Алтайдын Чолмоны

Моногоспитальдарда ӱзеери 70 јер

28.09.2020

Алтай Республиканыҥ башчызы Олег Хорохордин тергееде коронавирус југуш оору таркаарын болдыртпазы аайынча оперативный штабтыҥ ээчиде јуунын ӧткӱрген. Ондо госпитальдарда ӱзеери 70 јер белетеери јӧптӧлгӧн.

Јуунды ачып тура, субъектти башкараачы Алтай Республикада, калганчы јетирӱлерле, текши алза, бистиҥ тергееде коронавируска табарткан улустыҥ тоозы 3478-ге јеткен, ол тоодо: Кош-Агаш аймакта — 1310 кижи, Горно-Алтайскта — 771, Майма аймакта — 327, Оҥдой аймакта — 233, Турачак аймакта — 230, Кан-Оозы аймакта — 168, Шабалин аймакта — 164, Улаган аймакта — 121, Чамал аймакта — 98, Кӧксуу-Оозы аймакта — 48, Чой аймакта — 8.  Калганчы конокто COVID-19 оорулу эки кижи божогон, улус корогон учуралдардыҥ текши тоозы 20, ол ортодо 17-зи — коронавирустаҥ улам, ӱчӱзи — башка шылтактардаҥ деп темдектеди. Текши ӧйдиҥ туркунына тергееде 2542 кижи јазылган.

«Бисте оорыган улустыҥ тоозы кӧптӧгӧн кӧргӱзӱ бийик ле бойы тудулат. Ол ок ӧйдӧ улус корогон кӧргӱзӱлер, ороон ичинде кӧргӱзӱлерге кӧрӧ, эҥ јабыстарыныҥ тоозында. Мынаҥ озо айларда коронавируска кажы ла кӱн 400-500 кижини шиҥдеп турган болзо, бӱгӱнги кӱнде 900 кижи шиҥделет. Онызы онойдо ок темдектелип турган учуралдардыҥ тоозын кӧптӧдӧт» — деп, Олег Хорохордин айтты.

Тергеениҥ баш санитар эмчизи Леонид Щучинов оорыган улустыҥ кӧп сабазы ол ло бойы Кош-Агаш аймакта деп јетирди, текши тоодоҥ 39% оорыгандар бу аймакта, бӱгӱнги кӱнде ондо кажы ла 16-чы кижи оорыган эмезе оорып јат.

Кош-Агаш аймактыҥ јааны Серикжан Кыдырбаев муниципал тӧзӧлмӧдӧ кирелендирген ээжи-некелтелер тыҥып јатканын, кӧп эл-јон јуулар керек-јарактар, ол тоодо билелик, токтодылганын каруулу ајаруда тудулып турганын айтты. Аймактыҥ аргачылары бир неделениҥ туркунына иштебес деп јӧптӧшкӧндӧр — сыгын айдыҥ 28-чи кӱнинеҥ ала ӱлӱрген айдыҥ 4-чи кӱнине јетире.

Тергеениҥ су-кадык корыыры аайынча министри Сергей Коваленко тергеениҥ эмчилик тӧзӧлмӧлӧринде 264 кижи јатканы, олордыҥ јарымынаҥ кӧбинде пневмония бары илелелгени керегинде јетирди. Симптомдор јок ло јеҥил кеминде оорып тургандар амбулаториялык эмдеш алып турган. Моногоспитальдарда текши тооло 334 јер тӧзӧлгӧн.

О. Хорохордин коронавирусту пациенттерди эмдеер јерлерди кӧптӧтсин деп јакарды. Министр ол сурак аайынча иштер эм тургуза башталып калганын, база 70 јер тӧзӧлӧрин јетирди. Јуунныҥ база бир сурагы ол тергеедеги школдордо, балдардыҥ садтарында, колледжтерде ле вузтарда айалга керегинде болды. АР-дыҥ ӱредӱлик ле билим аайынча министри Ольга Саврасова ӱредӱлик тӧзӧлмӧлӧрдӧ ӱренеечилер ле педагогтор оорыыры ајаруда тудулып турганын јетирди. Калганчы јетирӱлерле, текши дистанцион аайыла ӱренишке 10 школ кӧчӱрилген, олордыҥ алтузы — коронавирустаҥ улам, тӧртӱзи — ОРВИ-деҥ улам. Онойдо ок тергеениҥ 20 школында дистанцион аайыла ӱренери кезиктей 36 класс кийдирилген. Балдардыҥ садтарында ӱч группа бӧктӧлгӧн, профессионал ӱредӱлӱ тӧзӧлмӧлӧрдӧ — сегис группа.

«Класста оорыган учуралдар темдектелип, ӱренчиктерди дистанцион аайыла ӱренерине кӧчӱрген кийнинде олор јондык јерлерде болуп, кружокторго ло секцияларга барып турган деп јетирӱлер бар. Ондый болбос учурлу. Изоляцияныҥ режимин тудары аайынча каруулдашты тыҥыдар керек» — деп, башчы айтты.

Оперштабтыҥ јӧбиле јажы 65 јаштаҥ ӧрӧ улустыҥ самоизоляцияда отурары ӱлӱрген айдыҥ 16-чы кӱнине јетире узадылып јат. Муниципал тӧзӧлмӧлӧрдиҥ администрацияларыныҥ јаандарына ла АР-дыҥ ичбойындагы керектер аайынча министерствозына јондык јерлерде маскалу јӱрер режимди буспазын ајаруда тутсын, бускандарды кату каруузына тургуссын деп јакару эдилди.