«Горно-Алтайск» аэропорт: jондык шӱӱжӱ ӧдӧт

19.10.2018

Алтай Республикада «Россияныҥ улу улузыныҥ ады-јолдоры» деген текшинациональный ӱлекер аайынча јондык шӱӱжӱ ӧдӧт. Бу ӱлекер ороонныҥ федерал учурлу аэропортторын бистиҥ ороонныҥ улу улузыныҥ ады-јолдорыла адаарына учурлалган, анда 45 аэропорт туружат.

«Горно-Алтайск» аэропортты јерлештеристиҥ кемизиниҥ ады-јолыла адаарына учурлалган тегерик столдыҥ јууны АР-дыҥ Јондык палатазында ӧтти. Ӱлекердиҥ баштапкы бӧлӱгинде улустаҥ ла јондык организациялардаҥ шӱӱлтелер јууры ӧдӧр. Конкурстыҥ лонг-листи ӱлӱрген айдыҥ 28-чи кӱни кирезинде тургузылып калар. Оноҥ социологический сурулаш-шиҥжӱ волонтерлордыҥ турушканыла ӧткӱрилип, эҥ кӧп адалган ӱч кижиниҥ ады-јолы талдалар. Аэропортко кемниҥ адын адаары јанынаҥ ӱнбериш ӱлекердиҥ сайты ажыра кӱчӱрген айдыҥ 8-чи кӱнинеҥ ала 30-чы кӱнине јетире ӧдӧр.

«Мында куучын аэропортко улу кижиниҥ адын адаары керегинде ӧдӧт, аэропорт кубулта адалбас. Кезик улус ортодо бу јанынаҥ эмеш булгалыш болуп туру. Бистеги «Горно-Алтайск» аэропорт ол ло бойынча артар, је ого албаты-јон ӱнбериш ажыра адаган кижиниҥ ады-јолы адалар» – деп, тергеениҥ Јондык палатазыныҥ председатели Татьяна Кончева јартаган.

Тегерик стол ӧйинде айдылган шӱӱлтелердиҥ тоозында албатыныҥ кайчызы Алексей Калкинниҥ, алтай бичиичи Лазарь Кокышевтиҥ, поэт ле драматург Павел Кучияктыҥ, чой кӧдӱрери аайынча телекейдиҥ кӧп катап чемпионы Иван Немцевтиҥ, билимдердиҥ Алтайда баштапкы докторы Сазон Суразаковтыҥ, Чой аймактаҥ Совет Союзтыҥ Геройы, летчик Евгений Трофимовтыҥ, јарлу алтай јурукчы Григорий Чорос-Гуркинниҥ, совет бичиичи ле Чуйдыҥ јолын шиҥдеечи Вячеслав Шишковтыҥ ла ӧскӧ дӧ кӧп тоолу улустыҥ ады-јолдоры адалган.

Шӱӱжӱ ӧйинде «Вымпел» деген јуучыл-тӧрӧлчи бедирештӱ клубтыҥ башкараачызы, ветерандардыҥ «Боевое братство» деп Текшироссиялык организациязыныҥ республикан бӧлӱгиниҥ председателиниҥ ордынчызы Александр Филиппов аэропортко Чаргы-Оозы јуртта чыккан, Совет Союзтыҥ Геройы Илья Шуклинниҥ адын адаары јанынаҥ шӱӱлтезин айткан.

Республиканыҥ Јондык палатазыныҥ турчызы Артур Сабин Кан-Оозы аймактыҥ јондыгыныҥ адынаҥ баштапкы алтай летчик Байрам Сандинниҥ ады-јолын адады.
«Кандидатура эдип адалган кижи бистиҥ улу јерлештеристиҥ кӧбизиниҥ эҥ јакшы јанын бириктирген кижи болор учурлу. Мениҥ шӱӱлтемле, андый кижи Г. И. Чорос-Гуркин болуп јат, ол бистиҥ тӱӱкиде улу кижи деп темдектелет. Оныҥ јайаандыгы Туулу Алтайда да, оныҥ гран-кыйузы да ары јанында текши јарлу» – деп, Чорос-Гуркинниҥ Оностогы музей-туразыныҥ јааны Евгений Тукуеков айткан.

«АР-дыҥ муниципал тӧзӧлмӧлӧриниҥ соведи» деген ассоциацияныҥ бӱдӱреечи директоры Денис Власенконыҥ шӱӱлтезиле, аэропортко адалатан ат јараш, эптӱ угулып турар учурлу, нениҥ учун дезе тергееге авиатранспортло келген айылчылар эҥ ле озо аэропортло таныжат.

Аэропорттыҥ директоры Сергей Кругловтыҥ темдектегениле, республикада јарлу улустыҥ тоозы кӧп. Оныҥ шӱӱлтезиле, аэропортко адалатан кижиниҥ ады-јолы јаҥыс ла бистиҥ ороон кеминде эмес, је анайда ок текшителекейлик кеминде танылу болор учурлу. Нениҥ учун дезе бистиҥ аэропортко албатылар ортодо статус берери јанынаҥ иштер ӧдӧт, мынаҥ кӧргӧндӧ, јуук ӧйлӧрдӧ биске гран да ары јанынаҥ улус авиатранспортло келер.

Тегерик столдыҥ јууныныҥ учында шӱӱжӱ јаҥы ла башталып јатканы темдектелген. Бастыра айдылган шӱӱлтелер ајаруга алылар, мынаҥ ары кӱндерде шӱӱжӱ тергеениҥ башка-башка площадкаларында ӧдӧр. Акция керегинде элбеде јартамалды ӱлекердиҥ окылу порталы ажыра таныжар арга бар.

«Бистиҥ аэропорт 20 јыл иштебей турала, ижин 2011 јылда орныктырган. Бӱгӱнги ӧйдиҥ некелтелерине келижип турган бу аэропорт эмди Москва, Новосибирск ле Томск јаар јаантайынгы чике авиаучуштарды јеткилдейт. Аэропортко ат албатыныҥ ӱнберижи ажыра адалар учурлу. Бисте јарлу јерлештеристиҥ тоозы кӧп, оныҥ да учун олордыҥ тоозынаҥ бир кижини талдап алары јеҥил эмес болоры јарт. Је соҥында талдалган кижиниҥ ады-јолы Туулу Алтайдыҥ бастыра албаты-јонын улустыҥ политикада кӧрӱми эмезе мӱргӱӱл јаҥы јанынаҥ камаан јогынаҥ бириктирерине быжу бӱдедим» – деп, АР-дыҥ башчызы Александр Бердников айткан.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина