Кирилл Трашев: «Соок Таадактыҥ болушчызына быйаным!»

04.03.2021

Госдуманыҥ депутады, «Единая Россия» фракцияныҥ турчызы Иван Белеков 8 јашту Кирилл Трашевтиҥ чаҥкыр амадузын бӱдӱрип салды. ОВЗ-лу уулчак Москвага барып, ретрокӧлӱктердиҥ музейин кӧрӧргӧ узак ӧйгӧ амадаган.

Майма јуртта јадып турган Кириллдиҥ јилбӱзи — башка-башка кӧлӱктерди: ойынчык трамвайды, троллейбусты, паровозты ла оноҥ до ӧскӧлӧрин јууры. Уулчак бойы олордыҥ чын бойын качан да кӧрбӧгӧн дӧ болзо, је олор Москваныҥ бир музейинде бар деп билип алган.

—Уулым канча-канча сааттыҥ туркунына турбазынаҥ отурып, бойыныҥ сӱӱген автоойынчыктарыла ойноор эмезе олорды јураар — деп, уулчактыҥ энези Ирина Юрьевна куучындады. —Мен Интернеттеҥ орооныстыҥ тӧс калазында ретрокӧлӱктердиҥ музейи керегинде јетирӱни табала, фотојуруктарын балама кӧргӱстим. Кириллдиҥ сӱӱнип, ӧкпӧӧрип јатканын кӧрӧр керек. Ол тургуза ла музейди кӧрӧргӧ, оноор барарга кӱӱнзеди!

Кенек уулчагын јакыскан чыдадып јаткан энеге балазыныҥ амадузын јӱрӱмде бӱдӱретени кӱч керек эмей. Јаҥы јылдыҥ алдында республикада «Амадуныҥ чибичеги» деген кыймыгу-акция ӧткӧн. Јӱрӱмдик уур-кӱч айалгага кирген балдарга бойлорыныҥ самараларын оноор аткарарга јарамыкту арга болгон. Кирилл Соок Таадакка амадузы керегинде бичиген. Самара таадактыҥ бойына јетпеген, је оныҥ болушчызы (оныҥ бойыныҥ айтканыла) Госдуманыҥ депутады Иван Белековко јеткен.

«Кару Кирилл! Мен сени ле сениҥ јуук улузыҥды кирип јаткан Јаҥы јылла акту кӱӱнимнеҥ уткуйдым! Јаҥы јыл — куулгазын чӧрчӧктиҥ ле амадаган амадулардыҥ кыйалтазы јогынаҥ бӱдетен ӧйи ине. Мен сеге ӱредӱде бийик једимдер, бек су-кадык, ырыс ла јӱрӱмиҥде ачык јолдор кӱӱнзейдим. Байрамныҥ алдында јакшы, јараш керектер кӧп болзын. Сениҥ Москвага барып келер ле оныҥ байлыктарын кӧрӧр јаҥыјылдык амадууҥ јӧмӧлтӧ-болуш алынзын, јӱрӱмде бӱтсин!» — бот, Трашевтердиҥ билезиниҥ адына Иван Белековтоҥ сакыбаган јанынаҥ мындый открытка келген. Сӱӱнчиниҥ, кайкалдыҥ учы-куйузы јок болды! Је эртенги кӱнде Госдуманыҥ депутады бойы, тату сыйларын тудунганча, олорго једип келеле, ыраак јолго белетензин деп јакыды.

Кирилл деген алып баатырга Јаҥы јылдыҥ алдында кайкамчылу сый болды. Јилбилӱ ле узакка ундулбас јол-јорык уулчактыҥ 2021 јылдыҥ кочкор айыныҥ 14-чи кӱнинеҥ ала 18-чи кӱнине јетире ӧткӧн каникулдары ӧйинде болды. Кирилл энезиле кожо орооныстыҥ тӧс калазыныҥ эҥ ле кайкамчылу, јилбилӱ јерлеринде, темдектезе, Кремльдиҥ музейлеринде, Москвариумда ла о. ӧ. јерлерде, эки кат экскурсионный автобусла ӧрӧ-тӧмӧн јорыктап, кӧпти кӧрди, бойына ачты. Олор Иван Белековло кожо Кызыл тепсеҥде, ретрокӧлӱктердиҥ «Моторы Октября» деген кайкамчылу музейинде болдылар.

—Иван Итуловичке уулымныҥ амадузы бӱткени, бистиҥ јол-јорыгысты баштап белетегени, аэропортто уткуганы ла ӱйдешкени учун тай ат кӧдӱрбес, тар эжиктеҥ батпас алкыш-быйанысты айдадыс — деп, Ирина Трашева айтты. —Кириллдиҥ сӱӱнчизи, ырызы кӧксине батпай турганына сӱӱнедим. Уулымныҥ ырысту, каткылу чырайын кӧрӱп, јӱрегим кӧдӱрилет, кӧксим бӧктӧлӧт! Кирилл солун јолдоҥ келген ле бойынча, бир ле эрмекле — «Соок Таадактыҥ болушчызына быйан!» деп, кӧдӱриҥилӱ, омок ӱниле кыскарта айтты.

Партияныҥ ӱлекери балдарга ла олордыҥ билелерине сакыбаган јанынаҥ кайкамчылу сыйлар эткени бачым ундылбас! Јакшы керектерге јол јаантайын ачык болзын, амадулар јӱрӱмде јаантайын бӱтсин!

Президент Владимир Путинниҥ эткен баштаҥкайыла текши ороон кеминде экинчи јыл ӧдӱп јаткан «Амадуныҥ чибичеги» деген акция јаан јолын алынган деп айдарга јараар.

К. ПИЯНТИНОВА белетеген

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина