Калыгыныҥ оморкодузы – кайчылар

04.04.2024

Тергеебисте алтай кай чӧрчӧктиҥ онкӱндӱги ӧдӧт. Оныҥ кӧдӱриҥилӱ ачылтазы кандык айдыҥ баштапкы кӱнинде М. В. Чевалковтыҥ адыла адалган Эл библиотекада ӧтти.

Јаҥжыкканы аайынча кӧдӱриҥи алкыш сӧстӧрдӧҥ башталды. Мӧҥӱне Тайтыковтыҥ алкыжы сӱреен јараш угулды.

Ачылтада уткуулду сӧстӧрин АР-дыҥ башкарузыныҥ председателиниҥ ордынчызы Динара Култуева, Эл Курултайдыҥ национальный политика, ӱредӱ, культура, јондык биригӱлер ле СМИ-лер аайынча комитединиҥ председатели Наталья Екеева, РФ-тыҥ культуразыныҥ нерелӱ ишчизи, АР-дыҥ албаты кайчызы Таныспай Шинжин айттылар.

Кай чӧрчӧктиҥ онкӱндӱгине учурлай кӧдӱриҥиде тергеениҥ башчызыныҥ албаты јайаандыгында једимдери учун кайчы Алексей Калкинниҥ адыла адалган сыйы табыштырылды.

Быјыл бу сыйды кайлаар узы учун Оҥдой аймактыҥ культуразыныҥ тӧс јериниҥ «Ойно» ансамблиниҥ артисти, Кайчылардыҥ албатылар ортодогы курултайыныҥ лауреады Мӧҥӱне Тайтыков ло Кош-Агаштагы балдардыҥ кеендигиниҥ санадыныҥ «Кайлаар» клазыныҥ преподаватели, «Эре-Чуй» ансамбльдыҥ артисти, Кайчылардыҥ албатылар ортодогы курултайыныҥ лауреады Арчын Шаудуров алдылар.

Албаты јайаандыгында једимдери ле јондык учурлу шиҥжӱ иштери учун сый Василий Ойношевке табыштырылды.

Кӧдӱриҥиде јуулгандарга ла сыйдыҥ лауреаттарына бойлорыныҥ јайаан иштерин балдардыҥ А. А. Тозыяковтыҥ адыла адалган 2-чи таҥмалу кӱӱлик школыныҥ алтай кӱӱлик ойноткылардыҥ «Ай-Кӱмӱрел» (башкараачызы Айдана Кобенова) ансамбли сыйлады.

Кай чӧрчӧктиҥ онкӱндӱгинде тергеебистиҥ культура тӧзӧлмӧлӧринде кайчылардыҥ јӱрӱмине, кеендигине учурлалган туштажулар, мастер-класстар ла бичиктердиҥ кӧрӱзи ӧдӧр.
Кандык айдыҥ 10-чы кӱнинде П. В. Кучияк-тыҥ адыла адалган Эл драма театрда «Маадай-Кара» спектакль кӧргӱзилер.

Албаты кайчызы Алексей Калкинниҥ адыла адалган сый 2011 јылда јӧптӧлгӧн лӧ албаты јайаандыгында једимдер ле јондык учурлу шиҥжӱ иштер учун табыштырылат. Алтай Республиканыҥ кӧп калыктарыныҥ культуразыныҥ ӧзӱмине јаан ӱлӱзин јетирген ле эл-јон ортодо јарлу боло берген ле тоомјы алган авторлорго ло јайаан ӧмӧликтерге јылдыҥ ла 40 муҥ салковой кеминде сый-акча берилет.

Бу сыйды башка-башка јылдарда Игнатий Ортонулов, Леонид Отуков, Айдар Чурупов, Эркемен Епишкин, Тамара Садалова, Добрыня Сатин, Эмиль Теркишев, Алексей Топчин, Сарымай Урчимаев, Елизавета Ямаева, Мира Демчинова, Мерген (Василий) Тельденов, Карыш (Григорий) Кергилов, Манзур Тонов, Виктор Малчинов, Алан Темеев, Эдуард Мечешев, Радмила Теркишева, Николай Сегерткишев ле оноҥ до ӧскӧлӧри алган.

Алексей Григорьевич Калкин — Алтай Республиканыҥ ээлӱ кайчызы. Оныҥ репертуарында 30-таҥ кӧп кай чӧрчӧк, кӧп тоолу чӧрчӧктӧр, соојыҥдар, туујылар, куучындар ла кожоҥдор болгон. Кайчыныҥ «Маадай-Кара» кай чӧрчӧги бастыра телекейде јарлу.

Виктория БАДАКИНА
Фотојуруктар РЦНТ-ныҥ сайтынаҥ алылган

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина