Алтайдын Чолмоны

Јаркындалган јаҥыјылдык байрам јыҥырады

27.12.2022

Јаҥар айдыҥ 23-чи кӱнинде П. В. Кучияктыҥ адыла адалган эл театрда Алтай Республиканыҥ башчызыныҥ јылдыҥ сайынгы јаҥыјылдык ёлказы ӧтти.

Байрамда ончо аймактардаҥ ла каладаҥ 280 ӱренчик турушкан. Олордыҥ тоозында школдордыҥ, ӱзеери ӱредӱликтиҥ тӧзӧлмӧлӧриниҥ ле культураныҥ учреж-дениелериниҥ ӱренеечилери, јайалталу балдар, олимпиадалардыҥ, маргаандардыҥ, конкурстардыҥ јеҥӱчилдери, јакшы ӱрен-гендер, ӧскӱс ле ада-энезиниҥ кичеемели јок арткан, су-кадыгыныҥ аргалары кирелӱ ле кӧп балдарлу билелердиҥ болчомдоры болгон.
Айылчыларды бийик-бийик сынду наадайлар, мультфильмдердиҥ геройлоры уткуган.
Ончо балдар солун, јараш маскалар, кеп-кийим кийип, сӱӱнчилӱ ле ырысту ойноп јӱгӱрип турдылар. Јаҥжыкканы аайынча ла, байла, келип јаткан јыл Койон јыл болгоны учун ёлкада койоноктор эҥ кӧп болды. Балдардыҥ ортозында космонавт ла ОМОН-ныҥ јуучылы болуп кийинген уулчагаштарды канайып темдектебес? Олор ойындардыҥ станцияларына, тындулардыҥ кӧргӱзӱзине ле «Новогодний калейдоскоп», «Новогодний бум», «Лесная полянка», «В гостях у лошади», «Спортивная», «Королевство кривых зеркал», «Технологичное волшебство» деген куулгазынду јерлерге айылдап, ондо ӱлгерлерин кычырган ла сӱӱнип ойногондор.
Алтай Республиканыҥ башчызы Олег Хорохординниҥ адынаҥ балдарды тергеениҥ башкарузыныҥ председателиниҥ ордынчызы Динара Култуева уткуган.
«Јаҥы јыл — ол чындап та куулгазынду ӧй, бу тушта бис эҥ ле агару кӱӱнземелдеристи сананып, ого једерге амадулар тургузадыс. Бу ӧйди эҥ јуук ла кару улузысла ӧткӱредис, келер ӧйгӧ ижемјилӱ кӧрӧдис» — деп, ол айткан.
Вице-премьер балдар ӧткӧн јылда кӧп тоолу јакшы керектер бӱдӱрген, болуш керексигендерге болужын јетирген, ада-энелерин, јаандарын, нӧкӧрлӧрин ле таныштарын јылу сӧзиле, ижиле јӧмӧгӧн деп темдектеген.
«Кару балдар, слердиҥ кажы ла амадугар кыйалтазы јогынаҥ бӱдер деп ундыбагар. Ого једерге чокум алтамдарды шӱӱнип, ичкери барар керек, ӱренип, јаҥы билгирлерге јӱткиир керек. Тыҥ кӱӱнзеп, кӧп иштенер керек! Кажыгар ла тургускан амадузына једер деп бӱдедим» – деп, ол айткан.
Динара Култуева балдарга су-кадык, ӱредӱде једимдер ле кышкы каникулдарды јакшы ӧткӱрзин деп кӱӱнзеди.
Уткуулын онойдо ок Эл Курултайдыҥ председателиниҥ ордынчызы Герман Чепкин айтты. Ол балдарды келип јаткан Јаҥы јылла уткуп, олорго јакшы ӱрензин, иштеҥкей болзын ла кӧп чындык нӧкӧрлӧрлӱ болзын деп кӱӱнзеди.
Оноҥ ары ёлкага келгендер «По Щучьему велению» деген јаҥыјылдык спектакль кӧргӧн, оныҥ кийнинде «Алиса в стране чудес» деп театрал кӧргӱзӱ, чибичекти эбиреде Соок Таадак ла чӧрчӧк јеринеҥ келген айылчылар турушкан ойын башталган.
Ончо балдарга јаҥыјылдык тату сыйлар табыштырылган.