Алтайдын Чолмоны

Кыштыҥ јакшынак маргааны

15.02.2021

Алтай Республиканыҥ башчызы Олег Хорохордин кочкор айдыҥ 13-чи кӱнинде Горно-Алтайскта Јыланду ӧзӧктӧ ӧткӧн «Лыжня России» маргаандардыҥ ачылтазында турушкан.

Маргаандардыҥ туружаачыларыныҥ тоозы 700-теҥ кӧп болгон, олордыҥ тоозында: спортсмен-профессионалдар, спорттыҥ ветерандары, ӱренчиктер, студенттер, каланыҥ организацияларыныҥ ла предприятиелериниҥ, тергеениҥ муниципал тӧзӧлмӧлӧриниҥ чыгартулу улузы. Башчы маргаандардыҥ туружаачыларына уткуулду сӧс айдып тура, чаначылардыҥ бу маргаандары бистиҥ тергееде 14-чи катап ӧдӱп јатканын ла олордо кӧп улус туружып турганын темдектеген.

Тергеениҥ башчызы Россияныҥ президенти Владимир Путинниҥ уткуулын маргаандардыҥ туружаачыларына јарлаган: «Бу јакшынак ла текшилей јарлу маргаандарды кӧп јылдардыҥ туркунына ӱзӱктелтпестеҥ ӧткӱрип турган јаҥжыгу улалып барып јатканы сӱӱнчилӱ. Текши ороондо олордо јаштарыла башка-башка ондор муҥдар тоолу улус туружат. Бу кышкы байрам спорттыҥ чана бӱдӱмин сӱӱп, физкультурала јакшынып тазыктырынып тургандарды бириктирет. Олор су-кадык ла эрчимдӱ јӱрӱмди талдап алганын керелейт. Быјылгы «Лыжня России» улуска јарамыкту, улус бирлик кӱӱн-санаалу болгоныла,  спорттыҥ јакшынак кӧргӱзӱлериле санаада артып каларына быжу бӱдедим».

Олег Хорохордин бу маргаандарда спорт сӱӱчилер ортодо 1000 метрге чанала јӱгӱреринде турушкан.

Маргаандардыҥ туружаачыларын анайда ок Алтай Республиканыҥ Эл Курултайыныҥ председателиниҥ молјуларын бӱдӱреечи Герман Чепкин база уткыган. Оныҥ темдектегениле, јашӧскӱрим шак ла мындый маргаандар ажыра су-кадык јӱрӱмге тартылат, тергеениҥ эл-јонында спорттыҥ бу бӱдӱмиле тазыктырынарына јилбӱӱ тӧзӧлӧт.

Маргаандар ветерандардыҥ 1000 метрге чанала маргыжузыла башталган. Оныҥ кийнинеҥ маргыжулар туружаачылардыҥ јажы аайынча тӧрт бӧлӱкле ӧткӧн: 2014 јылда ла оныҥ кийнинде јылдарда чыккан уулчактар ла кызычактар ортодо; 55 јашту ла јажыла оноҥ јаан ветерандар (эр улус ла ӱй улус); 2003 јылда ла оныҥ кийнинде јылдарда чыккан уулдар ла кыстар; 2002 јылда ала оноҥ озо јылдарда чыккан эр ле ӱй улус ортодо.

Бойыныҥ группаларында јеҥӱчилдер ле призерлор болгон:

2014 јылда ла оныҥ кийнинде јылдарда чыккан уулчактар ортодо јеҥӱчилдер ле призерлор:

1. Тимофей Казанцев
2. Назар Цеб
3. Артем Сафронов

2014 јылда ла оныҥ кийнинде јылдарда чыккан кызычактар:

1. Ульяна Иванова
2. Асель Артушева
3. Василина Шипилова

2003 јылда ла оныҥ кийнинде јылдарда чыккан уулдар:

1. Дмитрий Резниченко
2. Данил Глушков
3. Тимур Тодошев

2003 јылда ла оныҥ кийнинде јылдарда чыккан кыстар:

1. Екатерина Белякова
2. Елена Мишарова
3. Кристина Лесных

2002 јылда ла оноҥ озо јылдарда чыккан эр улус:

1. Александр Гуляев
2. Валентин Девятьяров
3. Данил Павляк

2002 јылда ла оноҥ озо јылдарда чыккан ӱй улус:

1. Арина Кусургашева
2. Вера Водолеева
3. Сабина Ковалева

55 јашту ла јажыла оноҥ јаан эр улус:

1. Александр Увачев
2. Василий Кызылов
3. Юрий Ляпунов

55 јашту ла јажыла оноҥ јаан ӱй улус:

1. Светлана Кичинекова
2. Александра Кошкина
3. Наталья Дубень

Эҥ ле јиит туружаачылар — Ильшат Мейканов (4,5 јаш), Василиса Гуляева (2,5 јаш).

Јеҥӱчилдер Россия Федерацияныҥ спорт аайынча министерствозыныҥ медальдарыла, дипломдорыла, кереес сыйларыла, АР-дыҥ физический культура ла спорт аайынча комитединиҥ кубокторыла, дипломдорыла, анайда ок чанала маргыжулардыҥ республикан федерациязыныҥ кереес сыйларыла кайралдаткан.

Бу маргаандар эпидемияла тартыжарыныҥ бастыра ээжи-некелтелерин бӱдӱрип ӧткӱрилген — улус кӧп чогулышпазын деп, маргыжулар бӧлӱктей ӧткӧн. Јажы 65 јаштаҥ ашкан улус быјыл коронавирус оору-јоболдоҥ улам самоизоляцияда болуп, бу маргаандарда турушпаган.