Jерлеш журналисттердиҥ једимдери

13.03.2018

Текшироссиялык албаты фронтыныҥ бу јуукта Калининградта болгон медиафорумында бистиҥ тергеениҥ адынаҥ турушкан јерлеш журналисттерле пресс-конференция тулаан айдыҥ 5-чи кӱнинде Горно-Алтайскта ӧткӧн.

Олор коллегаларына ороонныҥ бастыра тергеелеринеҥ келген 500-теҥ ажыра журналист турушкан бу керек-јарак керегинде куучындаган. ОНФ-тыҥ медиафорумында блогерлер, медиаменеджерлер, федерал СМИ-лердиҥ башкараачылары ла баш редакторлоры, анайда ок элбек јетирӱлер эдер эп-аргалар аайынча иштеп турган министерстволордыҥ ла ведомстволордыҥ башкараачылары турушкан эмтир.

Алтай Республикадаҥ ондо «Эл Алтай» ГТРК-даҥ Иван Яськов, «Планета плюс» журналдаҥ Виктория Дульмаченко ло «Туулу Алтай» радиодоҥ Ольга Тадышева турушкан. Иван Яськов «Майма: убитые дороги» деп адалган сюжедиле, Виктория Дульмаченко «На земле снежного барса» деген статьязыла ОНФ-тыҥ «Правда и справедливость» деген фондыныҥ журналистский иштериниҥ IV бастырароссиялык конкурсыныҥ лауреаттары болуп чыккан. Ольга Тадышева дезе «Нениҥ учун мен талдаштарга барып јадым» деп адалган ижиле Россияныҥ Журналисттер бирлиги ӧткӱрген конкурстыҥ финализи боло берген.

Мынаҥ озо јылдарда «Эл Алтай» ГТРК-даҥ Лора Тайлунова ла «Туулу Алтай» радиодоҥ Алтынгуль Мегедекова мындый ок једимдерге јеткен эди.

Медиафорумда турушкан јерлештерис бу јаан керек-јарактыҥ пленарный јуунында РФ-тыҥ Президенти, ОНФ-тыҥ лидери Владимир Путин турушканын аҥылап темдектегендер. Ороонныҥ президенти Федерал Jуунга эткен баштанузыныҥ кийнинеҥ Калининградка келген эмтир.
Иван Яськовтыҥ айтканыла, тергеелердеҥ келген журналисттерге ОНФ-тыҥ площадказында президентке сурактар берер јакшынак арга болгон. Владимир Путин Албаты фронтына јаан учурлу керек ӧткӱрип турганы учун быйанын айткан. Президенттиҥ темдектегениле, бу медиафорум журналисттерге јаҥыс ла бой-бойыла куучындажар, ченемелдерле ӱлежер арга берип турган эмес, је анайда ок ОНФ-ка ижемјилерин, ӧйкӧп турган сурактарын јетирер арга берет. Оныҥ шӱӱлтезиле, журналисттер байа бир передовойдо иштеп турган ла ороонныҥ бастыра толыктарында не болуп турганын јакшы билер улус.

Форумныҥ экинчи кӱнинде площадкалар иштеген. Бастыразыныҥ модераторы болуп РФ-тыҥ Журналисттер бирлигиниҥ председатели Владимир Соловьев иштеген. Площадкаларда кӧп керектӱ ле јилбилӱ јетирӱлер алар арга болгон.

«Меге медиафорум ӧйинде балдарга учурлалган радиоберилтелерди ле бичик-журналдарды јӧмӧӧри аайынча сурак шӱӱжилгени јараган. Форумныҥ программазы тузалу ла сӱрекей јилбилӱ болгон. Ого Калининградла экскурсия база кирген. Кажы ла кӱн јаркынду керектериле толо болгон» — деп, Ольга Тадышева айткан.

Виктория Дульмаченко јарлу спортивный комментатор Дмитрий Губерниевле, синхронный эжиниш аайынча олимпийский ойындардыҥ беш катап јеҥӱчили Наталья Ищенколо ӧткӧн јайаан туштажу керегинде куучындаган. Бу эки јарлу кижи журналисттерле профессионал узыныҥ јажыттарыла ӱлешкен болтыр. Губерниев сценический ле ораторский куучын аайынча мастер-класс ӧткӱрип, кажы ла ведущийдиҥ билгирлери јаан, кандый ла бӧлӱктеҥ кӧп немени билер учурлу болгонын темдектеген.

Викторияныҥ айтканыла, орооныстыҥ ӧскӧ тергеелеринеҥ келген ченемелдӱ коллегаларыла танышканы ла куучындашканы јилбилӱ болгон.

ОНФ-тыҥ Алтай Республикада тергеелик штабыныҥ сопредседатели Наталья Тадышева журналисттерге ӧмӧ-јӧмӧ иш учун быйанын айткан. Ол: «Слердиҥ, журналисттердиҥ, шылтузында эл-јонды санааркадып турган сурактарга ајаруны эттирткенис. Jаҥыс ла јаҥдардыҥ ајарузын эттирткен эмес, је анайда ок кезик сурактар аайынча чокым иштер ӧткӱрилген ле олор чечилген. Ӧмӧ-јӧмӧ ишти мынаҥ да ары улалтарыс деп бӱдедим» — деген.

К. ЯШЕВ

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина