Чаҥкыр тошто кызу тартыжулар

01.02.2024

Чаган айдыҥ 25-чи кӱнинде Горно-Алтайсктыҥ «Спартак» стадионында 2011-2012 јылдарда чыккан балдар ортодо мячту хоккейле «Алтайдыҥ Чолмоны» газеттиҥ сыйына маргаан ӧтти.

Бу турнир эки јыл улай Оҥдой аймакта ӧткӧн. Быјыл ол республиканыҥ тӧс калазына кӧчӱрилген. Кош-Агаш, Улаган, Оҥдой, Кан-Оозы аймактардыҥ ла Горно-Алтайсктыҥ јуунты командалары туружып турган мар-гаандарды мячту хоккейдиҥ республикан федерациязы ла «Алтайдыҥ Чолмоны» газеттиҥ редакциязы ӧмӧ-јӧмӧ тӧзӧп ӧткӱрет.

Кӧдӱриҥиниҥ ачылтазында туружаачыларга уткуулду сӧзиле «Алтайдыҥ Чолмоны» газеттиҥ баш редакторы Светлана Триянова баштанды: «Ӱчинчи катап ӧткӱрилип јаткан хоккейдиҥ маргааныла слерди изӱ уткуп турубыс. Спортло тазыктырынып, бичиктер, газеттер кычырыгар. Бӱгӱн јеҥӱчилдерди быйанду самаралар ла кубоктор, анайда ок ончогорды тату сый сакып јат. Оныҥ учун слерге бийик кӱӱн-санаа ла јараш ойын кӱӱнзейдис».

Ээчиде баш јаргычы Заури Казакпаев туружаачыларды ойынныҥ ээжилериле таныштырып, тазыктыраачыларга чыдамал, хоккеисттерге эрчимдӱ ойын болзын деп кӱӱнземелин айтты.

Маргаанда Кан-Оозы аймактаҥ «Чарас-1» ле «Чарас-2», Оҥдой аймактыҥ јуунты командазы, Майманаҥ «Атлант» (спортшкол) ла «Атлант» (СКСШ) командалар туружып, кӧрӧӧчилерге јилбилӱ, јараш ойын сыйлагандар. Ай-кӱн де јылу турды.

Тӧрӧл «Алтайдыҥ Чолмоны» газедистиҥ сыйына учурлалган бу јаркынду тартыжуда 3-чи јерди Майманыҥ «Атлант» (мячту хоккейле ойноп тургандар) командазы алды.
Баштапкы ла экинчи јерлер учун кызу тартыжуда 2-чи јерди «Атланттыҥ» шайбалу хоккей ойноочылары алды.

1-кы јерге Кан-Оозы јурттыҥ «Чарас-1» командазы чыкты. Јеҥӱчилдердиҥ ады-јолдорын адап ийели: Данил Карманов, Михаил Малков, Михаил Немцев, Айан Кульдин, Эремей Казакпаев, Сургул Сандяев, Дамир Таптаев, Айан Тасов, Дмитрий Тодошев, Арсений Тюлентин, Рустам Сыхымаев.

«Эҥ артык ойынчы» деп атла «Чарас-1» команданаҥ Айан Тасов адатты, «Эҥ артык коручыл» — Денис Пупыев (СШ «Атлант»). «Эҥ артык каалгачы» деп Диана Кондратьева (СКСШ «Атлант») адалды. «Эҥ артык табараачы» болуп Оҥдойдыҥ командазынаҥ Кумер Кохоев чыкты. Бу балдар кӱндӱлӱ грамоталарла, сыйларла кайралдаттылар.

Јеҥӱ алган командалар дезе турнирдиҥ кӧдӱриҥилӱ јабылтазында дипломдорло, медальдарла, кубокторло кайралдаткан.

«Чарас-1» ле «Чарас-2» командаларды спорттыҥ Кан-Оозы јурттагы И. К. Арбаевтиҥ адыла адалган школыныҥ башкараачызы ла тазыктыраачызы Айабас Чурупов баштап экелген. «Изӱ тартыжуда јеҥӱ алган «Чарас-1» командада 11 бала, олордыҥ ортодо бир вратарь. Олордо 2025 јылда Сибир федерал округтыҥ «Плетёный мяч» деп клубтыҥ сыйына учурлалган турнирде туружар арга бар. Кожо келген оогош балдар јаандарынаҥ тем алып, олордоҥ артпай, албаданып тазыктырынат. Бӱгӱнги кӱнде туружаачылар јакшы ойын кӧргӱсти. Је база да тазыктырынар керек» – деп, Айабас Михайлович айтты.

Тургуза ӧйдӧ бу спорттыҥ ууламјызы Алтай Республикада ӧзӱм алынат. Командалар тӧзӧлип, башка-башка маргаандарда эрчимдӱ туружып јат. Хоккейле јаҥыс та уулчактар јилбиркеп турган эмес, је онойдо ок хоккеист кызычактардыҥ тоозы кӧптӧйт. Быјыл тӧс калада, аймактарда, јурттарда јыҥылайтан тошту јерлер кӧп болгонын темдектеер керек.

«Атлант» команданыҥ тазыктыраачызы Андрей Чернышевтиҥ куучындаганыла, олордыҥ бир командазында кызычактардыҥ тоозы – 9. Олорго хоккей ойноорго сӱрекей јарап турган эмтир. Кызычактар чаҥкыр тошто кызу тартыжуларга уулчактарла теҥ-тай чыгат. Быјыл кочкор айдыҥ 14-чи кӱнинеҥ ала 16-чы кӱнине јетире Москва каланыҥ Кызыл тепсеҥинде Патриархтыҥ кубогыныҥ XIV маргааны ӧдӧр. Јиит хоккейчилер ого белетенип јат.

Газеттиҥ ӧмӧлиги бу маргаанды баштап ӧткӱрген Алтай Республиканыҥ хоккейле федерациязына (Е. А. Сюремеев), кӱрештиҥ «Ирбизек» спортшколына (М. Я. Яйтаков), баш јаргычы З. Г. Казакпаевке јаан быйанын айдып туру.

Бу первенство келер јылдаҥ ала, айса болзо, аймактар сайын ӧткӱрилер.

Айару ЧЕКОНОВА
Евгений БУТУШЕВТИҤ фотојуруктары

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина