Алтайдын Чолмоны

Озолодо талдаштарга јонныҥ јилбӱзи јаан

28.05.2019

Алтай Республикада кӱӱк айдыҥ 26-чы кӱнинде ӧткӧн озолодо талдаштарда 22 300 ӱнбереечи  турушкан, бу тергееде ӱнбереечилердиҥ 13,87%. Анчада ла эрчимдӱ ӱнбериш Кош-Агаш аймактыҥ 11-чи округында  (30,01%), Кан-Оозы аймактыҥ 23-чи округында (29,04%) ла  Шабалин аймактыҥ 30-чы округында (28,76%) ӧткӧн.

Озолодо талдаштардыҥ бирлик кӱнинде республикада 49 участковый чоттоор камыстар иштеген. Партиядаҥ кандидат болуп талдаштарда 121 кижи турушкан. Озолодо талдаштар ӧткӱрерге республика 48 муҥнаҥ ажыра бюллетеньдер алган. Ӱнбериш јажытту ӧткӧн лӧ ӱнбереечилер бюллетеньде адалган канча да кижи учун ӱнин берер аргалу болгон (рейтинговый ӱнбериш).

Чоттоор участокторго ӱнбереечилердиҥ 13 проценттеҥ ажыразы келгени Эл Курултайдыҥ депутадына кандидаттар талдаар озолодо талдаштарга эл-јонныҥ јилбӱзи јаан болгонын керелейт. Бу керегинде «Единая Россияныҥ» Эҥ бийик совединиҥ турчызы, Политикалык ла экономикалык коммуникациялардыҥ агентствозыныҥ генеральный директоры Дмитрий Орлов угускан. «Алтай Республикада озолодо талдаштарда мӧрӧй чыннаҥ јаан болгон, «Единая Россиядаҥ» Эл Курултайга кандидаттар кӧстӧӧри чындык айалгада ӧткӧн. Республиканыҥ политикалык јӱрӱминде «Единая Россия», мынаҥ озо чылап ок, тӧс учурлу јерде турганын бу керелейт» – деп, политолог айткан.

«Единая Россияныҥ» тергеелик бӧлӱгиниҥ качызы, АР-дыҥ парламентиниҥ башкараачызы Владимир Тюлентинниҥ темдектегениле, быјыл ӱнин бергендердиҥ тоозы 2016 јылда Государстволык Думаныҥ депутадына кандидаттар талдаар озолодо талдаштарда турушкандардаҥ кӧп болгон. Ол тушта участокторго ӱнбереечилердиҥ 11,5% келген.

Озолодо талдаштарга республиканыҥ эл-јоныныҥ јилбӱзи јаан болгонын Алтай Республиканыҥ  Журналисттер биригӱзиниҥ башкараачызы, «Единая Россияныҥ» озолодо талдаштарын ӧткӱрер тергеелик тӧзӧмӧл комитеттиҥ турчызы Борис Алушкин угускан. «Озолодо талдаштардыҥ бирлик кӱни тӱгенип јат ла ого эл-јонныҥ јилбӱзи, анчада ла ыраак јаткан аймактарда јаан болгонын кӧрӧдис – деп, ол айткан. – Бу керекте, талдаштарда чылап ок,  тӧс улус ӱнбереечилер, бистиҥ республиканыҥ эл-јоны болгонын кӱӱнзеп темдектейдис».

«Единая Россия» партияныҥ озолодо талдаштарыныҥ турулталарыла Горно-Алтайскта јеҥип чыккандар аргачы Сергей Тимошенский, Федерация Совединиҥ турчызыныҥ болушчызы Артур Кохоев, С. Т. Пекпеевтиҥ коммерциялык эмес кӧмзӧзиниҥ директоры Радмила Пекпеева, Горно-Алтайсктыҥ башкартузыныҥ юрисконсультанты Ирина Лазарева, депутаттардыҥ Горно-Алтайсктагы Совединиҥ депутады Игорь Яимов, Госдуманыҥ депутадыныҥ болушчызы Петр Попошев, Алтай Республиканыҥ башчызыныҥ Государстволык оркестриниҥ јайаан башкараачызы Владимир Кончев,  «Јиит гвардияныҥ» тергеелик штабыныҥ башкараачызы Роман Гордеев.

Анайда ок озолодо талдаштарда јеҥӱ алгандардыҥ тоозында АР-дыҥ парламентиниҥ спикери Владимир Тюлентин, баштапкы вице-премьер Наталья Екеева ла вице-премьер Григорий Пильтин, сенатор Татьяна Гигель, депутаттардыҥ Турачак аймактагы Совединиҥ депутады Владислав Рябченко, јондык ишчи Айдар Мызин, «Звезда Алтая» газеттиҥ баш редакторы Алена Казанцева.

«Единая Россия» – кандидаттарын озолодо талдаштарда талдап кӧстӧгӧн ороондо сок јаҥыс партия болгонын айдар керек. Эл Курултайга депутаттар тудар талдаштарга партиядаҥ чыгатан кандидаттар мынайда талдалат.

Озолодо талдаштардыҥ округтар аайынча турулталары керегинде ээчий чыккан газеттеҥ кычырыгар.

 («Единая Россияныҥ» тергеелик бӧлӱгиниҥ јетирӱлериле)