Турачакта — Спорттыҥ албатылык бӱдӱмдериниҥ тӧс јери

14.12.2020

Јаҥар айдыҥ 10-чы кӱнинде Алтай Республиканыҥ башчызы Олег Хорохордин Турачакта Спорттыҥ албатылык бӱдӱмдериниҥ тӧс јериниҥ кӧдӱриҥилӱ ачылтазында турушты.

Эпидемиологиялык айалгала колбой керек-јаракта ас тоолу улус турушкан, ол ончо санитарно-эпидемиялык ээжилер аайынча ӧткӧн.

«Тӧс јер Алтай Республиканыҥ «Государстволык эл политиканы бӱдӱрери» деген госпрограммазы кеминде ас тоолу ӧс калыктардыҥ культуразын чеберлеериниҥ ле оныҥ ӧзӱминиҥ јилбӱлеринде ачылган» — деп, башчы темдектеди.

Муниципал тӧзӧлмӧгӧ спорттыҥ албатылык бӱдӱмдериле ӱредӱлик-тазыктырулар ӧткӱрерге керектӱ тураны јазаарына ла спорт јазалдар аларына субсидия берилген болгон.

Олег Хорохордин бӱгӱн ас тоолу ӧс калыктардыҥ јадынјӱрӱминиҥ аайын бектеерине, олордыҥ аҥылузын, јаҥжыгуларын, культуралык башказын чеберлеп аларына государство кеминде јаан ајару эдилип турганын темдектеди.

«Алтай Республиканыҥ башкарузында ас тоолу ӧс калыктар јадып турган Турачак аймактыҥ јеринде спорттыҥ албатылык бӱдӱмдериниҥ тӧс јерин тудар баштану тургуза ла јӧптӧлгӧн. Бу иш-керектерге госпрограмма аайынча субсидияны эки јылдыҥ (2019 ла 2020 јылдарда) туркунына берери јӧптӧлгӧн» — деп, башчы айтты.

Ол республикада бу ондый баштапкы спорт объект, тӧс јер ачылганыныҥ шылтузында албатылык бӱдӱмдер једимдӱ ӧзӱм алынар, онойып канча чактарга келген јаҥжыгулар кичеелер деп темдектеди.

Тургуза ӧйдӧ јуртта балдарга Чынат Шоҥкоровтыҥ башкарганыла «Алтай кӱреш» ле Вера Гетман башкарган «Алтай шатра» деген секциялар иштейт. Мынаҥ ары «Камчы согоры» ла «Токпок чачары» деген секциялар ачылары темдектелет.

Кӧдӱриҥилӱ ачылтада Алтай Республиканыҥ Кӱндӱлӱ грамотазыла Турачакта балдардыҥ спортивный школыныҥ директоры Антон Карташов кайралдатты.

Уткуулду сӧстӧрин онойдо ок Алтай Республиканыҥ депутады Сергей Ложкин ле Турачак аймактыҥ јааны Виктор Осипов айттылар. Олор спортивный объекттиҥ учурын темдектедилер.

Керек-јаракта јуулгандарга јиит спортчылардыҥ кӧргӱзӱойыны сыйлалды. Адакы учында Олег Хорохордин Спорттыҥ албатылык бӱдӱмдериниҥ туразыныҥ ичин кӧрди.

Тергеебистиҥ јарлу спортчызы Аймерген Аткунов уткуулду сӧзинде мындый јарамыкту тӧс јер ачылганы јаҥыс ла спортчыларга эмес, је онойдо ок Турачак аймакта јаткан ончо элјонго јаан байрам деп темдектеди.

— Нениҥ учун дезе, балдарды таскадары шак ла ойындар ажыра ӧдӧт. Бӱгӱнги кӱнде Турачак аймак бойыныҥ мӧшкӧ кырлап чыгар бӧкӧлӧриле јарлу. Эл Ойындарда тӱргениле, эпчилиле олорго једери јок болот. Бу тӧс јер ачылганыла Турачактаҥ удабас ла оноҥ до кӧп јакшынак спортчылар чыгарында, олор тӧрӧл аймагыныҥ адын албатылык спорттыҥ башка да бӱдӱмдериле тергеелик ле тергеелер ортодо байрамдарда, фестивальдарда бийик кӧдӱреринде алаҥзыбайдым.

Алтай Республиканыҥ спорттыҥ албатылык бӱдӱмдериниҥ федерациязыныҥ адынаҥ спорттыҥ бу ууламјызына јаан ајару эдип тургандарга ончозына јаан быйанысты айдадым. Онойдо ок мындый тӧс јерлер тергеебистиҥ ӧскӧ аймактарында база ачыларына ла Кӧчкӱндердиҥ бастырателекейлик ээчиде ойындарында Алтай Республиканыҥ адын устардаҥ турган јуунты команда корыырына иженедим.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина