костинниҥ адыла адалган сургалыныҥ ӱренчиктери кӱӱк айдыҥ 29-чы кӱнинде бойлорыныҥ дипломный иштерин коруладылар.

Бу сургалды 5-чи «б» класстыҥ (башкараачызы Амыр Укачин) ла 4-чи «а» класстыҥ (кураторы Галина Обухова) ӱренчиктери једимдӱ тӱгестилер. Ӱренчиктерге дипломдор кӱӱк айдыҥ 31-чи кӱнинде кӧдӱриҥилӱ айалгада табыштырылды. Окылу камыстыҥ председатели культураныҥ ла санаттыҥ Г. И. Чорос-Гуркинниҥ адыла адалган колледжиниҥ ӱредӱчизи, Россияныҥ Јурукчылар биригӱ-зиниҥ турчызы Игорь Котонов болгон.

Кажы ла бала бойыныҥ јурук-композициязыныҥ тӧс учурын јартап куучындаган. Јайаандык иштер чӧрчӧктӧрдиҥ сюжеттери, бойыныҥ угы-тӧзиниҥ тӱӱкизи, Туулу Алтайда јуртап јаткандардыҥ кеп-куучындары, соојыҥдары, кай чӧрчӧктӧри аайынча јуралган. Камыстыҥ турчыларыныҥ аҥылап темдектегениле, дипломный ишти корулаар ӧйдӧ ӱренчик коштой мынайда јартамал эткени јарамыкту. Балдардыҥ иштериниҥ учурын толо, элбеде куучындаганы сӱреен јилбилӱ болгоны база ајаруга алынган.

Сургалды божодып јаткандарга уткуулду сӧстӧр, кӱӱнземелдер кӧдӱриҥи ӧйинде кӧп лӧ айдылды. Россияныҥ нерелӱ јурукчызы Амыр Укачин ӱредӱчилерге, ӱренчиктерге, олордыҥ ада-энелерине баштанып, јолду ла тузалу шӱӱлтелерлӱ кӱӱнземелин айтты.

«Бистиҥ слерле кожо јураарыныҥ санат телекейине алты јылдыҥ туркунына улалган јол-јоругыс элес эдип ӧдӧ конды. Слер јӱрӱмерде баштапкы катап дипломдорорды корулап, јаан ченелтени једимдӱ ӧттигер. Онызы слердиҥ база бир бӧлӱк ӧйдиҥ туркунына бӱдӱрген ижердиҥ турултазы болуп јат.

Ортогордоҥ та кем де кызыл диплом албаган болзо, слер тыҥ санааркабагар. Јӱрӱмниҥ учуры кызыл дипломдо эмес деп, ӧй келзе, оҥдоп аларар. Јураарыныҥ санадындагы тӧрттӧр-бештер база да эҥ учурлу эмес деген шӱӱлтени бойына јартап, оныҥ учурын аайлап алары сӱреен керектӱ. Јураарыныҥ ӱредӱзин божодорго јараар, је јурукчыныҥ јолы келишпестеҥ де айабас. Байа јураарыныҥ санадын талдап алзар, јурукчыныҥ эҥ јаан једими, сыйы ӱргӱлјик јайаандык болгонын база ундыбас керек.

Јайаандык иш ле јурукты јураары слерге сӱӱнчини, сӱӱшти, јилбӱни, јайым кӱӱн-санааны экелзин. Јӱрӱмде јайаандык кӧрӱмдӱ, ичкери амадулу јӱрӱгер» — деп, Амыр Борисович айтты.

Оныҥ айтканыла, ӱредӱчилер балдарга јаҥыс ла телекейлик культура керегинде эмес, је онойдо ок Туулу Алтайдыҥ эл культуразы керегинде билгирди толо, јарт эдип берерге амадаган. Су-алтай ӧзӧктӱ эдимдердиҥ натюрмортторын, тургузылган композицияларды белетеер тужында ӱредӱчилер ӱренчиктерин Туулу Алтайда јуртап јаткан калыктардыҥ кеп-куучындарыла, чӧрчӧктӧриле јууктада таныштырарга амадаган. Пленэрлер ӧйинде олорло кожо ачык-јарык куучындажып, кичӱ Тӧрӧлиниҥ ар-бӱткенин јураган.

Јурукчы А. Укачин балдарга баштанып: «Мобильный телефонноҥ тууралап, јакшы бичиктерди кӧп кычырып, Туулу Алтайдыҥ кеенин, јаражын ајарып, шиҥжӱлеп, Тӧрӧлигерге тузалу, санаа-укаалу, ачык-јарык улус болуп јӱрӱгер» — деп айтты.

Байрамдык кӧдӱриҥи ӧйинде ӧскӧ дӧ ӱредӱчилер, ада-энелер балдарды уткуп, ичкери јаан ла јарык јолдор кӱӱнзедилер.

Клара Пиянтинова

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина