Алтайдын Чолмоны

Талдаштарга белен

07.03.2024

Тулаан айдыҥ 15-17 кӱндеринде ороон ичинде РФ-тыҥ президентине талдаштар ӧдӧр. Талдаштардыҥ ӱч кӱнниҥ туркунына иштеер јондык ширтеечилериниҥ штабыныҥ јуунында тургузылган иштер чокумдалды.

Оныҥ ижинде РФ-тыҥ Јондык палатазыныҥ турчызы Евгений Умашев, Алтай Республикадагы Јондык палатаныҥ председатели Татьяна Кончева, Јондык палатаныҥ тергеелик координаторы, тергееде талдаштарды ајаруда тудар штабтыҥ башкараачызы Денис Власенко, јондык ајару аайынча комиссиязыныҥ председатели Вадим Фефелов, Јондык палатаныҥ турчылары Мария Ардиматова, Борис Алушкин, Светлана Басаргина ла талдаштарды ајаруда тудар штабтыҥ турчылары туруштылар.

Јуунда Алтай Республиканыҥ Јондык палатазыныҥ турчылары талдаштарга белетеништӱ иштер кандый кеминде ӧткӱрилип турганы ла јондык ширтеечилер белетейтен иштердиҥ уч-турултазы керегинде јетирӱлер эттилер.

«Штабтыҥ ижи керегинде айдар болзо, јондык ширтеечилердиҥ иштеер аайы јанынаҥ чаазын-документ белетелген. Беш кижи аҥылу ӱредӱ алган. 2023 јылдыҥ јаҥар айынаҥ ала 2024 јылдыҥ чаган айына јетире тергеениҥ ончо аймактарында јондык ширтеечилердиҥ он эки ӱредӱзи ӧткӱрилген. Горно-Алтайскта ӱредӱ-семинар эки кӱнниҥ туркунына, Чамал аймакта бир кӱннеҥ эки катап ӧткӧн.

Ӱредӱни 700 јондык ширтеечи јеҥӱлӱ ӧдӱп, бойлорыныҥ ижин тулаан айдыҥ 15-17 кӱндеринде бӱдӱргилеер. Тургуза ӧйдӧ ширтеечилер ортодо бирлик тестирование ӧткӱрилет. Оныҥ уч-турултазы аайынча јаан ӧмӧлик тӧзӧлӧр.

Студенттер ле јашӧскӱрим ортодо талдаштар керегинде ле ширтеечилердиҥ ижи аайынча семинарлар јаантайын ӧткӱрилет. Талдаштарды ӧткӱрери аайынча јасактарды буспазы јанынаҥ кажы ла кӱн соцсетьтерде јетирӱлер шиҥделет. Аҥылу ајару — эл-јонды чындык јетирӱлерле јеткилдеери. Талдаштар ачык ӧдӧри учурлу» — деп, Татьяна Кончева айтты.

Орооныста ӧдӧтӧн талдаштардыҥ ижи јондык биригӱлерле јуук колбуда ӧдӧр учурлу. Айдарда, ондо 705 јондык ширтеечи иштеери темдектелер. Олордыҥ текши тоозы, ады-јолдоры тулаан айдыҥ 11-чи кӱнине јетпей тергеедеги талдаштар ӧткӱрер камыска табыштырылары темдектелет. Ончо ширтеечилер ченелте-тестированиени јеҥӱлӱ ӧткӧн. Эмди олордыҥ алдында тургузылган тӧс амаду — талдаштар бийик кеминде ӧткӱрилерине ончо аргалар тӧзӧлгӧн бӧ, камыстардыҥ турчыларыныҥ ижи ак-чек пе, ајаруда тудары.

Алтай Республикадагы Јондык палата талдаштар ӧдӱп турган участоктордоҥ чике видео-кӧргӱзӱ ӧткӱрер. Кӱӱнзеген улус талдаштардыҥ ӧдӱп турган аайын Најылыктыҥ туразына келип, чике видео-ло кӧрӧр аргалу. Кандый бир алаҥзулу сурак чыкпазын деп, ончо участоктордыҥ ижи видеого согулар.

Ширтеечилер керегинде айдар болзо, олордыҥ кӧп лӧ сабазы оноҥ до озо талдаштарда иштеген улус, ченемелдӱ, билгири бийик јондык ишчилер. Талдаштарда орооныстыҥ кажы ла гражданини бойыныҥ кӱӱн-санаазын ачык кӧргӱзип, ӱнин кӱӱнзеген кандидатка берер учурлу. Бу ишти ӧткӱрерине ончо аргалар тӧзӧлгӧн.

Хамида ТАДИНА