Бије тилиле сыйлаган сӱӱш

11.03.2021

Алтай Республиканыҥ ады-чуузы элбеде јарлу, танылу, канча Гран-Приниҥ лауреады ла оныҥ јолду ээзи, бастырароссиялык ла калыктар ортодогы кӧрӱ-маргаандарда ла фестивальдарда алтын медальдарла кайралдаткан бијениҥ ле кожоҥныҥ «Алтам» эл театры тулаан айдыҥ 7-чи кӱнинде Ӱй улустыҥ телекейлик кӱнине учурлалган байрамдык ойын-концертин кӧргӱсти.

«Алтамныҥ» кажы ла ойын-концерти кӧрӧӧчилерди калыктыҥ бойыныҥ јаҥжыгуларыла, кӧгӱс байлыгыла, кӱӱзиле, бијезиле, онойдо ок телекейдиҥ албатыларыныҥ бијелериле, бальный хореографияла, классический бијеле, хореографияныҥ бӱгӱнги ууламјыларыла, кеендиктиҥ телекейиниҥ кайкалыла таныштырат. Је оныҥ репертуарында тӧс јерде калыктыҥ бијези турат. «Алтамныҥ» белетеп ле кӧргӱзип турган концерттериниҥ кажызы ла бойыныҥ јаҥы тыныжыла, јаҥы бијелериле, једимдериле кайкадат.

Айана Шинжина бијениҥ ле кожоҥныҥ «Алтам» те-атрын 1997 јылда тӧзӧп, јаан јолына чыккан. Оноҥ бери ол республиканыҥ ады-јолын бийик кеминде кӧдӱрип, культуразыла, кӧгӱс байлыгыла Россияда, Францияда, Италияда, Германияда, Бельгияда, Грецияда, Турцияда, Монголияда, СНГ-ныҥ ороондорында ла ӧскӧ дӧ ороондордо кӧрӧӧчилерди таныштырган.

«Алтам» коронавирустыҥ пандемиязыла колбой кӧрӧӧчилерле кезек ӧйгӧ тушташпаган, кӧрӱшпеген. Је бу јаскы байрамдык эҥирде кӧрӧӧчилер оныҥ кажы ла номерин изӱ колчабыжула уткудылар. Јакшынак ойын-концерттиҥ баштапкы бӧлӱгинде элдиҥ бойыныҥ бијелери, кӱӱлери угулды. Мында культураныҥ ла санаттыҥ Г. И. Чорос-Гуркинниҥ адыла адалган колледжин божоткон ло тургуза ӧйдӧ «Алтамныҥ» солисти Эзендей Балбинниҥ топшуурла, икилиле ойноп кайлаганын, јӱзӱн-башка тындулардыҥ, куштардыҥ ӱндерин ӧткӧнгӧнин кӧрӧӧчилер сонуркап угуп, бийик бааладылар. Јолодо чыккан-ӧскӧн јииттиҥ јайалтазы, јайаандык јолы јаан болоры билдирет.

Мында онойдо ок балдардыҥ бије санадыныҥ «Алтам» школ-студиязыныҥ кызычактарыныҥ бијези сӱрекей јакшы болды.

Байрамдык ойын-концерттиҥ экинчи бӧлӱгинде Алтай Республиканыҥ нерелӱ артизи Татьяна Лашутина ла Александр Автономов коо јараш ӱндериле кожоҥдодылар. Онойдо ок бијениҥ ле кожоҥныҥ театрыныҥ балетный труппазы эмдиги ӧйдиҥ бијелерин бијеледи. Олордыҥ кажызы ла јайалталу, узы, мары бийик. Кӧрӧӧчилер Айана Шинжинаныҥ ла Байрам Курдяповтыҥ бијезин узакка чӧйилген колчабыжула уткудылар. «Алтамныҥ» солисттериниҥ кеп-кийимдери јаҥжыкканы аайынча ӧҥжӱк, јаркынду ла јараш болды.

Госдуманыҥ депутады Иван Белеков «Алтамга», оныҥ художественный башкараачызы Айана Шинжинага, ончо туружаачыларга Ӱй улустыҥ телекейлик кӱнине учурлалган кайкамчылу, байрамдык јараш ойын-концерти, кеми бийик профессионал санат учун јаан быйанын айтты.

«Алтамныҥ» эмблемазы јебрен тӱрк тилле бичилгенинде тереҥ учур бар. Мынызы јӱк ле модала башкарынганы эмес, је анайда ок онызы јаҥжыккан јаҥжыгуларды, чӱм-јаҥды, тилди чеберлеп, ичкери ӧскӱрерин керелеп јатканы. Бу јайаандык ишти Слер, Айана Ивановна, билгир ле кӧнӱ, тӧзӧмӧлдӱ, чокым улалтып јадыгар — деп, Иван Белеков уткуулду сӧзинде аҥылап темдектеди. —Слер јаантайын бедирениште, јаҥыртуларга белен, једимдереер јаан. Туулу Алтайды — Алтай Республиканы ыраак-јуук талаларда, ороондордо јаркынду ла чындык кӧргӱзедигер. Бис слерле оморкойдыс!»

Иван Итулович кӧрӧӧчилердиҥ адынаҥ «Алтамга», оны билгир башкарып јаткан Айана Шинжинага учурлу сӧстӧрин айдып, јараш ла јаркынду чечектер сыйлады.

К. ТӦЛӦСОВА

Е. БУТУШЕВТИҤ фотојуруктары

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым