Алтай-Камчатка: најылык колбулар бек

06.08.2019

Госдуманыҥ депутады Јыман Белеков Петропавловск-Камчатскта Россияныҥ Јуучыл-Талай флодыныҥ кӱнине учурлалган тизӱ кӧдӱиҥилерде турушты.

Јыман Белеков Алтай Республиканыҥ Эл Курултайыныҥ спикери болуп тура, Тымык теҥистиҥ флодыныҥ сууныҥ алдыла јӱрер ийде-кӱчтериниҥ башкартузыла «Владимир Мономах» крейсерди шефствого алары јанынаҥ јӧпкӧ кол салган. Флот шак ол јӧптиҥ шылтузында канча јылдар туркунына бистиҥ Алтайысла бек колбу тудуп, анчада ла јашӧскӱримле ӧткӱрилип турган јуучыл-таскамал иште јаан јӧмӧлтӧ-болужын јетирет.

Госдуманыҥ депутады Ј. Белеков кӧдӱриҥилӱ парад ӧйинде оныҥ туружаачыларын уткыды. Ол бойыныҥ уткуулду сӧзинде ӧдӱп јаткан кӧдӱриҥиниҥ ороон кеминде бийик учурын аҥылап айтты. «Бу байрам бисти ончобысты бириктирет, нениҥ учун дезе флот орооныстыҥ суула гран-кыйуларын корып јат. Россия талай-теҥистӱ улу јаан ороон болгон до, болуп та јат» – деп, ол чокымдады. Сууныҥ алдыла јӱрер талайчыларды ороонныҥ флодыныҥ эҥ талдамазы деп тегиндӱ айтпаганын ол база аҥылап темдектеди. Оныҥ айтканыла, сууныҥ алдында узакка јӱрӱп, орооныстыҥ гран-кыйузын корыыры каруулу да, кӱч те, нерелӱ де служба.

Парад ӧйинде Јыман Белеков Россияныҥ Геральдика палатазыныҥ адынаҥ јондык кайралдарды эҥ артык талайчыларга ла олордыҥ эш-нӧкӧрлӧрине табыштырды. Госдуманыҥ депутады анайда ок сууныҥ алдыла јӱрер флоттыҥ командующийи, контр-адмирал Владимир Дмитриевле, јуучыл-политикалык иш аайынча оныҥ ордынчызы баштапкы рангтыҥ капитаны Александр Лакизала тушташкан. Бистиҥ јерлежис А. Лакиза Майма аймактыҥ Кызыл-Ӧзӧк јуртында чыккан. Ол службазын узак јылдарга јарамыкту улалтып, јерлештериниҥ, тӧрӧл јериниҥ, Алтай Республиканыҥ адын, тоомјызын бийик кеминде алып јӱрет. Талайчылар Ј. Белековко јуучыл-талай флотко јаантайын ајару эдип турганын баалап, јаан быйанын айттылар.

Петропавловск-Камчатскта ӧткӧн тизӱ кӧдӱриҥилердиҥ бирӱзи – каланыҥ тӧс тепсеҥинде контр-адмирал Василий Завойконыҥ кереезине «Мактыҥ Гирляндазын» салдылар. Шак бу јакшынак јаҥжыгу быјылгы јылда таланыҥ башчызыныҥ ла Россияныҥ Тӱндӱк-Кӱнчыгыштагы јуучылдарыныҥ ла ийде-кӱчтериниҥ командующийиниҥ баштаҥкайыла јолын алынган. Оныҥ кийнинде каланыҥ тӧс тепсеҥинде кӱндӱлӱ каруулдыҥ ла парадный расчеттыҥ кӧдӱриҥилӱ кӧрӱзи болды. Олор тепсеҥле ӧткӧн кийнинеҥ таланыҥ башчызы Владимир Илюхин Тӧрӧлине чындык службазы учун талайчы моряктарга быйанын айтты. «Россия јӱсјылдар туркунына талайчы каандык деген адын јолду бийик кӧдӱрип апарат. Мында јуучыл-моряктардыҥ јаан нерези. Олордыҥ тӱӱкилик јолында бистиҥ ороонго аҥылу темдектӱ јеҥӱлери. Камчатканыҥ јуучыл-талайчы тӱӱкизин баалап ла оморкоп, бис бӱгӱн јаҥы јаҥжыгуныҥ јолын ачтыс – контр-адмирал Василий Завойконыҥ кереезине «Мактыҥ Гирляндазын» кӧдӱриҥилӱ айалгада салдыс. Бӱгӱнги кӱнде, мынаҥ да озо јылдарда чылап ок јуучыл-талайчы флот Россияныҥ талайдагы гран-кыйуларын быжу ла ак-чек корулап јат. Јуучыл моряктар кандый да ӧйдӧ берген чертине, Тӧрӧлине чындык артат» деп бойыныҥ уткуулында аҥылап айтты.

Кӧдӱриҥиниҥ байрамдык бӧлӱгинде айылчыларга, Јуучыл-Ийде кӱчтердиҥ сводный плац-концерти, талайчы пехотинецтердиҥ ойын-концерти болды. Байрамныҥ айылчылары анайда ок јуучыл техниканыҥ кӧрӱзиле танышты, полевой кухнялардыҥ белетеген флотский кашазын амзадылар.

Госдуманыҥ депутадыныҥ

пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина