Кем де ундылбаган…

14.05.2020

Кӱӱк айдыҥ 9-чы кӱнинде Ада-Тӧрӧл учун Улу јууда Јеҥӱниҥ 75 јылдыгына учурлай Шабалин јуртта јаҥыртылган Мактыҥ монументине чечектер салынган.

Бистиҥ аймактыҥ кӧп тоолу јакшынак уулдары ла кыстары ол јууныҥ јалаҥдарында јеҥ јастанган. Шабалин јурттыҥ тӧс јеринде тургузылган кереес ол јерлештеристиҥ эземин тереҥ тоогоныстыҥ темдеги болуп јат.

Мактыҥ мемориалында Ӱргӱлјик отко чечектер ле веноктор саларында «Шабалин аймак» муниципал тӧзӧлмӧниҥ јааны Эрчим Сарбашев, аймактыҥ депутаттарыныҥ Совединиҥ јааны Лариса Андреева, Шабалинниҥ јурт јеезезиниҥ јааны Мерген Чичканов турушкандар.

Бу ла кӱн Шабалинниҥ культуразыныҥ тӧс јериниҥ ишчилери коронавирустаҥ коруланарыныҥ ээжи-некелтелериле башкарынып, байрамдык ойын-концерт кӧргӱскен.

Чечектер ле веноктор аймактыҥ бастыра јурттарындагы кереестерге ле обелисктерге салынган деп айдар керек.

Камлак јуртта Ада-Тӧрӧл учун Улу јууныҥ јуучыл геройлорыныҥ эземине учурлалган ла јаҥыртылган стелланыҥ кӧдӱриҥилӱ ачылтазы ӧткӧн. Коронавирусла колбой албаты-јон айылдары сайын отурар ээжи тургузылганынаҥ улам јаҥыртылган стелланыҥ ачылтазында тоолу ла улус турушкан. Јурттыҥ эл-јоны бу ачылтаны интернеттеҥ чике трансляция ажыра кӧргӧн.

«Бу кӱн Тӧрӧлисти корып алган албатыныҥ јалтанбазыныҥ темдеги болуп тӱӱкиге кирген – деп, аймактыҥ јааны Э. Сарбашев айткан. –Јеҥӱниҥ кӱни бистиҥ орооныска агару байрам болгон ло андый ла болуп артар. Бӱгӱн бис ӱйелер колбузын орныктырып тура, Камлак јурттыҥ Ада-Тӧрӧл учун Улу јууда јеҥ јастанган јуучылдарыныҥ эземине учурлай бу јаҥыртылган стелланы ачадыс».

Јурттыҥ улузы Јеҥӱни јууктадарга јууныҥ јалаҥдарында јалтанбазынаҥ јуулашкан, ӱзӱги јогынаҥ тылда иштеген. Камлактаҥ фронтко эки јӱстеҥ кӧп кижи атанган, јарымызынаҥ кӧби јууныҥ јалаҥдарында јеҥ јастанган.

Кереести орныктырарында јӧмӧшкӧн улустыҥ ады-јолдоры адалган, олорго алкыш-быйанду сӧстӧр база айдылган. Анайып, администрацияныҥ ла јурттыҥ эл-јоныныҥ адынаҥ быйанду сӧстӧр АР-дыҥ башчызы Олег Хорохординге, аймактыҥ јааны Эрчим Сарбашевке, таҥынаҥ аргаачы О. Б. Зыряновага айдылган.

Ороонныҥ јаан байрамы быјыл јаҥы форматла ӧткӧн. Је андый да болзо,ол учурын јылыйтпаган. Камлак јурттыҥ эл-јоны Улу Јеҥӱни алдындагызыдый ла тӧрӧлчи кӱӱндӱ ле оморкодулу уткыган.

Шабалин аймакта кӧп саба јурт јеезелерде кереестер јаҥыртылганын темдектеер керек. Байрамдык керек-јарактар ӧткӱрер тушта санитарно-эпидемиологический некелтелер бузулбаган, улустыҥ тоозы ас болгон.

Алена ГУЩИНА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина