«Јаш канаттардыҥ» амадулары јаан

29.04.2021

Москвада кандык айдыҥ 23-25 кӱндеринде кӱӱлик школдордыҥ вокалисттериниҥ «Sounds of voice. Звуки голоса» деген IV бастырароссиялык кӧрӱ-маргааны ӧткӧн. Бу кӧрӱ-маргаанда Улаган аймактыҥ кӱӱлик школынаҥ балдардыҥ «Јаш канаттар» деген јозокту јайаан ӧмӧлиги јеҥӱлӱ туружып, јанып келди. Ыраак јол-јорыкта болгон јайалталар самолеттоҥ тӱшкен ле бойынча, сӱӱнчизиле ӱлежерге кӧндӱре ле «Алтайдыҥ Чолмоны» газеттиҥ редакциязына кирип чыктылар. Ӧмӧликтиҥ художественный башкараачызы Айана ТЕМЕЕВА мынайда куучындады:

—Текши Россияныҥ ончо кӱӱлик школдорына вокалисттердиҥ ӧдӱп јаткан кӧрӱ-маргаанында турушсын деп айттыру-кычырту болгон. Айдарда, Улагандагы бистиҥ кӱӱлик школго база кычырту келген. Онойып бис, «Јаш канаттар» деген јайаан ӧмӧлик, бойысты ченеп, онойдо ок тузалу, керектӱ ле јаан кӧдӱриҥиде туружар, ӱренер амадула Москва јаар атанганыс.

Вокалисттердиҥ кӧрӱ-маргаанында кайда да беш јӱстеҥ ажыра туружаачылар болгон. Тӱрк калыктардаҥ јаҥыс ла бис Алтай Республика болгоныс. Бастырароссиялык кӧрӱ-маргаан академ вокал, албаты вокал, эстрадалык вокал, фольклор деген ууламјыларла ӧткӧн. Бис албаты вокалда ла фольклор ууламјыда туружып, фольклордо баштапкы јерге, албаты вокалда экинчи јерге чыктыс. Албаты-сценический вокалда эки кызычагыс таҥынаҥ (сольно) туружып, база јерлер алган. Турушкан ууламјыларыста јеҥӱчилдер болуп чыгып, дипломдорло кайралдаттыс.

Вокалисттердиҥ кӧрӱ-маргаанында «Јаш канаттардыҥ» туружаачыларыныҥ кӱӱлик ойноткыларла ойноп, јаҥарлаганы, онойдо ок кийген кеп-кийимдери јаан јилбӱде болды.

Кӧрӱ-маргаанныҥ кийнинеҥ гала-концертке жюри эҥ ле јакшы 15 номерди талдап алган ла бис олордыҥ тоозында болдыс. Чындап, пандемияла колбой, кӧрӱ-маргаан ӧйинде залда кӧрӧӧчилер болбогон. Је гала-концертте кӧрӧӧчилер болгон, олор бир кижи ажыра отуратан ээжини чике бӱдӱрген.

Вокалисттердиҥ кӧрӱ-маргааны Гнесиндердиҥ адыла адалган кӱӱлик училищеде ӧткӧн. Окылу жюриде бу училищениҥ ады јарлу профессорлоры, ӱредӱчилери болгон. Бу улус бистиҥ јерлежис Владимир Кончевти јакшы билетен болуптыр, јаан эзен айттылар. Сакыбаган јанынаҥ ондый сӱӱнчи база болды…

Тергеениҥ «Јаш канаттар» деген јайаан ӧмӧлигиниҥ туружаачылары 4-6 класстардыҥ кызычактары Яна Тадинова, Айдыҥ-Ай Темеева, Кристина Сартакова, Злата Сартакова, Альмира Адыкаева, Арина Манзырова. Јол-јорыгыста бисле кожо АР-дыҥ культуразыныҥ нерелӱ ишчизи Ольга Колян, АР-дыҥ нерелӱ артизи концертмейстер Алан Темеев јӱрген.

Чӧлӧӧ ӧйдӧ бис Кызыл тепсеҥде, ВДНХ-да болдыс, тӧс каланыҥ ӧскӧ дӧ јилбилӱ ле јараш јерлериле јӱрдис. Кызычактарга баштапкы катап самолетло учканы база сӱрекей јараган.

Балдарга ыраак јол-јорыкка барарга, кӧрӱ-маргаанда туружарга керектӱ акча-манатла јаҥжыкканы аайынча ада-энелери болушты. База Улаган аймактыҥ культура бӧлӱгинеҥ Сергей Табулгин, Солунай Санаа (бӧлӱктиҥ јааны) болужын јетирген.

«Јаш канаттар» јайаан ӧмӧликтиҥ амадулары быјыл јаан. Республика да, ороон до кеминде ӧдӧтӧн кӧрӱ-маргаандарда туружарга белетениш кӧнӱ ӧдӧт.

К. ТӦЛӦСОВА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина