Јакшы керектер эдип тургандар ас эмес

02.08.2021

–Эне, эне! Кӧр, дядя Кирилл меге кандый велосипед сыйлаган! – деп, сегис јашту Даниил энезине кыйгырган. Кӧп катту тураныҥ ӱчинчи кадынаҥ Оксана ырысту уулына кӧргӧн.

Оксана Табакаева јаҥыскан ӱч бала чыдадат. 14 ле 4 јашту кызычактарын ла уулчагы Даниилди. Ӱлӱрген айда ого тогус јажы толор. Ол Горно-Алтайсктыҥ 3-чи таҥмалу гимназиязында ӱренет ле дзюдоло тазыктырынат. Каланыҥ маргаандарында бойыныҥ бескезинде эки катап экинчи јер алган. Оныҥ база бир јилбӱӱзи – велосипед. Јаҥы велик керегинде быјыл Даниил сананбаган да.

–Ооруныҥ кийнинеҥ эм тургуза иштебейдим. Ишке јӱк кӱскиде чыгарым. Эки баланы школго, база бирӱзин садикке белетеер керек. Оныҥ учун уулыма быјыл јаҥы велосипед алып болбозыс, айса болзо, эзенде аларыс деп јартаган болгом – деп, Оксана Георгиевна куучындаган. –А мында сакыбаган јанынаҥ сый! Бӱгӱн оноҥ ырысту кижи јок ошкош. Ол велосипединеҥ чек айрылбайт. Арай ла болзо, кожо уйуктабайт. Уулчагыма, оныҥ учун меге де бу јаан сӱӱнчи!

Дядя Кирилл – ол Кирилл Веселовский, «Су-кадык јӱрӱмниҥ академиязы» деп спортивно-оздоровительный тӧс јер» деген автономный коммерциялык эмес организацияныҥ башкараачызы.

Бу структура килемјилик ӱлекерлер аайынча иштейт – анчада ла Јайлу јуртта. Бу јурт Веселовскийлердиҥ кичӱ тӧрӧли болуп јат. Бир кӱӱндӱ улустыҥ ла спонсорлордыҥ, ол тоодо Фируза Керимова башкарып турган килемјиниҥ «Иман» фондыныҥ јӧмӧлтӧзиле волонтерлор Јайлуныҥ школында иштиҥ кыбын, физика ла химия аайынча лаборатория јазагандар, јербойыныҥ болчомдорына алты байдарка садып бергендер ле Алтай Республиканыҥ депутады Сергей Тимошенскийле кожо Алтын Кӧлдӧ гребной слалом аайынча мастер-класс ӧткӱргендер. Анда ла, кӧлдиҥ јарадында, спортивный площадка ачкандар ла оны мынаҥ ары ӧскӱрерге албаданадылар. Площадкада воркаутка керектӱ јазалдар тургузылар.

Кирилл ле оныҥ нӧкӧрлӧри јаҥыс ла заповедный јерлерге болужып турган эмес, олор калада 3-чи таҥмалу гимназияга видеоконференцияга керектӱ јазал садала, тургузып берген. Эмди дезе Даниилге велосипед садып бергендер.

–Бу кӧп балдарлу нак биле. Балдары да јалакай, јаантайын ару кийинген турар. Олордыҥ энези де ак-чек, кемзинчек кижи. Мен ого велосипед сыйлаарга јазанганыс деп эртедеҥ айтпагам да. Ол оны аларынаҥ мойноор эди. Айылдаш јаткан уулчакка сый эдерге турум деп, аргачы нӧкӧрлӧриме айткам. «Rock coffee-ниҥ» директоры Андрей Безменов, «Спека мебельдиҥ» јааны Леонид Петпенеков ло мен акча коштырып, велосипедти алганыс. Прокаттыҥ «Bikex Board» пунктыныҥ башкараачызы Дмитрий Андреев акча албазынаҥ ла велосипедти тузаланар эттире јазап берген.

«Телекей јакшы керектер эдип турган улус јогынаҥ болбой јат деген сӧстӧрдиҥ чын болгонын эмди кӧрӧдим. Акту кӱӱнимнеҥ мындый болуш јетирген улуска алкыш-быйаным айдадым. Бистиҥ калада јалакай јӱректӱ андый улус бар болгоны кандый јакшы. Олор ӧскӧ улуска болужарга ӧй, ийде-кӱч ле кӱӱн табып турганы сӱреен талдама. Бастырагарга су-кадык, ырыс кӱӱнзейдим. Эдип турган јакшынак керектеригер, бумеранг чылап, кайра эбирилип турзын. Темдектегенер бӱдӱп турзын!» – деп, Оксана Табакаева Кириллге ле оныҥ нӧкӧрлӧрине табыштырган Быйанду самараларында бичиген.

–Јакшынак, кӧдӱриҥилӱ кӱӱн-санаа арткан – деп, Кирилл Веселовский темдектеген. Ол бойы кыймыктанбас ар-јӧӧжӧниҥ «Altai House» агентствозын башкарат ла кирелтезиниҥ он процентин јаантайын килемјилик керектерге кӧчӱрет.

Г. Миронова

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина