Алтайдын Чолмоны

Т. Гигель: «Бистиҥ улусты Тӧрӧлине сӱӱжи аргадаган»

15.01.2019

Алтай Республиканыҥ јасакчы јаҥынаҥ РФ-тыҥ Федерация Совединде чыгартулу кижи Татьяна Гигель Майма аймактыҥ јондык организацияларыныҥ ижиниҥ уч-турулталарын кӧрӧр иштиҥ экинчи бӧлӱгин 2019 јылдыҥ башталганында ӧткӱрер тушта турушкан.

Бистиҥ тергее кеминде алза, бу аймактыҥ јеринде регистрация ӧткӧн јондык биригӱлердиҥ тоозы эҥ ле кӧп — 60-наҥ ажыра. Анайда ок 20-неҥ ажыра биригӱлер тургуза ӧйдӧ регистрация јогынаҥ иштейт. Волонтердыҥ јылыныҥ кӧдӱриҥилӱ јабылтазы 2018 јылдыҥ јаҥар айында аймактыҥ культура аайынча тӧс јериниҥ јаан залында ӧдӱп турарда, эрчимдӱ јиит волонтерлордыҥ ады-јолдоры адалган ла олор кайралдаткан.

Јондык организациялардыҥ ижиниҥ уч-турулталарын кӧрӧр иштиҥ экинчи бӧлӱгин ӧдӱп   јаткан айда ӧткӱрер тушта оныҥ ижинде јаҥыс ла кандый бир керек-јарактарды бойыныҥ кӱӱниле эдеечилердиҥ јондык организацияларыныҥ чыгартулу улузы турушкан эмес. Волонтерлорго эткен иш-керектери учун быйан айдарга ла олордыҥ јаҥы баштаҥкайларын јӧмӧӧргӧ, аймактыҥ администрациязыныҥ јааны Роман Птицын, национальный политика ла јондык колбулар аайынча республикан комитеттиҥ председатели Людмила Варванец, аймактыҥ депутаттарыныҥ Совединиҥ депутаттары, бир канча организациялардыҥ ла ведомстволордыҥ башкараачылары келген болгон.

Сенатордыҥ шӱӱлтезиле, чаган айдыҥ башталганында «Граждан эрчимниҥ јылына рапорт эдедис! Майма аймактыҥ 95 јылдыгыныҥ јылын уткыйдыс!» деп адалып ӧткӱрилген бу керек јаркынду эске алыныштар артырган, јакшы кӱӱн-санаа берген.

Бу кӱнде 70-неҥ ажыра эрчимдӱ волонтерлор кайралдаткан. Олордыҥ тоозында сенатор Татьяна Гигельдиҥ адынаҥ Быйанду самаралар Майма аймактыҥ аҥчыларыныҥ ла балыкчыларыныҥ биригӱзиниҥ башкартузыныҥ председатели Александр Остапенкого, аймактыҥ ветерандарыныҥ организациязыныҥ башкараачызы Вера Берняевага, «Перспектика» деген фондтыҥ башкараачызы Ольга Волосовцевага, «Женщины Алтая — Алтайдыҥ эпшилери» деген јондык биригӱниҥ Маймадагы бӧлӱгиниҥ јааны Любовь Калинниковага, «Духовно-просветительский центр «Лепта» деген РОО-го ло Алтай Республиканыҥ хоккей аайынча федерациязыныҥ председатели Вячеслав Куриленкого табыштырылган.

«Ороонныҥ президенти Владимир Путинниҥ  баштаҥкайын аймактыҥ јондык биригӱлериниҥ улузы јаҥыс ла Волонтердыҥ јылыныҥ кеминде эмес јӧмӧгӧни јаан учурлу. Байрамдык керек ӧткӱрер тушта бу улус бойыныҥ баштап алган јакшынак керегине чындык болгонын ла оны оноҥ до ары улалтарга турганын кӧргӱскен. Ол тоодо уур-кӱч айалгаларга алдырткан улуска болужарын, олордыҥ јилбӱлерин корыырын» — деп, сенатор бойыныҥ уткуулду сӧзин айдар тушта аҥылап темдектеген.

Татьяна Гигель бу туштажу ӧйинде «Русское вече» деген РОО-ныҥ председатели Ольга Кочергинаныҥ Подгорное јурттыҥ ӧрт-тӱбекке алдырткан улузына болужары, аймактыҥ тӧс јуртыныҥ оромдорыныҥ бирӱзин Евгений Бурьяновтыҥ адыла адаары јанынаҥ шӱӱлтезин јӧмӧгӧн. Е. Бурьянов Майманыҥ орто ӱредӱлӱ 2-чи таҥмалу школын ӱренип божоткон, баштапкы Чечен кампания тушта јеҥ јастанып јыгылган.

Иштиҥ уч-турулталарын кӧрӧрине учурлалган керек керегинде бойыныҥ шӱӱлтезин айдып тура, сенатор мынайда темдектеген: «Политикала колбулу керек-јарактарда 17 јылдыҥ туркунына туружып јӱреле, мен кандый ла улусла тушташкам. Је бӱгӱнги керек, мында ачык-јарык ла кижилик кӱӱндӱ кӧп улус јуулган, меге аҥылу болуп јат. Оны канайып та ундып болбозыҥ. Эҥ ле учурлузы — эткен-бӱдӱрген иш-керектер јанынаҥ алган јетирӱ общественниктердиҥ ижин Федерация Совединиҥ кеминде кӧргӱзер арга берет, оны тергеелердиҥ Палатазы деп тегиндӱ адабай јадылар».

«Бистиҥ ороонныҥ салымы јеҥил эмес, је ондо кандый ла уур-кӱчтерди јеҥип чыгар ийде-кӱч бар. Бистиҥ ороондо тегин эмес — тӧрӧлчи кӱӱндӱ албаты-јон јадат. Олор бойыныҥ Тӧрӧлин акту кӱӱнинеҥ сӱӱп јат, олорго кемниҥ де тӱбеги туш-туура тӱбек болбойт. Онызын волонтерлордыҥ тоозы кӧптӧп турганы керелейт» — деп, Татьяна Гигель аҥылап темдектеген.

Президент јарлаган Волонтердыҥ јылыныҥ адакы уч-турулталары аймак кеминде кӧрӱлип калды, је кичӱ Тӧрӧлине јакшыны эдер деген кӱӱн-санаа улуста тӱгенбеген деп, сенатор айткан.

Сенатор «Женщины Алтая — Алтайдыҥ эпшилери» деген јондык биригӱниҥ Маймадагы бӧлӱгиниҥ турчыларына оны бу биригӱниҥ кӱндӱлӱ турчызы эдип алганына јаан алкыш-быйан сӧзин айдат.

Парламентарий сӧс айдып тура, калганчы јылдарда ол бу организацияла јуук колбуда иштеп, уур-кӱчтерге алдырткан ӱй улуска ла олордыҥ билелерине болужып јӱргенин темдектеген.

Уткуулду сӧстӧрдиҥ эстафетазын Майма аймактыҥ јааны Роман Птицын учына јетирген. Граждан эрчимниҥ јылыныҥ уч-турулталарын кӧрӧр тушта аймактыҥ албаты-јоныныҥ граждан эрчими тӱгенбези јарт кӧрӱлген деп айткан. Оныҥ шӱӱлтезиле, 2019 јыл Майма аймактыҥ албаты-јонына јаҥыс ла талдаштар алдында тартыжуларла эмес, је анайда ок Майма аймактыҥ 95 јылдыгын бийик кеминде темдектеериле аҥылу болор. Јаҥы јылда Ада-Тӧрӧл учун Улу јууда Јеҥӱниҥ 75 јылдыгын темдектеериле колбулу белетеништӱ иштер ӧдӧр. Ол тоодо аймактыҥ јурттарындагы кереестер јаҥырта јазалар, Эземниҥ паркыла колбулу элбек кемдӱ иштер ӧдӧр. Оныҥ шӱӱлтезиле, бу ла ӧскӧ дӧ керек-јарактарда волонтерлор јербойыныҥ јаҥына јаан болужын јетирер.

АР-дыҥ Эл Курултайыныҥ пресс-службазы