Ичкери јолыгар элбек болзын!

11.04.2024

ФОТОЈУРУКТА: Айсур Нонуковты искусствоведениениҥ кандидады, Курмангазыныҥ адыла адалган казах эл консерваторияныҥ доценти А. И. Раимбергенов кайралдайт

Айылдаш ла карындаш Хакас Республикада бу ла кӱндерде он бежинчи катап Кӱӱчилердиҥ ле јурукчылардыҥ А. А. Кенельдиҥ адыла адалган бастырароссиялык кӧрӱ-маргааны ӧтти. Ондо јаҥжыкканы аайынча «Кееркедим санат» ла «Кӱӱлик санат» ууламјыларда балдардыҥ кӱӱлик, јуранарыныҥ ла санат школдорыныҥ ӱренчиктери ле орто аҥылу ӱредӱлик тӧзӧмӧлдӧрдиҥ ӱренеечилери турушты.

Кӱӱлик санатта јети ууламјы болды: фортепиано, скрипка, виолончель, баян/аккордеон, кылду ойноткылар, духовой ло албаты ойноткылар.

Бу кӧрӱ-маргаан јиит туружаачылардыҥ јайалтазын, јайаан кӧрӱмин элбедер, ӱредӱчилериниҥ узын тыҥыдар, јайалталу јииттерди илелеер амадула ӧткӱрилет.

Жюри-јаргычылардыҥ тоозында орооныстыҥ јарлу кӱӱчилери, ӱредӱчилери, культураныҥ ла санаттыҥ нерелӱ ишчилери болды. Алтай Республикадаҥ жюриниҥ ижинде кӱӱчи, концертмейстер, АР-дыҥ нерелӱ артисти Роман Саланханов турушты. Јайалталу јерлежис жюриниҥ ижинде тӧртинчи катап турушкан эмтир. Оныҥ айтканыла, јылдаҥ јылга кеми ле учуры бийиктеп јаткан бу маргаанда тергеебистеҥ быјыл беш бала «албатылык ойноткылар» ууламјыда кажызы ла бойыныҥ категориязында туружып, лауреат болуп чыккан: Кош-Агаштагы балдардыҥ санаттар школыныҥ (ӱредӱчилери Р. Саланханов, А. Шаудуров) ӱренчиктери Даниил Якинов (II степеньдӱ лауреат, маргаанныҥ эҥ оогош туружаачызы, 7 јашту), Айлана Чилбаева (III степеньдӱ лауреат), Владислав Майхиев (II степеньдӱ лауреат), Айат-Каан Чурекенов (I степеньдӱ лауреат) ло каладагы Г. И. Чорос-Гуркинниҥ адыла адалган колледжтеҥ Айсур Нонуков (I степеньдӱ лауреат).

«Маргаанныҥ жюризи анчада ла Айсур Нонуковты аҥылап темдектеген. Ол јаан, ийделӱ ле јилбилӱ программазыла ончозын кайкаткан. Ӱйдешкен ӱредӱчилери Ренат Суразовтыҥ, Игорь Кожеуровтыҥ ижи база бийик баалалган» – деп, Р. Саланханов айтты.

Кара майман сӧӧктӱ бу уул Кан-Оозы аймактыҥ Оро јуртынаҥ. Оныҥ билезинде ончозы кӱӱле јилбиркеп, кожоҥдоп турган, адазы ла карындажы гитарала ойнойт, энези комустап билер. Је профессионал јолды јӱк Айсур талдап, эмди Г. И. Чорос-Гуркинниҥ адыла адалган колледжтиҥ 3-чи курсында ӱренип јат. Ол ӱредӱчилери Мансур Сергеевич Тоновко, Ренат Токтоулович Суразовко, Жанетта Сергеевна Тоновага, концертмейстер Игорь Алексеевич Кожеуровко, колледжтиҥ директоры Елена Карачиновна Ластаевага, Владимир Егорович Кончевке быйанын јетирет. Јиит јайалта ӱредӱзин оноҥ ары Бурят Республикада культураныҥ университединде улалтар, икилиле ойноорын тыҥыдар амадулу.

Бу конкурста Айсур баштапкы катап турушкан. Албатылык ойноткылар ууламјыда јажыла тӧрт категория болгон, јерлештеристеҥ бу категорияда јӱк Айсур болгон, арткан он тӧрт туружаачы орооныстыҥ ӧскӧ талаларынаҥ.

Алтай Республикадаҥ бу кӧрӱ-маргаанда турушкан јииттерге ончозына ичкери јолдоры ачык ла элбек болзын деп кӱӱнзейли. Олордыҥ кажызыла ла мынаҥ ары элбеде эрмек-куучындар ӧткӱрер ӧй келер.

Элчин КУРГАРИНОВА белетеген

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина